ستاتيستيكا كوميتەتىنىڭ مالىمەتىنە قاراعاندا سالالىق قۇرىلىمدا ەڭ ۇلكەن اتاۋلى جالاقى كاسىبي, عىلىمي جانە تەحنيكالىق قىزمەتتە – 326,7 مىڭ تەڭگە (ورتاشا رەسپۋبليكالىق دەڭگەيدەن 2,3 ەسەگە ارتتى), ودان كەيىنگى ورىندا كەن ءوندىرۋ ونەركاسىبى مەن كارەرلەردى قازۋشىلار – 313,2 مىڭ تەڭگە (2,2 ەسەگە ارتتى). العاشقى ۇشتىكتى قارجى جانە ساقتاندىرۋ قىزمەتىندەگىلەر تۇيىندەدى – 254,9 مىڭ تەڭگە (1,8 ەسەگە ارتتى).
ال العاشقى بەستىكتى قورىتىندىلاعاندا اقپارات جانە بايلانىس سالاسىندا – 196,3 مىڭ تەڭگە (1,4 ەسەگە ارتتى), كولىك جانە قويمالاۋ سالاسىندا – 182,0 مىڭ تەڭگە (1,3 ەسەگە ارتتى) جالاقى بەلگىلەندى.
سونىمەن بىرگە, ەلىمىزدەگى ەڭ تومەنگى اتاۋلى جالاقى اۋىل, ورمان جانە بالىق شارۋاشىلىعى قىزمەتكەرلەرىندە بەلگىلەنگەن – 89,4 مىڭ تەڭگە. بۇل رەسپۋبليكا بويىنشا ورتا كورسەتكىشتەن 36,7%-عا تومەن جانە ءبىلىم بەرۋ سالاسىندا – 87,5 مىڭ تەڭگە كولەمىندە (تيىسىنشە 38,0%-عا تومەن).
ايلىق كولەمى بويىنشا وڭىرلەر اراسىندا ءالى دە اتىراۋ وبلىسى – 279,2 مىڭ تەڭگەمەن كوش باستاپ تۇر. بۇل ورتاشا رەسپۋبليكالىق كورسەتكىشتەن شامامەن 2,0 ەسەگە ارتىق. ال ەلىمىزدە ەڭ تومەن جالاقى الاتىندار جامبىل وبلىسىندا. ونداعى جالاقى كولەمى 94,5 مىڭ تەڭگەنى قۇرايدى. بۇل ەل بويىنشا ورتاشا دەڭگەيدەن 33,1%-عا تومەن.
حالىقارالىق ستاندارتتارعا سايكەس ءبىر قىزمەتكەردىڭ ورتاشا ايلىق اتاۋلى جالاقىسى قوسىمشا اقىلاردى, ۇستەماقىلاردى, سىياقىلاردى, سونداي-اق سالىقتار مەن باسقا دا ۇستالىمداردى (تابىس سالىعى, مىندەتتى زەينەتاقى جارنالارىن) ەسەپكە الا وتىرىپ جاسالعان.
