استاناداعى جاڭا ۆوكزال مامىر ايىندا پايدالانۋعا بەرىلەدى

ەلوردانىڭ جاڭا تەمىرجول ۆوكزالى 2017 جىلدىڭ مامىر ايىندا پايدالانۋعا بەرىلەدى. بۇل تۋرالى بۇگىن قر پرەمەر-ءمينيسترىنىڭ ءبىرىنشى ورىنباسارى اسقار ءماميننىڭ توراعالىعىمەن استانا قالاسىنىڭ جاڭا تەمىرجول ۆوكزالىنىڭ قۇرىلىسى جانە استانا ستانتسياسىنىڭ تەمىرجول تورابىن دامىتۋ ماسەلەلەرى بويىنشا وتكەن كوشپەلى كەڭەستە بەلگىلى بولدى, دەپ حابارلايدى primeminister.kz. اتالعان جوبالاردى ىسكە اسىرۋ بارىسى جايلى «قازاقستان تەمىر جولى» ۇك» اق باسشىسى ق. الپىسباەۆ باياندادى. ول قازىرگى تاڭدا استانانىڭ ۆوكزال كەشەنىنىڭ جانە تەمىرجول تورابىنىڭ ازىرلىگى 80% قۇرايتىنىن مالىمدەدى. ونىڭ ايتۋىنشا, ۆوكزالدىڭ كارنيزدەرىن قاپتاۋ جۇمىستارى, ۆوكزالدىڭ جىلىتىلمايتىن بولىگىنىڭ قاسبەتتەرىن ارلەۋ, اۋا الماستىرۋ جۇيەسىن مونتاجداۋ, سىرتقى ەلەكترمەن قامتۋ جۇمىستارى 90% اياقتالعان. 2017 جىلدىڭ 1 مامىرىنا قاراي ۆوكزال عيماراتىنداعى ليفتتەر مەن ەسكالاتورلاردى مونتاجداۋ, ىسكە قوسۋ جانە جوندەۋ, توڭىرەكتى اباتتاندىرۋ جانە كوگالداندىرۋ, سونىمەن قاتار ارلەۋ جۇمىستارىن اياقتاۋ جوسپارلانعان. ەلوردانىڭ جاڭا تەمىرجول ۆوكزالى اۋماعىنداعى ينجەنەرلىك كوممۋنيكاتسيالار مەن جول قۇرىلىسى جۇمىستارىنىڭ بارىسى تۋرالى استانا قالاسى اكىمىنىڭ ورىنباسارى ق. ايتمۇحامەتوۆ ەسەپ بەردى. سونداي-اق, مەردىگەر ۇيىمداردىڭ باسشىلارىنىڭ قۇرىلىس-مونتاجداۋ جۇمىستارىن اتقارۋ, جاڭا تەمىرجول ۆوكزالىن پايدالانۋعا بەرۋ قىزمەتىنىڭ جۇمىستارى تۋرالى ەسەپتەرى تىڭدالدى. اتالعان نىسان قۇرىلىسىندا شامامەن 1 150 ادام جۇمىس ىستەيدى. استانانىڭ جاڭا تەمىرجول ۆوكزالى تاۋلىگىنە 35 مىڭ جولاۋشى وتكىزەدى دەپ جوسپارلانۋدا.