جاۋاپسىز جۇرگىزۋشىلەر قالا كوشەلەرىن تازالاۋعا كەدەرگى كەلتىرەدى

سوڭعى ايلارى ەلوردادا قار كوپ جاۋدى, كوممۋنالدىق قىزمەتتەر كۇشەيتىلگەن رەجيمدە جۇمىس ىستەۋدە. ءبىرىنشى كەزەكتە ءىرى ماگيسترالدار, ورتاشا كوشەلەر, ورامىشىلىك اۋماقتارداعى قار شىعارىلادى, تۇرعىن ۇيلەردىڭ اۋلالارى رەتكە كەلتىرىلەدى. ءتيىستى جۇمىستار بارىسىندا الەۋمەتتىك نىساندارعا باسىمدىق بەرىلەدى. بۇل تۋرالى تۇنگى رەيد كەزىندە استانا قالاسى اكىمىنىڭ ورىنباسارى قوسمان ايتمۇحامەتوۆ ءمالىم ەتتى, دەپ جازادى اكىمدىكتىڭ ءباسپاسوز قىزمەتى. شاراعا قاتىسۋشىلار ەلوردانىڭ ءۇش اۋدانىنداعى بىرنەشە كوشەنى ارالادى. جينالعان قار تاۋلىك بويى پوليگونعا جانە قار ەرىتەتىن ورىندارعا شىعارىلادى. بۇل رەتتە ارنايى تەحنيكامەن قار جيناۋعا ءۇش مينۋت ۋاقىت جۇمسالسا, پوليگونعا بارىپ-كەلۋگە ورتا ەسەپپەن ءبىر جارىم ساعات كەتەدى. كولىك قويۋ ەرەجەلەرىن بۇزىپ, اۆتوموبيلدەرىن قالدىرىپ كەتەتىن تۇرعىندار قار جيناۋعا كوپ كەدەرگى كەلتىرەدى. «جۇمىسىمىزعا كەدەرگى كەلتىرىپ تۇرعان كولىكتەر بولسا, قاردى بارىنشا جيناۋعا تىرىسامىز. جول جۇمىسكەرلەرى تاڭعى ساعات 6-دان باستاپ ىستەيدى. بىراق اپتالاپ, ايلاپ تۇراتىن دا ماشينالار بولادى. ونداي كەزدە شارالار قابىلداپ, جول پوليتسياسىن شاقىرامىز», - دەدى قوسمان ايتمۇحامەتوۆ. ونىڭ ايتۋىنشا, قازىرگى كەزدە بۇزۋشىلىقتار جاساعانى ءۇشىن ايىپپۇل سانكتسيالارى قاراستىرىلعان جاڭا اباتتاندىرۋ ەرەجەلەرى قالالىق ءماسليحاتتىڭ بەكىتۋىنە ۇسىنىلدى. «تۇراق ورىندارىنا قاتىستى ماسەلە پىسىقتالۋدا, مەملەكەتتىك-جەكە مەنشىك ارىپتەستىك اياسىندا پاركينگتەر سالىنادى. مىسالى, جەلتوقسان, اۋەزوۆ, بەيبىتشىلىك كوشەلەرىندە تۇراقتار بولماعاندىقتان ماشينالار جول بويىنا قويىلادى, بۇل دا قار جيناۋ جۇمىستارىنىڭ ساپاسىنا كەدەرگى كەلتىرەدى», - دەيدى اكىمنىڭ ورىنباسارى. سونىمەن قاتار, پيك-پەن ءوزارا ارەكەت ەتۋ ماسەلەسى دە قارالدى. ولار قىزمەت كورسەتۋگە تومەن تاريف بەلگىلەيدى. مىسالى, قالانىڭ ەسكى بولىگىندە بۇل كورسەتكىش شارشى مەترى ءۇشىن 20-25 تەڭگەنى قۇرايدى. بۇل قارجى تەحنيكا جالداپ, قار شىعارۋ ءۇشىن جەتكىلىكسىز. «نەگىزىنەن, قار قولمەن جينالادى. قازىرگى كەزدە ورامدار ىشىندە جۇرگىزىلەتىن جۇمىستاردىڭ جوسپارى ازىرلەنىپ جاتىر. قار جيناۋعا كەدەرگى كەلتىرمەس ءۇشىن تۇرعىندارعا كولىكتەرىن الىپ تاستاۋ تۋرالى حابارلانادى»,- دەدى قوسمان ايتمۇحامەتوۆ. شارا سوڭىندا قالا اكىمىنىڭ ورىنباسارى كوكتەمدە سۋ باسۋدىڭ ورىن المايتىنىنا سەندىردى – وتكەن جىلداعىداي قار تۇگەلدەي شىعارىلادى, ورامدار ىشىندەگى, سكۆەرلەر مەن پاركتەردەگى, ءتىپتى گۇلزارلارداعى قار جارتىلاي تازارتىلادى.