ەكسپو ينۆەستورلار تارتۋعا جاعداي جاسايدى - يسەكەشەۆ

ەكسپو-2017 كورمەسىنە دايىندالۋ ەلوردانىڭ 2020 جىلعا دەيىنگى دامۋ باعدارلاماسىنىڭ نەگىزگى كەزەڭدەرىنىڭ ءبىرى بولىپ تابىلادى. اتالعان كورمە استاناعا ءوز مۇمكىندىكتەرىن الەمگە كورسەتۋگە, جاڭا ايماقتىق تۋريستىك جانە ىسكەر ورتالىق رەتىندە ينۆەستورلاردى تارتۋعا جاعداي جاسايدى. بۇل تۋرالى استانا قالاسى اكىمدىگىندە وتكەن جينالىستا اسەت يسەكەشەۆ مالىمدەدى. قالا اكىمدىگى «استانا ەكسپو-2017» كومپانياسىمەن بىرلەسە كورمەگە دايىندىق جونىندەگى شتاب قۇرعان بولاتىن. قازىرگى تاڭدا كورمەنىڭ 16 مىڭ قوناعىن جايعاستىرۋ مىندەتى اكىمدىككە جۇكتەلىپ وتىر. قازىر استانا اۋماعىندا 12 482 ورىنعا ارنالعان 164 قوناق ءۇي جۇمىس ىستەيدى. بيىل تاعى 2829 ورىندىق 23 قوناق ءۇي نىسانى قولدانىسقا بەرىلمەك. سونداي-اق قالادا 664 كەلۋشىگە ارنالعان 25 حوستەل جۇمىس ىستەيدى. 2017 جىلدىڭ مامىر ايىنا دەيىن قوناق ۇيلەر مەن حوستەلدەردە 15 975 ورىن دايىندالادى. قوسىمشا جاتىن ورىن رەتىندە جوو-لار مەن كوللەدجدەردىڭ جاتاقحانالارىن جانە جالعا بەرىلەتىن پاتەرلەردى پايدالانۋ جوسپارلانىپ وتىر. 7345 ورىنعا ارنالعان 17 جاتاقحانا (18 جوو) ەرىكتىلەر, جۇمىس ساپارىمەن كەلگەن قىزمەتكەرلەر سىندى ەكسپو مەيماندارىن قابىلداۋعا ءازىر. 1710 ورىنعا شاقتالعان 10 كوللەدج جاتاقحاناسى دايىندالدى. ولار ەلدىڭ ءار ايماعىنان كەلگەن 40 مىڭ وقۋشىنى 3 كۇنگە قابىلداي الادى. 2017 جىلدىڭ مامىر ايىنا دەيىن جاتاقحانالاردا 9055 ورىن دايىنداۋ كوزدەلگەن. "ينتەرنەت-رەسۋرستاردىڭ مالىمدەۋىنشە, استانادا 18 مىڭ پاتەر جالعا بەرىلەدى. ونىڭ 3 مىڭى تاۋلىككە جالعا بەرىلۋدە, مۇندا دا 10 مىڭعا جۋىق ادام قابىلداۋ مۇمكىندىگى قاراستىرىلعان. ەكسپو-نى وتكىزۋ بارىسىندا ۇيىمداستىرىلاتىن شارالاردىڭ كۇنتىزبەلىك جوسپارى ازىرلەندى. كورمەگە تۋريستەردى كوپتەپ تارتۋ ءۇشىن ول شارالار ەلمەن قاتار شەتەلدە دە تانىستىرىلىپ, ناسيحاتتالادى", دەپ جازدى استانا قالاسى اكىمدىگىنىڭ سايتى.