ميسسيا ينفراقۇرىلىم الەۋەتىن باعالايدى

بۇگىن استانادا قازاقستاننىڭ يادرولىق ينفراقۇرىلىمىنا كەشەندى شولۋ جونىندەگى ميسسيا (ينير ميسسياسى – Integrated Nuclear Infrastructure Review) باستالدى. 7-قاراشاعا دەيىن جالعاساتىن شاراعا وراي ەنەرگەتيكا ءمينيسترى قانات بوزىمباەۆ اتوم ەنەرگياسى جونىندەگى حالىقارالىق اگەنتتىك وكىلدەرىمەن جانە ساراپشىلارىمەن كەزدەستى. جەتى كۇندىك جيىن قازاقستان رەسپۋبليكاسى مەن اتالعان اگەنتتىك اراسىنداعى ىنتىماقتاستىق جونىندەگى جوسپار اياسىندا ۇيىمداستىرىلعان. «الەمدىك ماڭىزى بار ينير ميسسياسى, ءبىر سوزبەن ايتقاندا, اتوم ەنەرگەتيكالىق باعدارلاماسىن ىسكە اسىرۋ ءۇشىن قاجەتتى ينفراقۇرىلىمدى كەشەندى باعالاۋ. ونىڭ نەگىزى ماقساتى اەحا-عا مۇشە مەملەكەتتىڭ اتوم ەنەرگەتيكاسى سالاسىندا ينفراقۇرىلىمىن دامىتۋعا جانە ونى جۇزەگە اسىرۋعا كومەك كورسەتۋ بولىپ تابىلادى. باعالاۋ ۇلتتىق ۇستانىم, يادرولىق قاۋىپسىزدىك, قارجىلاندىرۋ نورماتيۆتىك قۇجاتتاردى شولۋ سىندى ون توعىز ولشەم بويىنشا جۇرگىزىلەدى. ءبىز وڭىرلەردەگى نىساندارعا بارمايمىز. دەگەنمەن, قازاقستاننىڭ وسىناۋ ميسسيا قارساڭىندا ازىرلەگەن ءوزىن-ءوزى باعالاۋ ەسەبىنە نازار اۋداراتىن بولامىز», دەدى اەحا اتوم ەنەرگەتيكاسى دەپارتامەنتى يادرولىق ەنەرگەتيكا ءبولىمىنىڭ ديرەكتورى, دەلەگاتسيا باسشىسى, دوكتور دوحي حان. ال باسپاسوز ءماسليحاتىندا ەنەرگەتيكا ۆيتسە-ءمينيسترى باقىتجان جاقساليەۆ «ميسسيانىڭ پايدالى تۇستارى كوپ. ءبىز ءوزىمىزدىڭ ينفراقۇرىلىمىمىزعا شىنايى باعا جاساپ, اتوم ەنەرگەتيكالىق دامۋ جانە جۇزەگە اسىرىلىپ جاتقان يادرولىق ينفراقۇرىلىم باعدارلامالارىمىزدى تۇسىنگىمىز كەلەدى», دەدى. ال «قازاتومونەركاسىپ» ۇاك» اق يادرولىق وتىن تسيكلى جانە ءوندىرىس جونىندەگى باس ديرەكتورى باۋىرجان ىبىراەۆتىڭ ايتۋىنشا, اتوم ەنەرگياسى جونىندەگى حالىقارالىق اگەنتتىك وكىلدەرى بۇگىنگە دەيىن 21 مەملەكەتتە بولعان. ەندى, ينير ميسسياسى ءبىر اپتا ىشىندە اتوم ەنەرگەتيكاسىن دامىتۋ بولىگىندەگى قازاقستان ينفراقۇرىلىمىنىڭ جاي-كۇيىن زەرتتەيدى. ونىڭ جۇمىسىنا مينيسترلىكپەن قوسا, ۇلتتىق يادرولىق ورتالىعى, يادرولىق فيزيكا ينستيتۋتى, «سامۇرىق-قازىنا» ۇاق», «قازاتومونەركاسىپ» ۇاك», «سامۇرىق-ەنەرگو», «KEGOC» اكتسيونەرلىك قوعامدارى مەن «قازاقستاننىڭ يادرولىق قوعامى» وكىلدەرى قاتىسادى. سونداي-اق وسى كۇندەرى اەس قاۋىپسىزدىك جۇيەسى جانە قۇرىلىسىن قارجىلاندىرۋ, زاڭنامالىق-قۇقىقتىق قوردى دامىتۋ, قورشاعان ورتانى قورعاۋ, ەلەكتر جەلىلەرىنىڭ دايىندىعى, بىلىكتى كادرلاردى دايىنداۋ جانە وزگە دە ماسەلەلەر تالقىلانباق. مامانداردىڭ مالىمەتىنشە, اەحا ساراپشىلارىنىڭ وڭ شەشىمى ەلىمىزدىڭ يادرولىق-ەنەرگەتيكالىق ينفراقۇرىلىمىن دامىتۋ جانە كۇشەيتۋ جونىندەگى ۇلتتىق جوسپارىن جاڭارتۋعا مۇمكىندىك بەرەدى.