قازاقستان رەسپۋبليكاسى مادەنيەت مينيسترلىگىنىڭ مادەنيەت كوميتەتى توراعاسىنىڭ 2011 جىلعى 14 اقپانداعى №24 بۇيرىعىنا 1-قوسىمشا
رەسپۋبليكالىق اقىندار ايتىسىن وتكىزۋدىڭ قاعيداسى
1. جالپى ەرەجەلەر 1. ايتىس – قازاقتىڭ اۋىزەكى ادەبي-مۋزىكالىق ونەرىنىڭ كولەمدى جانە اسا قۇندى سالالارىنىڭ ءبىرى. ول – سۋىرىپ-سالما اقىندىق ونەرىنىڭ جەمىسى بولىپ تابىلادى. ايتىستا حالىقتىڭ ادەت-عۇرپى, تۇرمىس-سالتى, دۇنيەتانىمى, ەستەتيكالىق, رۋحاني, فيلوسوفيالىق جانە الەۋمەتتىك كوزقاراسى, قالىپتاسۋ بايقالادى. وسى كيەلى مۇرانى كەڭىنەن ناسيحاتتاپ, ۇرپاقتان-ۇرپاققا جەتكىزۋ, تالانتتى جاستارىمىزدى ونەردىڭ كاۋسار بۇلاعىنان ءنار العىزىپ, شەبەرلىگىن شىڭداۋعا ىقپال ەتۋ ماقساتىندا قازاقستان رەسپۋبليكاسىنىڭ مادەنيەت مينيسترلىگىنىڭ مادەنيەت كوميتەتى رەسپۋبليكالىق اقىندار ايتىسىن (بۇدان ءارى - ايتىس) وتكىزەدى. 2. ايتىس 2011 جىلى تاۋەلسىزدىك كۇنى قارساڭىندا استانا قالاسىندا ءوتكىزىلەدى. 2. ايتىستىڭ ماقساتتارى مەن مىندەتتەرى 3. ايتىستىڭ ماقساتتارى مەن مىندەتتەرى: 1) ايتىس ونەرىن مادەنيەتىمىزدىڭ باعا جەتپەس اسىل مۇراسى رەتىندە حالىققا جان-جاقتى ناسيحاتتاپ, ونىڭ دامۋىنا مەملەكەتتىك دەڭگەيدە قولداۋ كورسەتۋ; 2) بولاشاق ۇرپاققا ايتىس ونەرىن جەتكىزۋ, ايتىس ونەرىن ودان ءارى دامىتىپ, ساپالىق دەڭگەيىن جاقسارتۋ ماقساتىندا وتكىزىلەتىن ءداستۇرلى ءىس-شارا رەتىندە قالىپتاستىرۋ; 3) شەبەر ءسوز قۇراۋ مەن جوعارى دەڭگەيدەگى پوەزيا ارقىلى مەملەكەتتىك ءتىلدىڭ ارناسىن كەڭەيتىپ, دامىتۋ ءارى ناسيحاتتاۋ; 4) تالانتتى, دارىندى جاس اقىنداردىڭ اقىندىق شەبەرلىگىنىڭ شىڭدالا ءتۇسىپ, كوپشىلىككە تانىلۋىنا مۇمكىندىك جاساۋ; 5) ەلدەگى حالىقتار دوستىعىن, بەرەكە-بىرلىكتى جانە ساياسي تۇراقتىلىقتى دارىپتەۋ. 3. ايتىستى وتكىزۋدىڭ ءتارتىبى جانە شارتتارى 4. رەسپۋبليكالىق ايتىسقا وبلىستىق جانە رەسپۋبليكالىق ماڭىزى بار قالالىق ايتىستىڭ جەڭىمپازدارى – 1 ۇمىتكەردەن قاتىسادى. 5. ايتىستىڭ ۇيىمداستىرۋ كوميتەتىنىڭ شەشىمىمەن ايتىسقا باسقا اقىندار دا قاتىسا الادى. 6. ايتىسقا حالقىمىزدىڭ ءتىلىن, ءداستۇرىن, تاريحىن جانە ادەبيەتىن تەرەڭ بىلەتىن سۋىرىپ-سالما اقىندار قاتىسادى. 7. ايتىسقا قاتىسۋشى اقىنداردىڭ جاس مولشەرىنە, ۇلتىنا جانە جىنىسىنا شەكتەۋ قويىلمايدى. 8. ايتىستا ەلدىڭ بىرلىگىنە, ۇلتارالىق تاتۋلىققا نۇقسان كەلتىرەتىن, كونستيتۋتسيالىق قۇرىلىمعا قارسى ايتىلاتىن ءسوزدەرگە جول بەرىلمەيدى. 9. وسى قاعيدانىڭ 8-تارماعىندا كوزدەلگەن ارەكەتكە جول بەرىلگەن جاعدايدا اقىن ايتىستان شەتتەتىلەدى. 10. اقىندار قازىلار القاسىنىڭ شەشىمىنە جانە وسى قاعيدانىڭ تالاپتارىنا باعىنۋى ءتيىس. 11. ايتىسقا قاتىسۋ ءۇشىن وبلىستاردىڭ, استانا مەن الماتى قالالارىنىڭ مادەنيەت باسقارمالارىنىڭ, قوعامدىق بىرلەستىكتەردىڭ جانە باسقا دا زاڭدى تۇلعالاردىڭ ۇسىنىسى بولۋى قاجەت. 12. ايتىسقا قاتىسۋشى اقىندار ۇيىمداستىرۋ كوميتەتىنە ءوتىنىش بەرەدى. وتىنىشكە مىناداي قۇجاتتاردى قوسا ۇسىنىلادى: 1) ءومىربايانى تۋرالى ماعلۇماتتار /تۋعان جەرى, كۇنى, ايى, جىلى, ۇلتى/; 2) جۇمىس نەمەسە وقۋ ورنىنان انىقتاما; 3) تۋى تۋرالى نەمەسە جەكە كۋالىك كوشىرمەسى; 4) باسقا ايتىستاردا جەتكەن جەتىستىكتەرىن كۋالاندىراتىن قۇجات (ديپلوم جانە ماراپات قاعازدارى); 5) ءتيىستى مەكەمەنىڭ ۇسىنىس حاتى; 6) بايلانىس تەلەفوندارى. 13. وتكىزىلگەن قۇجاتتار قايتارىلۋعا جاتپايدى. 14. اقىندار جەرەبە تارتۋ ءادىسى ارقىلى جۇپتارعا ءبولىنىپ ايتىسادى. 15. اقىنداردىڭ ءسوز سايىستىرۋ (ايتىسۋ) ۋاقىتىنىڭ ۇزاقتىعىن قازىلار القاسى بەلگىلەيدى. 16. اقىننىڭ بايقاۋدان ءوز ەركىمەن شىعۋىنا قۇقىعى بار. 17. جەڭىمپازدار مىناداي باس جۇلدە, ءى, ءىى, ءىىى ورىندار بويىنشا ماراپاتتالادى. 1) گران-پري 1 /بىرەۋ/ 2) I ورىن – 1 /بىرەۋ/ 3) II ورىن – 1 /بىرەۋ/ 4) III ورىن – 1 /بىرەۋ/. جەڭىمپازدارعا باسقا دا ىنتالاندىرۋ سىيلىقتارى تاعايىندالۋى مۇمكىن. 18. ايتىسقا قاتىسۋ جونىندەگى ءوتىنىشتەر ايتىستىڭ باستالۋىنا 20 كۇن قالعانعا دەيىن مىنا مەكەن-جايدا قابىلدانادى: 010000, قازاقستان, استانا قالاسى, ەسىل اۋدانى, تۇركىستان كوشەسى 8 ءۇي, «وليمپ پالاس» ت/ك, كج-18, 8 كىرەبەرىس, بلوك «L», E-mail: info@ruhdk.kz, تەل: 8(7172) 54-64-77, Web: http://ruhdk.kz.. 19. اقىندار ايتىسقا قاتىسۋعا ءوتىنىشتەرى نەگىزىندە شاقىرىلادى. اقىندارعا قاتىسۋشىلار تىزىمىنە كىرگەنى تۋرالى حابار قاجەتتى قۇجاتتار تولىعىمەن تاپسىرىلعاننان سوڭ سايىسقا 10 كۇن قالعانعا دەيىن حابارلانادى. 20. اقىنداردىڭ ايتىسقا بارىپ-قايتۋ جول شىعىندارىن جولداما بەرگەن, ال ولاردىڭ جاتىن ورنى مەن تاماقتانۋىن ايتىستى وتكىزەتىن جاق كوتەرەدى. ايتىسقا قاتىسۋشى اقىنعا قوسا ەرە كەلگەن ادامداردىڭ بارلىق شىعىندارى ءوز تاراپتارىنان وتەلەدى. 21. كەلەسى كەزەڭگە وتپەگەن اقىن نەمەسە ايتىسقا قاتىسۋدان باس تارتقان اقىندار ايتىستىڭ اياعىنا دەيىن كورەرمەن رەتىندە قالۋعا نيەت بىلدىرگەن جاعدايدا ءوز قاراجاتى ەسەبىنەن كۇنەلتەدى. 22. ايتىستى رەسپۋبليكالىق تەلەارنالاردان كورسەتۋ قۇقىعىن قازاقستان رەسپۋبليكاسىنىڭ مادەنيەت مينيسترلىگى انىقتايدى. 23. رەسپۋبليكالىق ايتىس رەسپۋبليكالىق تەلەارنالاردان تىكەلەي نەمەسە جازىپ الىنعان نۇسقاسىندا قىسقارتىلعان نە تولىق تۇرىندە كورسەتىلەدى. 4. ۇيىمداستىرۋ كوميتەتى 24. قازاقستان رەسپۋبليكاسىنىڭ ءمادەنيەت مينيسترلىگىنىڭ مادەنيەت كوميتەتى ايتىستى وتكىزۋ بويىنشا ۇيىمداستىرۋ كوميتەتىنىڭ قۇرامىن بەكىتەدى. 25. ۇيىمداستىرۋ كوميتەتى مەملەكەتتىك ورگاندار مەن ايتىستى وتكىزۋگە قاتىسۋشى مادەنيەت ۇيىمدارى وكىلدەرىنەن قۇرالادى. ۇيىمداستىرۋ كوميتەتىنىڭ مۇشەلەرى ءوز فۋنكتسيالارىن قوعامدىق باستامامەن جۇزەگە اسىرادى. 26. ۇيىمداستىرۋ كوميتەتى ايتىستى دايىنداۋ جانە وتكىزۋ بويىنشا باسشىلىقتى جۇزەگە اسىرادى جانە تابىس ەتىلەتىن جۇلدەلەردىڭ كولەمىن انىقتايدى. 27. ۇيىمداستىرۋ كوميتەتى ايتىستىڭ قاتىسۋشىلارىنا قوسىمشا سىياقى تولەۋسىز ايتىستى راديو جانە تەلەديدار ارقىلى تاراتۋ, دىبىس جانە بەينە تاسپاعا جازۋ جانە ونى ودان ءارى تاراتۋ قۇقىعىنا يە. سونداي-اق, ۇيىمداستىرۋ كوميتەتى باسقا تاراپتارمەن ايتىستىڭ اتالعان ماتەريالدارىن جۇزەگە اسىرۋ جونىندەگى كەلىسىم-شارتقا وتىرۋ قۇقىعىنا يە. 28. ۇيىمداستىرۋ كوميتەتى ءىس-شارانىڭ اقپاراتتىق-جارنامالىق قولداۋ تۇرلەرىن ايقىندايدى. 29. ۇيىمداستىرۋ كوميتەتى ايتىستى دايىنداۋ جانە وتكىزۋ بارىسىندا تۋىندايتىن وزگە دە ۇيىمداستىرۋ ماسەلەلەرىن شەشەدى. 30. ۇيىمداستىرۋ كوميتەتى ايتىستىڭ جوعارى ۇيىمداستىرۋشىلىق دارەجەدە وتكىزىلۋىن قاداعالايدى. 5. ايتىستىڭ قازىلار القاسى 31. اقىنداردىڭ ونەرىن باعالاۋ, سونداي-اق, قورىتىندى شىعارۋ ءۇشىن قازىلار القاسى قۇرىلادى. قازىلار القاسىنىڭ قۇرامى مەملەكەتتىك ورگانداردىڭ وكىلدەرىنەن, مادەنيەت جانە ونەردىڭ كورنەكتى قايراتكەرلەرىنەن قۇرالادى جانە قازاقستان رەسپۋبليكاسىنىڭ ءمادەنيەت مينيسترلىگىنىڭ مادەنيەت كوميتەتىمەن بەكىتىلەدى. 32. قازىلار القاسىنىڭ سانى, ءتوراعانى قوسقاندا, تاق سان بولۋى ءتيىس. 33 قازىلار القاسىنىڭ شەشىمى ءتۇپكىلىكتى جانە قايتا قاراۋعا جاتپايدى, حاتتامامەن رەسىمدەلەدى جانە بارلىق قازىلار القاسىنىڭ مۇشەلەرى قول قويادى. 34. قازىلار القاسى بەلگىلەنگەن ءجۇلدەلى ورىنداردى بەرمەۋگە نەمەسە ءۇمىتكەرلەر اراسىندا بولۋگە (باس جۇلدەنى قوسپاعاندا) قۇقىلى. 35. قازىلار القاسى باعالارىنىڭ كريتەريلەرى: 1) ورىنداۋشىلىق شەبەرلىگى (ورىنداۋشىنىڭ دەربەستىگى); 2) ساپالىق دەڭگەيى; 3) ساحنا مادەنيەتى; 4) ادەبي ءتىل بايلىعى; 5) تاقىرىپتى دۇرىس اشا ءبىلۋى; 6) قارسىلاسقا جاۋاپ بەرۋ شەبەرلىگى; 7) ءداستۇرلى ايتىس ماقامىن ۇيلەستىرە قولدانا ءبىلۋ; 8) قازىرگى تاڭداعى وزەكتى ماسەلەلەردى كوتەرە ءبىلۋ; 9) تاقىرىپتان اۋىتقىماي, ۇيقاستىرا جەتكىزۋ. 36. اقىنداردىڭ ونەرىن قازىلار القاسى ون بالدىق جۇيە بويىنشا باعالايدى. قازىلار القاسىنىڭ بەرگەن ۇپايلار سانىن قوسۋ ناتيجەسىندە ەڭ كوپ ۇپاي جيناعان اقىن جەڭدى دەپ سانالادى. جەڭگەن اقىن كەلەسى اينالىمعا وتەدى. جەڭىلگەن اقىن ايتىستى جالعاستىرۋ قۇقىعىنان ايىرىلادى. 37. ەگەر جۇپتاسىپ ايتىسقان ەكى اقىننىڭ دا جيناعان ۇپايلارى تەڭ بولعان جاعدايدا, قازىلار القاسىنىڭ توراعاسى ەكى ادامنىڭ اتىنان داۋىس بەرۋ قۇقىعىن پايدالانادى. 38. قازىلار القاسى قازىلار القاسىنىڭ بارلىق مۇشەلەرى كەلىسكەن جاعدايدا ايتىستى قىسقارتۋ جانە/نەمەسە توقتاتۋ تۋرالى شەشىمدى قابىلداۋعا قۇقىلى. 6. ايتىستى قارجىلاندىرۋ 39. ايتىستى دايىنداۋ مەن وتكىزۋدى قارجىلاندىرۋ رەسپۋبليكالىق بيۋدجەتپەن كوزدەلگەن قاراجات شەگىندە جۇزەگە اسىرىلادى. 40. ايتىستى وتكىزۋگە كوزدەلگەن اقشالاي قاراجات ۇيىمداستىرۋ كوميتەتىنىڭ شەشىمى بويىنشا بەكىتىلگەن سمەتالىق شىعىستارمەن قاتاڭ ءسايكەستىكتە جۇمسالادى. 41. ايتىستى دايىنداۋ مەن وتكىزۋ ءۇشىن دەمەۋشىلەردىڭ جانە باسقا دا قوسىمشا قاراجات كوزدەرى جۇمىلدىرىلۋى مۇمكىن. 42. دەمەۋشىلەر ايتىسقا قاتىسۋشى اقىندارعا زاڭدا بەلگىلەنگەن تارتىپپەن ءوزىنىڭ ىنتالاندىرۋ سىيلىقتارى مەن سىياقىلارىن تاعايىنداي الادى. 7. قورىتىندى ەرەجە 43. وسى قاعيدامەن رەتتەلمەگەن بارلىق ماسەلەلەر قازاقستان رەسپۋبليكاسىنىڭ قولدانىستاعى زاڭناماسىنا سايكەس شەشىلەدى.
