ەلوردادا الماتىنىڭ مادەنيەت كۇندەرى وتەدى

استانادا 4-6 قاراشا ارالىعىندا وڭتۇستىك استانانىڭ مادەنيەت كۇندەرى وتەدى, دەپ حابارلايدى egemen.kz استانا اكىمدىگىنىڭ ءباسپاسوز قىزمەتىنە سىلتەمە جاساپ. 5 قاراشادا «الماتى – تاۋەلسىزدىكتىڭ التىن بەسىگى» مۋلتيمەديالىق كورمەسى جانە قالا تاريحى مۇراجايىنىڭ قورىنان ەكسپوناتتار ۇسىنىلاتىن فوتوكورمە اشىلادى.  كورمە ەكسپوزيتسياسى جەتىسۋ مەن الماتىنىڭ سول ۋاقىتتان بۇگىنگى كۇنگە دەيىنگى كەزەڭى بەينەلەنگەن بىرەگەي تاريحي فوتوسۋرەتتەردەن قۇرالعان. سونداي-اق كەلۋشىلەرگە قالا ىشىمەن 3D-تۋر ۇسىنىلادى. وندا مەگاپوليستىڭ ەڭ تانىمال مادەني نىساندارى ەنگىزىلگەن. كورمە 2016 جىلدىڭ 5 جەلتوقسانىنا دەيىن جالعاسادى. 5 جانە 6 قاراشادا ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ساحناسىندا «التىن ادام» ەپيكالىق سپەكتاكلى جانە مەرەكەلىك «كۋكلى شوۋ» سپەكتاكلى قويىلادى. شارانى ۇيىمداستىرۋشى – الماتى قالاسى مادەنيەت جانە مۇراعاتتار باسقارماسىنىڭ مەملەكەتتىك قۋىرشاق تەاترى. سونداي-اق تەاتر فويەسىندە ەكى كۇن بويى قۋىرشاقتار كورمەسى وتەتىن بولادى. 5 قاراشادا ساعات 15:00-دە ۇلتتىق كىتاپحانادا جاس اقىندار عالىم جايلىباي, مارالتاي ىبىراەۆ, قاسىمحان بەگمانوۆ, جاناربەك ءاشىمجانوۆ ەلوردا جاستارىمەن كەزدەسەدى. شارالار باعدارلاماسى 5 قاراشادا 18:00-دە قازاقستان تاۋەلسىزدىگىنىڭ 25 جىلدىعىنا ارنالعان «الماتى – تاۋەلسىزدىكتىڭ التىن بەسىگى» اتتى گالا-كونتسەرتپەن اياقتالادى.