قالمۇحانبەت قاسىموۆ پرەمەر-مينيسترگە ەسەپ بەردى

قر پرەمەر-ءمينيسترى باقىتجان ساعىنتاەۆ قر ىشكى ىستەر ءمينيسترى قالمۇحانبەت قاسىموۆتىڭ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسترەميزم مەن تەرروريزمگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭىن ىسكە اسىرۋ بارىسى جونىندەگى ەسەبىن تىڭدادى. بۇل تۋرالى primeminister.kz سايتىندا حابارلاندى. مينيسترلىكتىڭ حالىق اراسىندا ءتۇسىندىرۋ جۇمىستارى بويىنشا قابىلداعان شارالارى, سونىمەن قاتار ازاماتتاردىڭ ۋاقىتشا كەلگەن جەرىندە تىركەۋ ماسەلەلەرى تالقىلاندى. ءمالىم بولعانداي, تۇرعىلىقتى جەرى بويىنشا تىركەۋ تالاپتارى جالپى الەمدىك تاجىريبە بولىپ تابىلادى. قازاقستاندا حالىقتى تۇرعىلىقتى جەرى مەن ۋاقىتشا ءومىر ءسۇرۋ ورنى بويىنشا ەسەپكە الۋ زاڭنامادا قاراستىرىلعان. سونىمەن قاتار, زاڭدا تۇرعىن ءۇي يەسىنەن ۇيىندە تۇراتىن ادامداردى تىركەۋمەن قامتاماسىز ەتۋ مىندەتى باستاپقىدا بولماعان. ەسكە سالا كەتەيىك, بيىلعى 7 قاڭتاردا, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسترەميزم مەن تەرروريزمگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭىنا سايكەس, تۇرعىن ءۇيدى جالعا بەرۋشىلەر مەنشىك يەسىنە تيەسىلى تۇرعىن ۇيلەردە جەكە تۇلعالارعا تىركەۋسىز ءومىر سۇرۋگە جول بەرگەنى ءۇشىن اكىمشىلىك جاۋاپكەرشىلىككە تارتىلاتىن بولادى. زاڭ قوعامدىق قاۋىپسىزدىكپەن قامتاماسىز ەتۋ مەن ەكسترەميزم مەن تەرروريزمگە قارسى ءىس-قيمىل شارالارىن كۇشەيتۋگە باعىتتالعان.