جەكپە-جەككە ءتاستۇيىن دايىن

ەرتەڭ, 29 قازان كۇنى كەشكە كۇللى قازاق جۇرتىنىڭ نازارى وڭتۇستىك مەگاپوليستەگى «الماتى ارەنا» سپورت سارايىنا اۋعالى تۇر. بۇعان قازاقستاندىق كاسىپقوي بوكسشى قانات يسلامنىڭ وسىندا گانالىق باسەكەلەسى پاتريك اللوتەيمەن «WBA Fedelatin» بەلبەۋىن قورعاۋ جانە قۇرلىقارالىق WBO چەمپيوندىعىن الۋ ءۇشىن جەكپە-جەك وتكى­زەتىنى سەبەپ بولىپ وتىر. قانات 2012 جىلعى قىركۇيەكتە كاسىپقوي بوكسقا اۋىسقان ەدى. ول سول ۋاقىتتان بەرى اقش-تىڭ فلوريدا شتاتىنداعى پاحوكي قالاسىندا تۇرىپ, جاتتىعىپ جاتىر. ءبىزدىڭ جەرلەسىمىز 2012 جىلعى 19 جەلتوقساندا «WBA Fedecaribe» بولجامى بويىنشا ءبىرىنشى ورتا سالماقتا چەمپيون اتاندى. سول ۋاقىتتان بەرى ول 21 رەت رينگكە شىعىپ, سونىڭ بارىندە جەڭىسكە جەتتى. ونىڭ ىشىندە 18 ۇرىسىن نوكاۋتپەن اياقتادى. دەگەنمەن, قاناتتىڭ ەرتەڭگى قارسىلاسى وڭاي شاعىلاتىن جاڭعاق ەمەس. مۇنى بوكسشى بۇدان ايدان استام ۋاقىت بۇرىن, 23 قىركۇيەكتە وتكىزگەن ءباسپاسوز ءماسليحاتىندا اشىق ايتتى. ول ءوز ەلىندە وتەتىن العاشقى جەكپە-جەكتىڭ جۇگى اۋىر ەكەنىن بىردەن جەتكىزدى. – تۇڭعىش رەت ءوز ەلىمدە كەزدەسۋ وتكىزگەلى وتىرمىن. بۇل – ۇلكەن جاۋاپكەرشىلىك. قار­سىلاسىم دا وسال ەمەس. بۇل ءۇشىن ونىڭ 36 كەزدەسۋ وتكىزىپ, ونىڭ 28-ءىن نوكاۋتپەن جەڭگەنىن ايتسام دا جەتكىلىكتى. ءتىپتى نوكاۋتى سانىنىڭ ءوزى مەنىڭ بارلىق ۇرىستارىمنان كوپ. مەن الماتىدا جەرلەستەرىمنىڭ جاپپاي قولداۋىنا سۇيەنەمىن. قازىر جاتتىعۋدى IBA اكادەميا­سىندا وتكىزىپ ءجۇرمىن, – دەدى قانات يسلام سول جولى. ەسكە سالا كەتەيىك, بۇل بوكس كەشىندە قانات يسلامنان باسقا, جانقوش تۇراروۆ, رۋسلان مىرساتاەۆ, ءالي احمەتوۆ, ايدار شارىباەۆ, ايدوس ەربوسىن ۇلى جانە جانىبەك ءالىمحان ۇلى ەسىمدى جەرلەستەرىمىز شارشى الاڭعا شىعادى. بۇلاردىڭ اراسىندا جانىبەك ءبىرىنشى رەت ءوزىن كاسىپقوي رينگىندە سىناپ كورگەلى تۇر. ماماندار مەن سپورتشىنىڭ ايتۋىنشا, ءبىزدىڭ ۇكىلەپ قوساتىن ءۇمىتىمىز – قانات يسلام الداعى جەكپە-جەككە ءتاستۇيىن دايىندىقتا كەلىپ وتىر. تەك وعان ەندى ساتتىلىك سەرىك بولسىن دەپ تىلەيىك. ايدار ورىسباەۆ, «ەگەمەن قازاقستان»