وتكەن جىلى ەلىمىزدەگى ونەر ادامدارىنىڭ ومىرىنە ءمان, شىعارماشىلىعىنا شابىت سىيلايتىن جاڭا سىيلىق, جاڭا سالتانات دۇنيەگە كەلىپ ەدى. حالىقارالىق تەاتر كۇنىنە وراي, الماتىدا تەاتر قايراتكەرلەرى وداعىنىڭ «ەڭلىكگۇل» سىيلىعى كەزەكتى يەلەرىن تاپتى.
بيىل دا «ەڭلىكگۇل» سىيلىعىن تاپسىرۋ سالتاناتى قازاق مەملەكەتتىك م.اۋەزوۆ اتىنداعى اكادەميالىق دراما تەاترىندا ءوتتى. الداعى جىلدارى اتالمىش مەرەكە وزگە تەاترلارعا اۋىسىپ, جالعاسىن تابادى دەگەن يگى ءۇمىت بار.
وتكەن جىلى تەاتر قايراتكەرلەرى وداعىنىڭ توراعاسى تۇڭعىشباي جامانقۇلوۆ «ەڭلىكگۇل» «وسكار» سىندى دۇرىلدەمەسە دە, ۋاقىت وتە كەلە اتاۋلى سىيلىقتاردىڭ سانى دا, سالماعى دا وسەتىنىنە سەندىرگەن ەدى. جامانقۇلوۆ سوزىندە تۇردى. بيىل اتاۋلى سىيلىقتاردىڭ سانى دا, سوماسى دا وسكەن ەكەن.
– بۇل كۇن ەلىمىزدىڭ تەاترلارىندا قىزمەت ەتەتىن 3480-نەن استام قىزمەتكەرلەر ءۇشىن ۇلكەن مەرەكە. سوندىقتان, ءبىز بۇل شارانى 27 ناۋرىز – حالىقارالىق تەاتر كۇنىنە ورايلاستىرىپ وتىرمىز. ءبىزدىڭ ەندىگى ماقساتىمىز, بۇل شارانى حالىقارالىق دەڭگەيگە كوتەرۋ, – دەدى تۇڭعىشباي جامانقۇلوۆ.
سونىمەن بۇل سىيلىق ساحنا ونەرىندە قول جەتكىزگەن كاسىبي تابىستارى ءۇشىن بەرىلەدى. حالىققا مادەني-رۋحاني قىزمەت ەتىپ ءجۇرگەن بارلىق تەاترلارداعى ساحناگەرلەر اراسىنان ەڭ ۇزدىكتەرىن تاڭداپ جانە ماراپاتتاۋ «ەڭلىكگۇل» سىيلىعىنىڭ باستى ماقساتى. بۇل باستاماعا مۇرىندىق بولىپ وتىرعان تەاتر قايراتكەرلەرى وداعى وسىناۋ ماراپات ارقىلى ونەرپازدار اراسىنداعى باسەكەلەستىكتى ارتتىرىپ, تەاتر ونەرىنىڭ دامۋىنا ىقپال ەتۋدى كوزدەپ جاتقان جايى بار.
وتكەن, 2010 جىلى «ەڭلىكگۇل» سىيلىعى 4 اتالىم بويىنشا بەرىلسە, بيىل سىيلىق 7 اتالىم بويىنشا بەرىلدى.
قازىلار القاسىنىڭ ورتاق شەشىمى بويىنشا بيىل «جىل اكتەرى» اتاعىنا م.لەرمونتوۆ اتىنداعى اكادەميالىق ورىس دراما تەاترىنىڭ ءارتىسى ۆيتالي باگريانتسەۆ يە بولدى. ال 30 جىل جامبىل وبلىستىق دراما تەاترى ساحناسىندا ونەر كورسەتىپ جۇرگەن گۇلشات قىپشاقوۆا «جىل اكتريساسى» اتانسا, ءدال وسى تەاتردىڭ رەجيسسەرى قۋاندىق قاسىموۆ «جىل رەجيسسەرى» اتاعىنا يە بولدى. «جىلدىڭ وپەرالىق, بالەتتىك پارتياسى» اتالىمى بويىنشا اباي اتىنداعى وپەرا جانە بالەت تەاترىنىڭ ءسوليسى بولات ەسىمحانوۆ ماراپاتتالسا, «جىل تەاتر سۋرەتشىسى» اتاعىن اقتوبە وبلىستىق «الاقاي» تەاترىنىڭ باس سۋرەتشىسى ءاسيا قۇرمانالينا قانجىعاسىنا بايلادى. «تەاتر ونەرىن دامىتۋعا قوسقان ۇلەسى ءۇشىن» سىيلىعى قاراعاندى مۋزىكالىق كومەديا تەاترىندا 50 جىلدان استام ۋاقىت قىزمەت جاساپ ءجۇرگەن اكتەر ۆلاديمير سۋحوۆقا بەرىلدى. بيىل تۇڭعىش رەت تاعايىندالعان «قۋىرشاق تەاترىنىڭ جىل ونەرپازى» سىيلىعى ماڭعىستاۋ وبلىستىق قۋىرشاق تەاترىنىڭ اكتەرى ەرجان بەگاشەۆقا بۇيىردى.
باستى سىيلىقتاردان بولەك, «جىلدىڭ وزىق تەاترتانۋشىلىق ماقالاسى» – م.اۋەزوۆ اتىنداعى ادەبيەت جانە ونەر ينستيتۋتىنىڭ عىلىمي قىزمەتكەرى زۋحرا يسلامباەۆاعا, «جىلدىڭ وزىق تەاتر مەنەدجەرى» – وڭتۇستىك قازاقستان وبلىستىق ورىس دراما تەاترىنىڭ مەنەدجەرى مارينا بەلوۋسوۆاعا, «جىلدىڭ وزىق مۋزىكالىق كوركەمدەۋشىسى» – استانا قالالىق ق.قۋانىشباەۆ اتىنداعى مۋزىكالىق دراما تەاترىنىڭ مۋزىكالىق كوركەمدەۋشىسى امانتاي جۇماشەۆقا, «جىلدىڭ وزىق جارىق بەرۋشىسى» – م.اۋەزوۆ اتىنداعى اكادەميالىق دراما تەاترىنىڭ جارىق سۋرەتشىسى نادەجدا ليۆيناعا بۇيىردى. ت.جۇرگەنوۆ اتىنداعى ونەر اكادەمياسىنىڭ ارناۋلى سىيلىعى م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ اكتەرى اسىلبەك بورانباەۆقا بەرىلدى.
«ەڭلىكگۇل» سىيلىعىنىڭ بارلىق يەگەرلەرى, ءتىپتى وبلىستىق تەاترلاردان ۇسىنىلعان ءۇمىتكەرلەر دە ارنايى ديپلومدارمەن, سونىمەن قاتار شارانىڭ باس دەمەۋشىسى «قازمۇنايگاز» كومپانياسىنىڭ اقشالاي جانە باعالى سىيلىقتارىمەن ماراپاتتالدى.
ءازىل-قالجىڭمەن ورىلگەن كەشتە «سالتانات» بي ءانسامبلى, «ءىنجۋ-مارجان» ۆوكالدىق توبى, «اقساراي» مۋزىكالىق تەاترى ونەر كورسەتتى.
ايناش ەسالي.
الماتى.
______________
سۋرەتتەردى تۇسىرگەن نۇرعيسا ەلەۋبەكوۆ.
