ەرىكتىلەر ەڭبەگى ەلەندى

دۇنيەجۇزىلىك ەرىكتىلەر كۇنى قارساڭىندا ءدىن ىستەرى جانە ازاماتتىق قوعام مينيسترلىگى مەن قازاقستان جاستار كونگرەسى بىرلەسە وتىرىپ, «ۇزدىك ۆولەنتەر-2016» بايقاۋىنىڭ جەڭىمپازدارىن انىقتادى. ەلورداداعى ەلباسىنىڭ كىتاپحاناسىندا وتكەن شارادا مينيستر نۇرلان ەرمەكباەۆ قوعامنىڭ ۇزدىك بەلسەندى جاستارىن ماراپاتتاپ, ەرىكتىلەردىڭ ەرىك-جىگەرىن جانىدى. بايقاۋ ۇيىمداستىرۋداعى باستى ماقسات – جىل ون ەكى اي بويى سان ءتۇرلى قوعامدىق شارالاردىڭ مەرەكەلىك لەپپەن, جوعارى دەڭگەيدە وتۋىنە ۇنەمى ات سالىسىپ جۇرەتىن ەرىكتىلەر ۇيىمدارى مەن ەرىكتىلەردىڭ ارالارىنان ۇزدىكتەردى انىقتاپ, ەڭبەكتەرىن ەسكەرە وتىرىپ, وزگەلەرگە ۇلگى ەتۋ بولاتىن. ەلىمىزدىڭ ەڭ بەلسەندى ءارى ەڭ ماقتاۋلى ەرىكتىلەرىن ماراپاتتاۋ راسىمىندە ءسوز العان مينيستر نۇرلان بايۇزاق ۇلى ۆولەنتەرلىك قىزمەتتىڭ ارمان, ماقساتتاردى جۇزەگە اسىرۋعا تاپتىرماس مۇمكىندىكتەر بەرەتىنىن اتاپ ءوتتى. «ەرىكتىلىك – ادامدار الدىندا عانا ەمەس, ءوزىڭنىڭ الدىڭداعى دا ۇلكەن جاۋاپكەرشىلىك. ۆولونتەر بولۋ, تەك شىعارماشىل بولۋمەن نەمەسە بەلسەندى ءىس-ارەكەتپەن شەكتەلمەيدى. ونداي بولۋ ءۇشىن باتىل مىنەزدى ءارى سوعان لايىقتى بولۋىڭ كەرەك. شىن جۇرەكتەن جۇمىس جاسايتىن بارلىق ەرىكتىلەر – ەرىك-جىگەرى مول, شىنايى ءارى اشىق جاندار. ءبىزدىڭ قوعامداعى ءاربىر ەرىكتى اركەز قۇرمەت پەن قولداۋعا تۇرارلىق جاستار وكىلدەرى», – دەدى مينيستر. سودان كەيىن ن.ەرمەكباەۆ رەسپۋب­ليكا وڭىرلەرىنەن بايقاۋعا قاتىسقان 150-دەن استام ۇمىتكەر ىشىنەن ىرىكتەلىپ, I ورىنعا لايىق دەپ تانىلعان لاتيف پارپيەۆ پەن ارۋجان قۇرىمباەۆانى جانە «بولاشاق» ۆولەنتەرلىك ورتالىعىن باعالى سىيلىقتارمەن ماراپاتتادى. سونداي-اق, ءبىزدىڭ قوعامدا كوپ رەتتە ەرىكتىلەردىڭ ەڭبەگى ەلەۋسىزدەۋ قالىپ جاتقانىمەن, ولاردىڭ يدەولوگيالىق ۇگىت-ناسيحات جۇمىستارىنداعى قىز­مە­تىنىڭ ماڭىزى وراسان ەكەندىگىن اتاپ ءوت­كەن ءماجىلىس دەپۋتاتى باقتيار ماكەن ۇلى جەڭىمپاز جاستاردى قۇتتىق­تاپ, قۋانىشىنا ورتاقتاستى. ول ءوز ءسو­زىندە ەلىمىزدەگى ەرىكتى جاستاردىڭ وسى كۇندەردەگى قوزعالىسى قوعام نازارى­نان تىس قالماي, كەرىسىنشە, الىس اۋىلدار مەن شالعاي ەلدى مەكەندەردە دە قىزۋ قولداۋ تاۋىپ وتىرعاندىعىن تىلگە تيەك ەتتى. «اسىرەسە, مەملەكەت باسشى­سى ءبىزدىڭ جاستارىمىزعا قاراتا ايتقان ىزگى تىلەككە تولى سوزدەرى مەن ولار­دىڭ ماقسات-مىندەتتەرىن ايقىنداۋعا قاتىستى وزىق ويلارى كەيىنگى تول­قىن ءىنى-قارىنداستارىمىزدى جىگەرلەن­دىرە تۇسەتىنى ءسوزسىز. ونىڭ ۇستىنە پرە­زيدەنتىمىز جاڭا زاماننىڭ جاس بۋىندارىنا سەنىم ارتىپ, بولاشاقتارىنان زور ءۇمىت كۇتەدى. سوندىقتان دا وسى سەنىم ۇدەسىنەن شىعۋ ءۇشىن جاستارىمىز ءبىلىمدى ءارى بەلسەندى بولۋى كەرەك دەپ ىزگى نيەتىن ءبىلدىرىپ, جەڭىمپازدارعا تيەسىلى جۇلدەلەرىن تابىستادى. ايتا كەتەيىك, بۇگىنگى تاڭدا ەلىمىزدىڭ بارلىق ايماقتارىندا ەكسپو-2017 حالىقارالىق كورمەسى مەن الماتىدا وتەتىن ۋنيۆەرسياداعا ەرىكتىلەردى دايىنداۋ كلۋبتارى قىزۋ جۇمىس جۇرگىزۋدە. وسىنداي شارالاردى قولداپ, قۋاتتاۋ ماقساتىندا ۇيىمداستىرىلعان بۇل بايقاۋدىڭ جالپى جۇلدە قورى 360 مىڭ تەڭگەنى قۇرادى. نۇرلىبەك دوسىباي, «ەگەمەن قازاقستان»