بەيبىت شارا, يماندى ءىس – ەلىمىزگە ءتان

انە-مىنە دەگەنشە ءبىزدىڭ ەلىمىزگە دە كەزەك كەلدى. ءيا, جاس رەسپۋبليكا, ەگەمەندىگىن قايتارىپ العان مەملەكەت رەتىندە ءبىزدىڭ دە كوشەمىزدە بۇگىن توي بولىپ جاتىر. قاڭتاردىڭ العاشقى ون كۇندىگىندە قازاقستان 2017-2018 جىلدار كەزەڭىندە بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە وكىلەتتىكتەرىنىڭ باستالۋىنا وراي ءبىرىنشى وتىرىسىن وتكىزدى. وعان ۇدايى مۇشە بەس مەملەكەت, ءار كونتينەتتەن بارلىعى ون مەملەكەت قاتىستى. ءدال وسى تۇستا قازاقستان پرە­زيدەنتى نۇرسۇلتان نازارباەۆ بۇۇ قاۋىپسىزدىك كەڭەسىنە ساياسي ۇندەۋ جاريالادى. وندا ەلىمىزدىڭ موينىنا ارتقان جوعارى جاۋاپكەرشىلىك پەن حالىقارالىق قوعامداستىقتىڭ ءبىزدىڭ ەلىمىزگە, ونىڭ بەيبىتشىل ساياساتىنا سەنىمى ەرەكشە اتاپ ءوتىلدى. نيۋ-يوركتەگى باس كەڭسەدە كۇن تارتىبىنە وراي بىرنەشە ماسەلە قارالدى. جالپى, قاۋىپسىزدىك كەڭەسى جۇمىسىنىڭ رەتتىك ءتارتىبى, ەڭ الدىمەن, كەڭەسۋدەن تۇراتىنىن ەسكە سالايىن. ەكىنشى كەزەڭدە پىكىر­لەر سايىسىنا – دەباتتارعا, تالقى­لاۋعا كەزەك بەرىلەدى. ال ءۇشىنشى كە­زەڭدە قارار قابىلدانادى, بۇۇ قاۋىپ­سىزدىك كەڭەسىنىڭ قارارى ورىن­دالۋى كەرەك, ويتكەنى, ول حالىق­ارالىق قۇقىقتىڭ تالاپتارى بولىپ تابىلادى. تالاپتار ورىندالماسا, سانكتسيا سالىنۋى ابدەن مۇمكىن. ءتىپتى, قاتتى كەتسە, ول اۋماققا ءتارتىپ ورناتاتىن كۇش تە جىبەرىلەدى. ال ەندى سوعان قاراماي, الەمدە مۇنداي قارارلاردى ورىندامايتىن مەملەكەتتەر دە كەزدەسىپ قالادى. بىرىككەن ۇلتتار ۇيىمىنىڭ تاريحىندا مۇنداي دا وقيعالار قايتالانىپ تۇرادى. سونىمەن, ءبىزدىڭ ارنايى جۇمىس توبىمىز بار, كۇن ءتارتىبىمىز بەكىتىلگەن. ەندى سوعان سايكەس قۇرىلعان تاپسىرمالاردى ورىنداۋعا مىندەتتىمىز. العاشقى وتىرىستا وسىعان وراي ون بەس مەملەكەتتىڭ ىشىندە كەڭەسۋ ءوتتى. كەڭەسۋگە تۇسكەن باستى ماسەلە – سيريادا حيميالىق قارۋ بار ما, جوق پا, بار بولسا قانداي دارەجەدە, يليم (دايش)-مەن ەلدەگى قانتوگىستەن بولعان قاسىرەتتىڭ اۋقىمىن انىقتاۋ ەدى. مۇنىڭ سىرتىندا سوماليدەگى ازامات سوعىسى, ورتالىق افريكاداعى توزگىسىز جاعدايلار – ءبارى-ءبارى وزگە دە ماسەلەلەر قاتارىندا كۇن تارتىبىنە قويىلعان. مەن مۇنى ءۇش كەزەڭدى جۇمىس تالقىلاۋ ۇدەرىسى دەر ەدىم. بۇعان قوسا, وسى ارادا قازاق­ستاننىڭ بۇرىننان دا موينىنا العان مىندەتتەمەلەرى بار ەكەنىن, ول وڭىردەگى مەملەكەتتەرگە سەپتىگىن تيگىزۋ بولىپ تابىلاتىنىن دا قاپەرگە ىلە كەتەيىن. ول – اۋعانستانداعى احۋالدىڭ جاقسارۋىنا كومەكتەسۋ. قازىردىڭ وزىندە ءبىزدىڭ مەملەكەتىمىز اۋعاندىق 1000 ستۋدەنتكە گرانت بەردى. ولاردىڭ ءبىرازىنا مەن ءوزىم ءدارىس بەرىپ ءجۇرمىن. سول سياقتى كورشىمىز – قۋاتى باسەڭ قىرعىزستان مەملەكەتىنە دە كومەك قاجەت. بۇدان باسقا تولىپ جاتقان ءىس-شارالاردىڭ قاتارىندا حالىقارالىق ماركەتينگتىك ادىستەرگە بارۋعا ءماجبۇرمىز. ونى دا ەسكەرەيىك. ماسەلەن, بۇۇ-نىڭ اقشاسىنا بيداي ءوسىرىپ, نان ساتۋدىڭ نەسى ايىپ؟! بەيبىتشىلىك شارا, يماندى ءىس, كومەك قولىن سوزۋ – جاس قا­زاق­ستانعا ءتان قاسيەت. وسى ايدىڭ ايا­عىندا استانادا سيرياداعى سوعى­سۋشى تاراپتار باس قوسىپ كەلىسۋى كەرەك. بۇگىن وعان كۇللى الەم مەم­لەكەتتەرىنىڭ نازارى اۋىپ وتىر. ولار ىمىراعا كەلە مە, كەلمەي مە بەل­گىسىز, ويتكەنى, ولاردىڭ ىشىندە ەش­كىمگە دە باعىنبايتىن توپتار بار. بىراق, سوعىستان شارشاعان حالىق­تى بەيبىت ومىرگە تارتۋ الەم تانىعان قازاقستاننىڭ موينىندا تۇر. سيريادا بەيبىتشىلىك ورناتۋ وڭايعا تۇسپەسى انىق. تاعى ءبىر ايتارىم, ۋكرايناداعى جاعداي دا كۇن تارتىبىنەن تۇسپەي كۇيىپ تۇر. ۋكراينا باسشىسى بىزگە سەنەدى. سول سەكىلدى رەسەي مەن باتىس تا بىزگە سەنىم ارتىپ وتىر, ەندەشە, ۋكرايناعا ءبىر جاقسىلىق جاساۋ يگىلىكتى مىندەت. ارينە, مۇنداي الەمدىك شيەلەنىستى فاكتورلارعا بىركەلكى كەپىلدىك بەرۋ وڭاي دا, مۇمكىن دە ەمەس, دەگەنمەن, قازاقستان تاراپىنان مۇنىڭ بارلىعى ءۇشىن ارەكەت ەتۋ نيەتى بار. ءازىمباي عالي, ساياساتتانۋشى الماتى