تاشكەنت پەن سامارقاند جولى قازاقستان جەرى ارقىلى جالعانادى

قازاقستان مەن وزبەكستان م-39 اۆتوكولىك جولىن قايتا اشاتىن بولدى, بۇل تاشكەنت پەن سامارقاند اراسىنداعى جولدى قىسقارتۋعا مۇمكىندىك بەرەدى. 2017 جىلدىڭ 6 قاڭتارى كۇنى قازاقستان رەسپۋبليكاسىنىڭ وزبەكستانداعى توتەنشە جانە وكىلەتتى ەلشىسى ەرىك وتەمباەۆ, قازاقستان ينۆەستيتسيالار جانە دامۋ ۆيتسە-ءمينيسترى رومان سكليار, وڭتۇستىك قازاقستان وبلىسىنىڭ اكىمى جانسەيىت تۇيمەباەۆ پەن وزبەكستان سىرتقى ىستەر مينيسترلىگىنىڭ ايرىقشا تاپسىرمالار جونىندەگى ەلشىسى يلحوم نەماتوۆ اراسىندا  وڭتۇستىك قازاقستان وبلىسى اكىمدىگىندە كەزدەسىپ, ماقتاارال اۋدانى جەرىمەن وتەتىن, جاڭارتىلعان م-39 اۆتوجولىن پايدالانۋعا بەرۋ جانە وسى ۋچاسكەدە وتكىزۋ پۋنكتىن سالۋ ماسەلەسىن تالقىلادى. اۆتوكولىك جولى وسى جىلدىڭ اقپان ايىندا جوندەلىپ بولىپ, پايدالانۋعا بەرىلەدى دەپ جوسپارلانۋدا. ەسكە سالا كەتسەك, 2006 جىلى م-39 جولى جابىلىپ, بۇل تاشكەنت پەن سامارقاندا اراسىنداعى كولىك قاتىناسىن قيىنداتقان بولاتىن. ماسەلە شەشىلگەن سوڭ تاشكەنت پەن سامارقاند اراسىنداعى جول 89 كيلومەتردەن 24,5 كيلومەترگە قىسقارادى. جولدىڭ اشىلۋى قازاقستان مەن وزبەكستان قارىم-قاتىناسىن ودان ءارى نىعايتىپ, ساۋدا مەن ءتۋريزمدى دامىتۋعا مۇمكىندىك بەرەدى. ەرىك وتەمباەۆ سونىمەن قاتار وڭتۇستىك قازاقستان وبلىسى مەن تاشكەنت اراسىنداعى بايلانىستار داميدى دەپ ۇمىتتەنەتىنىن ايتتى. شەكارالىق ايماقتا ارنايى پوست سالىنىپ, وندا سالىقتان بوساتىلعان تاۋارلار اينالىمى باقىلانادى. كەلىسسوزدەردەن كەيىن قازاقستان مەن وزبەكستان وكىلدەرى حاتتاماعا قول قويدى. تاراپتار حاتتاماعا قول قويىلۋى حالىقارالىق ەكونوميكالىق بايلانىستاردى دامىتىپ, ساۋدا اينالىمىن جاقسارتۋعا ۇلەس قوسادى دەپ سەنەتىندەرىن مالىمدەدى.