ايماقتىق قوردىڭ ديرەكتورىمەن كەزدەستى

قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا بۇۇ-نىڭ حالىقتى قونىستاندىرۋ سالاسىنداعى شىعىس ەۋروپا جانە ورتالىق ازيا ەلدەرىندەگى ايماقتىق قورىنىڭ ديرەكتورى الاننا ارميتاجبەن كەزدەستى, دەپ حابارلادى قازاقستان پرەزيدەنتىنىڭ ءباسپاسوز قىزمەتى. تاراپتار قازاقستان مەن بۇۇ قورى اراسىنداعى حالىقتى قونىستان­دىرۋ سالاسىنداعى گەندەرلىك ساياسات­تى جۇزەگە اسىرۋ جانە وڭىردەگى بەيبىت­شىلىك پەن قاۋىپسىزدىكتى نىعايتۋ ءىسىن­دەگى ايەلدەر ءرولىن كۇشەيتۋگە قاتىستى بىرقاتار وزەكتى ماسەلەنى قاراستىردى. كەزدەسۋ بارىسىندا گۇلشارا ابدىقالىقوۆا وتباسىن جوسپارلاۋ, حالىقتىڭ رەپرودۋكتيۆتىلىك تۇرعىسىنداعى دەنساۋلىعىن نىعايتۋ, تۇرمىستىق زورلىق-زومبىلىقتى جويۋ ماسەلەلەرى جونىندەگى ءوزارا ءتيىمدى ءىس-قيمىلعا توقتالىپ ءوتتى. گ.ابدىقالىقوۆا 2030 جىلعا دەيىنگى ورنىقتى دامۋ ماقساتتارىنىڭ تولىق ىسكە اسىرىلۋىن قازاقستاننىڭ قولدايتىنىن ايتتى. بۇگىنگى تاڭدا قازاقستاندا ەلدىك ءۇش باعدارلاما تابىستى جۇزەگە اسىرىلىپ, 2016-2020 جىلدارعا ارنالعان ءتورتىنشى تسيكل باعدارلاماسى ىسكە قوسىلدى. الماتىدا قازاقستاننىڭ وڭىردەگى باستى ءرولىن ايقىندايتىن وڭىرارالىق وفيس قۇرىلدى. يۋنفپا انا ءولىمىن ازايتۋ, انالار قاۋىپسىزدىگىن قامتاماسىز ەتۋ جونىندەگى زاماناۋي حالىقارالىق تەحنولوگيالاردى ەنگىزۋ, پەريناتالدىق كومەكتى ايماقتاندىرۋ جونىندەگى كەشەندى ءىس-شارالاردى جۇزەگە اسىردى. «قازاقستاننىڭ بۇۇ-مەن قارىم-قاتىناسى – سىرتقى ساياساتىمىزدىڭ باسىمدىعى بار نەگىزگى باعىتتارىنىڭ ءبىرى. رەسپۋبليكامىز ۇيىمنىڭ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە ءوزارا ءىس-قيمىل اياسىن ودان ءارى كەڭەيتۋگە نيەتتى», – دەدى گ.ابدىقالىقوۆا. مەملەكەتتىك حاتشى كەزدەسۋ سوڭىن­دا بۇۇ-نىڭ حالىقتى قو­نىس­تان­دىرۋ سالاسىنداعى شىعىس ەۋروپا جانە ورتالىق ازيا ەلدەرىندەگى اي­ماق­تىق قورىنىڭ ديرەكتورى الان­نا ارميتاجدىڭ جاڭا قىزمەتىنە تابىس تىلەپ, يۋنفپا-مەن ءتيىمدى جۇمىستىڭ جالعاسا بەرەتىنىنە سەنىم ءبىلدىردى.