بۇل كەرى كەتۋ بولماي ما؟

فۋتبولدان قازاقستان ۇلتتىق قۇراماسى 2012 جىلى وتەتىن ەۋروپا چەمپيوناتىنىڭ ىرىكتەۋ تۋرنيرىندە تاعى دا جەڭىلىس تاپتى. بۇل جولى ءبىزدىڭ قۇراما الەمنىڭ ءۇش دۇركىن چەمپيونى, ايگىلى «نەمىس ماشينەسى» دەگەن اتى بار گەرمانيا كومانداسىنا ەسە جىبەردى. ەسەپ – 4:0. وسى جەڭىلىس ءۇشىن ۇلتتىق قۇ­رامانىڭ جاڭا باپكەرى ميروسلاۆ بەرانەكتى كىنالاۋ ءالى ەرتە دەپ وي­لايمىز. ويتكەنى, بۇل – ونىڭ باس­شىلىعىنداعى قازاقستان كومان­دا­سىنىڭ وتكىزگەن ەكىنشى كەزدەسۋى. بۇل كەزدەسۋدە ءتورت دوپتىڭ ۇشەۋى ءبىرىنشى تايمدا, بىرەۋى ويىننىڭ ەكىنشى جارتىسىندا سوعىلدى. وندا ميروسلاۆ كلوزە 3 جانە 88 مينوتتە, توماس ميۋللەر ەكى رەت – 25 جانە 43 مينوتتە دوپتى داۆيد لوريا قاقپاسىندا تۋلاتتى. وسى ويىندا كلوزە 3 مينوتتە ءوزىنىڭ 10 جىلدىق سپورتتىق كارەراسىن­دا­عى 60-شى گولىن سوقسا, ميۋللەر ىرىكتەۋ تۋرنيرىندە ءوزىنىڭ جەتىنشى دوبىن سوقتى. ماتچتا نەمىستەر د. لوريا قاقپاسىنا 14 رەت سوققى جاساسا, ءبىزدىڭ قۇراما مانۋەل نويەر قاقپاسىن 3 رەت كوزدەدى. سو­نىڭ ىشىندە ءبىرىنشى سوققىنى ماتچ­تىڭ 30 مينوتىندە حيجنيچەنكو­ جاسادى. ويىندا نەمىستەر 7 رەت بۇرىشتان دوپ بەرسە, ءبىزدىڭ وي­ىنشىلار 1 رەت بۇرىشتاما بەردى. سونىمەن بىرگە, گەرمانيا 6 رەت, قازاقستان 10 رەت ءتارتىپ بۇزدى. وعان فارحاتبەك ىرىسمەتوۆتىڭ سا­رى قاعاز العانىن قوسىڭىز. وسى سا­رى قاعازدىڭ كەسىرىنەن بەلگىلەنگەن ايىپ دوپتى ميۋللەردىڭ قاقپاعا ءدال كوزدەگەنى بەلگىلى. جالپى, ماتچتا نەمىستەردىڭ ءبىز­دىڭ قۇرامانى بۇدان دا ءىرى ەسەپپەن جەڭۋگە مۇمكىندىكتەرى كوپ ەدى. قۇ­رامانىڭ قورعانىستاعى ساۋاتسىز­دىعى, جارتىلاي قورعاۋشىلاردىڭ دارمەنسىزدىگى, شابۋىلشىلاردىڭ كە­رى پاس بەرىپ ويناۋى – وسىنىڭ ءبارى الاڭ يەلەرىنە ءتورت گول سوعۋعا «جاعداي جاسادى». دەگەنمەن, وسىن­شاما گول جىبەرىپ السا دا قۇرا­ما­نىڭ قاقپاشىسىنا كىنا تاعا الماي­مىز. ول ماتچتا قولدان كەلگەنشە جاقسى ونەر كورسەتتى. سونداي-اق, ويىننىڭ ەكىنشى جارتىسىندا ازات نۇرعاليەۆتى الماستىرعان جامبىل كوكەەۆتىڭ از دا بولسا باتىلدىق تانىتىپ ويناعانىن ايتۋعا بولادى. قازىر ۇلتتىق قۇرامانىڭ وسى جەڭىلىسىنەن كەيىن كوماندانىڭ بو­لاشاعىنا قاتىستى كوپ پىكىرلەر ايتىلۋدا. سونىڭ ءبىرىن كەشە پارلامەنت ماجىلىسىندە وتكەن ۇكىمەت ساعاتىندا دەپۋتاتتار الدىندا ءسوي­لەگەن سوزىندە تۋريزم جانە سپورت ءمينيسترى تەمىرحان دوسمۇحامبەتوۆ ءبىلدىرىپتى. ءبىز مينيستر مىرزانىڭ ول جەردە ايتقان ءسوزىن ەستىگەن جوق­پىز. دەگەنمەن, ارىپتەستەرىمىزدەن ەستىپ-بىلگەنىمىزدى ايتاتىن بولساق, مىنبەردە تۇرىپ مينيستر بولاشاقتا فۋتبولدان قازاقستان قۇراماسىن قايتادان ازيا قۇرلىعىنا اۋىس­تىر­ساق دەگەن ۇسىنىسىن ورتاعا شى­عارىپتى. ويتكەنى, ونىڭ ايتۋ­ىن­شا, قازىر ەلىمىزدە فۋتبول سي­ياق­تى № 1 سپورت تۇرىنە بارىنشا كو­ڭىل ءبولى­نىپ, جاعداي جاسالىپ كەلەدى. ۇلت­تىق قۇرامانىڭ دەڭگەيىن دە جاق­سارتۋعا از قارجى ءبولىنىپ وتىر­عان جوق. بىراق, بولىنگەن قارجى ءتيىستى ءنا­تي­جەسىن بەرمەۋدە. وسىعان باي­­­لا­نىستى مينيستر قازاقستان ۇلت­­­تىق قۇراماسىنىڭ ەۋروپادان گورى, ازيا قۇرلىعىندا ونەر كورسە­تۋ­ىن قالاي­تىنىن, بۇل اڭگىمە ءتوڭى­رەگىندە ول ۇلتتىق فۋتبول فەدەرا­تسيانىڭ پرەزيدەنتى ادىلبەك جاق­سى­­بەكوۆپەن پىكىر الماسقانىن ايتىپتى. ءيا, قازاقستان فۋتبولىنىڭ دەڭ­گەيى تومەن. كەزىندە شەبەرلىگىمىز ارتادى دەپ ەۋروپانى قالادىق. ەگەر قايتا ازياعا اۋىساتىن بول­ساق, بۇل كەرى كەتۋ بولىپ شىعادى. ودان دا فۋتبولدى وركەندەتۋدىڭ جولىن ىزدەگەن ءجون بولار. قاس­قىر­دان قورىققان ادام ورمانعا بارماس! داستان كەنجالين.