• 01 قاراشا, 2016

اي-92 ماركالى جانارماي نەگە قىمباتتادى؟

315 رەت

كورسەتىلدى

2 مين

وقۋ ءۇشىن

Egemen Qazaqstan

ەنەرگەتيكا ءمينيسترى قانات بوزىمباەۆ ۇكىمەت وتىرىسىنىڭ قورىتىندىسىنا ارنالعان ءباسپاسوز كونفەرەنتسياسىندا اي-92 ماركالى جانارمايىنىڭ قىمباتتاۋ سەبەپتەرىن ايتتى. «اي-92 ماركالى جانارماي باعاسى ءسال قىمباتتادى. بۇعان قاتىستى ءۇش ماسەلە بار. ءبىرىنشىسى – شىمكەنت مۇناي زاۋىتى قازىر كۇردەلى جوندەۋدەن وتكىزىلۋدە. ونى 12-قاراشادا سكە قوسۋ جوسپارلانعان. بۇل كۇردەلى جوندەۋ قايتا جاڭعىرتۋ اياسىندا جۇرگىزىلۋدە, سەبەبى زاۋىتتا قاجەتتى جاڭا قۇرىلعىلار ىسكە قوسىلىپ جاتىر. زاۋىت ىسكە قوسىلعان سوڭ اي-92 ماركالى جانارماي كوبىرەك شىعارىلاتىن بولادى. بۇل ونىڭ باعاسىنا ءوز اسەرىن تيگىزەدى دەگەن ويدامىن», – دەدى مينيستر. سونىمەن قاتار, ول 20 كۇن بۇرىن جانارماي شىعاراتىن پاۆلودارداعى مۇناي حيمياسى زاۋىتىندا تەحنولوگيالىق بۇزۋشىلىق ورىن العانى تۋرالى دا مالىمدەدى. تيىسىنشە, بۇل جەردە دە جوندەۋ جۇمىستارى جۇرگىزىلگەن. «زاۋىت 2-3 كۇننىڭ ىشىندە ىسكە قوسىلسا, جوعارى وكتاندى جانارماي قازىرگىدەن تومەن, ءوزىنىڭ باعاسىمەن كوبىرەك شىعارىلىپ, ەسەسىنە نارىققا دا كوبىرەك كەلەتىن بولادى. سوندا جانارماي نارىعىنداعى باعا رەتتەلەدى», – دەدى ق.بوزىمباەۆ. ءمينيستردىڭ اقپاراتىنشا, قازىرگى كەزدە ەلىمىزگە يمپورتتىق جانارماي كوپتەپ كەلىپ جاتىر. رەسەيدە جانارماي باعاسى قازاقستانعا قاراعاندا قىمباتتاۋ بولعاندىقتان, ەكى ەلدىڭ جانارماي باعاسىنىڭ نارىقتاعى ۇلەستەرى قۇبىلمالى بولىپ تۇر. كوپتەپ شىعارىلا باستاعان جاعدايدا جانارماي باعاسى ون كۇن شاماسىندا قالپىنا كەلمەك. «ال ديزەل وتىنىنا قاتىستى ايتساق, ونىڭ باعاسىنىڭ تومەندەۋى بايقالادى. اتاپ ايتقاندا, جازعى ديزەل وتىنىنىڭ باعاسى تۇسەدى, ويتكەنى قازىر وعان سۇرانىس ازايىپ جاتىر. ال قىسقى ديزەل وتىنى ەلىمىزدە وندىرىلمەيدى. ول رەسەيدەن كەلەدى. سوندىقتان ونىڭ باعالارىنا ەشقانداي رەتتەۋ جوق», – دەپ ناقتىلادى ق.بوزىمباەۆ.