قىتاي بيلىگى لەگيونەرلەر ساتىپ الاتىن فۋتبول كلۋبتارىن قاتاڭ جازالاماق

قىتاي بيلىگى شەتەلدەن لەگويونەرلەر ساتىپ الاتىن فۋتبول كلۋبتارىن قاتاڭ جازالاماق, دەپ حابارلايدى قازاقپارات. قىتايدىڭ sports.sohu.com سايتىنىڭ جازۋىنا قاراعاندا ەندى جەرگىلىكتى سپورت جانە دەنە شىنىقتىرۋ باسقارماسى فۋتبول كلۋبتارىنىڭ ترانسفەرلىك شىعىنىنا جانە لەگيونەرلەردىڭ جالاقىسىنا شەكتەۋ قويىپ, ولاردىڭ ورىنىنا ءوز ەلدەرىنىڭ سپورتشىلارىن تارتپاق. اتالعان سايتتا «ءبىز فۋتبولشىلاردى وتە قىمبات باعاعا ساتىپ العۋعا شەكتەۋ قويامىز. الداعى ۋاقىتتا بۇنداي باسسىزدىق بولمايدى. قىتايدىڭ فۋتبول كلۋبتارىندا ءوز ورەندەرىمىز ويناۋى ءتيىس. شەتەلدەن وتە قوماقتى قارجىعا لەگيونەر شاقىرعانشا ءوزىمىزدىڭ 21-23 جاس ارالىعىنداعى جاستارىمىزدى ويىنعا تارتۋىمىز كەرەك. وزگە ەلدىڭ فۋتبولشىلارىن ساتىپ الاتىن اقشانى ءوز باركەرلەرىمىزدىڭ بىلىكتىلىگىن ارتتىرۋعا جۇمسايمىز», - دەپ جازعان قىتاي بيلىگى. ەستەرىڭىزگە سالا كەتەيىك, جاقىندا قىتايدىڭ سۋپەرليگاسىنا شىققان «تيانتسزين تسيۋانتسزيان» كلۋبى يسپانيالىق شابۋىلشى ديەگو كوستا ءۇشىن «چەلسيگە» ۇسىنىس جاساعان بولاتىن. ەگەر ۇسىنىس قابىلدانعان جاعدايدا قىتاي كلۋبى وعان 80 ميلليون ەۋرو تولەۋگە دايىن ەكەندىگىن جەتكىزگەن. ايتا كەتەيىك, «تيانتسزين تسيۋانتسزيان» كومانداسىن ايگىلى يتاليان قورعاۋشىسى فابيو كانناۆارو جاتتىقتىرادى. بۇگىندە قىتايدا حالك, وسكار, ەسەكەل لاۆەسسي, راميرەس, دجەكسون مارتينەس, جەرۆينو جانە باسقا دا تانىمال فۋتبولشىلار دوپ تەبەدى.