وقو-دا 3D فورماتىنداعى تاقتالار دايىندالماق

شىمكەنتتەگى «تاسساي» يندۋستريالدى ايماعىندا قازاقستانداعى ەرەكشە جوبالاردىڭ ءبىرى سانالاتىن زاۋىت ىسكە قوسىلدى. «مەگا سمارت» جوباسىنىڭ اشىلۋ سالتاناتىنا وڭتۇستىك قازاقستان وبلىسىنىڭ اكىمى جانسەيىت تۇيمەباەۆ قاتىسىپ, زاۋىتتىڭ جۇمىس بارىسىمەن تانىستى, دەپ حابارلادى وبلىس اكىمدىگىنىڭ ءباسپاسوز قىزمەتى. ءوڭىر باسشىسى وبلىستا قۇرىلعان بارلىق يندۋستريالدى ايماقتاردا ەكونوميكاسىن ءارتاراپتاندىرۋ مەن كاسىپكەرلىكتى دامىتۋعا مەملەكەت تاراپىنان ءتيىستى جاعدايلاردىڭ جاسالعاندىعىن جەتكىزدى. «اۋماعى 89 گا قۇرايتىن «تاسساي» يندۋستريالدى ايماعىندا 24 ينۆەستيتسيالىق جوبا قولعا الىنۋدا. سولاردىڭ ءبىرى – «مەگا سمارت» جشس-نىڭ مدف جىلتىر پليتاسىن جانە جيھاز شىعاراتىن زاۋىتى. وسى جوبا بويىنشا وبلىسقا 545 ملن.تەڭگە ينۆەستيتسيا تارتىلىپ, 69 ادام تۇراقتى جۇمىسپەن قامتىلدى» – دەدى جانسەيىت قانسەيىت ۇلى. وڭتۇستىك كورەيانىڭ تەحنولوگياسىمەن جابدىقتالعان كاسىپورىن 3D فورماتىنداعى جىلتىر تاقتالاردى دايىندايدى. جىلىنا 72 مىڭ مدف پانەلدەرىن جانە 5000 دانا جيھاز شىعارادى. كەڭسەلەرگە جانە ءبىلىم بەرۋ مەكەمەلەرىنە قاجەتتى جيھازدار جاسايدى. دايىن تاۋارعا جۇمسالاتىن شيكىزاتتىڭ 94 پايىزى جەرگىلىكتى ءونىم. ونىڭ قاتارىندا ماقتا تالشىعى دا قولدانىلادى. «مەگا سمارتتىڭ» ونىمدەرىنە قازاقستاندا سۇرانىس جوعارى. جىلتىر تاقتالاردى وزبەكستان, قىرعىزستان جانە تاجىكستان ەلدەرىنە ەكسپورتتاۋعا كەلىسىمشارتتار جاسالۋدا. سونداي-اق, رەسەي ەلىمەن دە كەلىسىم بار. زاۋىتتىڭ قازىرگى تاڭدا الماتى, قىزىلوردا, قوستاناي جانە پاۆلودار قالالارىندا ارنايى وكىلدىكتەرى جۇمىس جاسايدى. الداعى ۋاقىتتا ەلىمىزدىڭ قالعان وڭىرلەرىندە دە وكىلدىكتەرىن اشۋ جوسپارلانىپ وتىر.