«قۇنانباي» ءفيلمى حالىقارالىق كينوفەستيۆالدە جۇلدەلى بولدى

 ش.ايمانوۆ اتىنداعى «قازاقفيلم» كينوستۋدياسىندا تۇسىرىلگەن «قۇنانباي» ءفيلمى ۋفا قالاسىندا وتكەن «كۇمىس اقبوزات» اتتى ءىىى حالىقارالىق ۇلتتىق جانە ەتنيكالىق كينوفەستيۆالىندە ءامىر ابدىرازاقوۆ اتىنداعى «ۇلتتىق رۋح» جۇلدەسىمەن ماراپاتتالدى. «قۇنانباي» ءفيلمى – ۇلى ابايدىڭ اكەسى – قۇنانباي وسكەنباي ۇلىنىڭ ونەگەلى ءومىرىنىڭ ءبىر كەزەڭىن قامتيدى. كارتينانىڭ رەجيسسەرى – قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى دوسحان جولجاقسىنوۆ. «شىعارماشىلىق توپتىڭ ءفيلمدى قولعا الۋداعى باستى ماقساتى: حالقىمىزدىڭ قۇندىلىقتارىن دارىپتەۋ ارقىلى جاستاردىڭ بويىندا ۇلتتىق رۋحتى وياتۋ بولاتىن. ەندى مىنە, بۇگىندە ەڭبەگىمىز باعالانىپ جاتىر. كارتينانى تۇسىرۋگە اتسالىسقان ءتۇسىرۋ توبىن وسى جەڭىسپەن قۇتتىقتايمىن», - دەدى دوسحان جولجاقسىنوۆ. حالىقارالىق «كۇمىس اقبوزات» كينوفەستيۆالى الەم حالىقتارىنىڭ رۋحاني جانە مادەني قۇندىلىقتارىن ناسيحاتتاۋ, ۇلتتىق جانە ەتنيكالىق باعىتتاعى فيلمدەردى ءتۇسىرۋشى كينەماتوگرافيستەر شىعارماشىلىعىن دارىپتەۋ, رەسەي ايماقتارى جانە شەتەلدەرمەن مادەني قاتىناستى دامىتۋ ءۇشىن ارنايى جاسالعان. كينوفەستيۆال ۋفا قالالىق وكرۋگى اكىمدىگىنىڭ قولداۋىمەن باشقۇرتستان ۇكىمەتى مەن باشقۇرتستان رەسپۋبليكاسىنىڭ مادەنيەت مينيسترلىگى, «باشقۇرتستان» كينوستۋدياسىنىڭ  ۇيىمداستىرۋىمەن ءوتتى.