شىمكەنتتى كوركەيتۋدە انكارانىڭ تاجىريبەسى ۇسىنىلدى

وڭتۇستىك قازاقستان وبلىسىنىڭ اكىمى جانسەيىت تۇيمەباەۆتىڭ توراعالىعىمەن وبلىس ورتالىعى – شىمكەنت قالاسىنىڭ الەۋمەتتىك-ەكونوميكالىق جاعدايىن دامىتۋ ماسەلەلەرىنە ارنالعان سەمينار-كەڭەس بولىپ ءوتتى. جيىنعا تۇركيا استاناسى – انكارا قالاسى مەرىنىڭ ورىنباسارى رامازان كاباساكال مەن وقو باسقارما باسشىلارى مەن ولاردىڭ ورىنباسارلارى, شىمكەنت قالاسى اكىمى ع.ءابدىراحىموۆ پەن اكىم ورىنباسارلارى جانە ءبولىم باسشىلارى قاتىستى, دەپ حابارلايدى وبلىس اكىمىنىڭ ءباسپاسوز قىزمەتى. وتىرىستا شىمكەنت شاھارىنىڭ زامان تالابىنا ساي كورىكتى بولۋى ءۇشىن الەمنىڭ الدىڭعى قاتارلى قالالارىمەن تاجىريبە الماسۋ ماڭىزدى ەكەندىگىنە توقتالعان ءوڭىر باسشىسى ر.كاباساكالدى وسى سەمينارعا ءوز تاجىريبەسىمەن ءبولىسۋ ءۇشىن ارنايى شاقىرعانىن ايتتى. ۇزاق جىلدار انكارانىڭ مەرياسىندا قىزمەت اتقارعان تاجىريبەسى مول قوناق تۇركيا استاناسىنىڭ كەمەلدەنگەن كەزەڭى جونىندە سەمينارعا قاتىسۋشىلار الدىندا بايانداما جاسادى. ءتورت مىڭ جىلدىق تاريحى بار انادولى ەلىنىڭ استاناسى سوڭعى شيرەك عاسىردا الەمدەگى دامۋى ەرەكشە قارقىن العان قالالار قاتارىندا. انكارانىڭ  1923 جىلى 5 مىڭنان استام عانا تۇرعىنى بولسا  قازىرگى تاڭدا, ونداعى حالىق سانى 5,5 ملن.عا جەتكەنى تەكتەن-تەك ەمەس. سەميناردا انكارا مۋنيتسيپاليتەت مەرىنىڭ ورىنباسارى اتالعان قالانى الەمنىڭ وزىق شاھارلارىنىڭ قاتارىنا قوسۋداعى تاريحىن باياندادى. «قازىرگى تاڭدا انكارادا اۋماعى 210 گا بولاتىن 1027 عيماراتتان تۇراتىن الەمدەگى ەڭ ۇلكەن سوڭعى ۇلگىدەگى ديسنەيلەند سالىنىپ جاتىر. بۇل دا ءوز كەزەگىندە تۋريستەردىڭ ارتۋىنا ءوز سەپتىگىن تيگىزەرى ءسوزسىز», دەگەن قالا مەرىنىڭ ورىنباسارى شاھاردىڭ جىلىنا 10-12 ملن ءتۋريستتى قابىلداۋعا مۇمكىندىگى بار ەكەنىن العا تارتتى. وسىلايشا, انكارا مەن شىمكەنتتىڭ باۋىرلاس قالالار بولعاندىقتان ءبىر-بىرىمەن تاجىريبە الماسۋى كەرەك دەگەن ر.كاباساقال شىمكەنت قالاسىنىڭ ەكونوميكالىق جانە الەۋمەتتىك سالاسىنىڭ دامۋىنا بارىنشا كومەك قولىن سوزۋعا دايىندىعىن مالىمدەدى. جيىن بارىسىندا قوس قالانىڭ قارىم-قاتىناسىن كۇشەيتە وتىرىپ, انكارانىڭ دامۋ جوسپارىن وڭتۇستىككە دە پايدالانۋ كەرەكتىگىنە توقتالعان وبلىس اكىمى ارنايى دەلەگاتسيا قۇرامىن جاساقتاپ, تاجىريبە الماسۋ ساپارىن ۇيىمداستىرۋ قاجەتتىگىن ايتتى. شىمكەنت قالاسىن دامىتۋداعى وسىناۋ ۇسىنىستاردى وڭدى قابىلداعان قالا اكىمى ع.ءابدىراحىموۆ ءتيىستى ۇسىنىستار نەگىزىندە بىرلەسە جۇمىس ىستەۋگە دايىن ەكەنىن جەتكىزدى.