ءباسى بيىك باسەكەلەر قىزا ءتۇستى

قازىرگى كۇندەرى قىزىلورداداعى «مۇز ايدىنى» سپورت كەشەنىندە گاندبولدان ازيانىڭ تۇڭعىش كلۋبتىق چەمپيوناتى ءوتىپ جاتىر. قازاننىڭ 26-سىندا باستالعان بۇل تۋرنيرگە يران, قاتار, وزبەكستان جانە قازاقستان ەلدەرىنەن 6 كوماندا قاتىسۋدا. قۇرلىق تاريحىندا العاش رەت قولعا الىنىپ وتىرعان بۇل جارىس وسىلايشا سىر بويىنداعى باس قالادا جالاۋ جەلبىرەتتى. بۇل تەكتەن-تەك تە ەمەس. قى­زىلوردا ەلىمىزدە الماتىدان كەيىن ايەل­دەردىڭ قول دوبى سپورتى كەڭ قانات جاي­عان قالا بولىپ تابىلادى. كەزىندە ال­ماتىنىڭ «وتان-داۋلەتىمەن» باسەكەگە تۇسە الاتىن جالعىز كوماندا – «سەيحۋن-كام» داريا جاعاسىنداعى شاھاردان شىقتى. قازىر «قايسار» دەگەن ات العان سول كوماندا وسى جارىستا ونەر كورسەتۋدە. تۋرنيردە ەلىمىزدىڭ نامىسىن قازىرگى چەمپيون – الماتى قالاسىنىڭ «الما­تى», وتكەن جىلدىڭ ليدەرى – الماتى وبلىسىنىڭ «ىلە» جانە جەرگىلىكتى «قاي­سار» جاساقتارى قورعاۋدا. جارىستىڭ ءبىرىنشى كۇنى وزبەكستاننىڭ «ۋزبەچكاسى» قاتار كومانداسىن 32:22, «ىلە» يراننىڭ «سانانداجىن» 41:23, «قايسار» «الماتىنى» 23:20 ەتىپ ۇتتى. كەلەسى كۇنى «الماتى» «ۋزبەچكانى» 31:22, «ىلە»  قاتار كومانداسىن 35:19, «قايسار» «سانانداجدى» 28:24 ەسەبىمەن تىزە بۇكتىردى. وسىلايشا ازىرگە «ىلە» مەن «قايسار» ۇپاي جوعالتا قويعان جوق. تۋرنيردە كەشە ءبىر كۇندىك دەمالىس جاريالاندى. بۇگىن توپ باسىنداعى ەكى ۇجىم ءوزارا ۇشىراسادى. اتالمىش باسەكەنىڭ بەدەلى دە بيىك بولعالى تۇر. ول ءبىر جاعى بيىلعى 19 جەل­توقساندا قىزىلوردادا سورە الاتىن الەم چەمپيوناتىنىڭ ليتسەنزيالىق ءتۋرنيرى دە بولىپ تابىلادى. جارىس 1 قاراشا كۇنى مارەگە جەتەدى. لاۋرا شوڭعالوۆا   قىزىلوردا