500 وقۋشى فلەشموب جاسادى

ايتۋلى شارا «جۇلدىزدى 25 كۇن» اكتسياسى اياسىندا ۇيىمداستىرىلىپ, ەل تاۋەلسىزدىگىنىڭ شيرەك عاسىرلىق مەرەي­تويىنا ارنالدى. سالتاناتتى تۇردە مەملەكەتتىك ءانۇران ورىندالعاننان كەيىن ايماق باسشىسى ەرىك سۇلتانوۆ جينالعاندارعا قۇتتىقتاۋ ءسوز ارنادى. قازاقستاندىقتار ءۇشىن ۇلىق مەرەكە سانالاتىن تاۋەلسىزدىگىمىزدىڭ 25 جىلدىعى جالپىحالىقتىق دەڭگەيدە اتاپ وتىلۋدە. وسى كەزەڭ ىشىندە ەلباسىنىڭ باستاۋىمەن ەلىمىز تۇراقتى دامۋ جولىمەن كەلەدى. كوپتەگەن بيىك بەلەستەردى باعىندىردىق, دەي كەلىپ, ەرىك حامزا ۇلى « ۇلى دالا ەلى–تاۋەلسىزدىكتىڭ 25 نەگىزى» اتتى «جۇلدىزدى 25 كۇن» اكتسياسى اياسىندا تاعىلىمى مول پاتريوتتىق شارالار باستاۋ العانىن جەتكىزدى. وبلىستىڭ قۇرمەتتى ازاماتى نەللي يۆا­نوۆا, قىزىلجار اۋدانىنداعى «جاس­تار باستامالارى» ورتالىعىنىڭ دي­رەك­تورى دۋمان زىكىرين, نازارباەۆ زياتكەر­لىك مەكتەبىنىڭ ديرەكتورى نۇرعالي ەل­شى­بەكوۆ ءوز سوزدەرىنە تاۋەلسىزدىكتىڭ جارقىن تابىستارىن, ەلىمىزدىڭ ەرتەڭى – جاستار­دىڭ وقۋىنا, ءبىلىم الۋىنا, جۇمىس ىستەۋى­نە بارلىق جاعدايلار جاسالعانىن, باس­تى قۇندىلىعىمىز تاۋەلسىزدىكتىڭ قا­دىر-قاسيەتىن جەتە ۇعىنۋ, كوزدىڭ قاراشى­عىن­داي قورعاۋ باستى مىندەت ەكەنىن ارقاۋ ەتتى. شارا بارىسىندا جاستار قاۋىمىنا «تاۋەلسىزدىك قۇرداستارىنىڭ تىلەكتەرى» اتتى كىتاپ تابىس ەتىلدى. بۇل كىتاپ 25 جەلتوقسانعا دەيىن بارلىق اۋدانداردى ارالاپ, وبلىستىق مۇراجايعا جەتكىزىلەتىن بولادى. اكتسيا سونىمەن قاتار, مەرەكەلىك جيىندارعا, كەزدەسۋلەرگە, مادەني-سپورتتىق ويىندارعا جالعاساتىن بولادى. ەگەمەندىك العاننان بەرگى كەزەڭدە جەتكەن جەتىستىكتەر, ۇلتتار مەن ۇلىستار اراسىنداعى بەرىك دوستىق, بىرلىك كەڭىنەن ناسيحاتتالادى. ءومىر ەسقالي, «ەگەمەن قازاقستان» سولتۇستىك قازاقستان وبلىسى