قاشاعان جىل سوڭىنا دەيىن قانشا مۇناي وندىرەدى؟

جىل سوڭىنا دەيىن قاشاعاندا ءبىر ملن. توننا مۇناي وندىرىلەدى. بۇل تۋرالى بۇگىن پارلامەنت سەناتىندا تىلشىلەرگە بەرگەن سۇحباتىندا قر ەنەرگەتيكا ءمينيسترى قانات بوزىمباەۆ ءمالىم ەتتى. «قاشاعاندى ىسكە قوسۋ 23 قازانعا جوسپارلانعان ەدى. الايدا, كەن ورنىنان العاشقى ەكسپورتتىق مۇناي قازاننىڭ ءبىرىنشى جارتىسىندا جىبەرىلە باستادى. ارينە, قازىرگى كەزدە رەتكە كەلتىرۋ جۇمىستارى اتقارىلۋدا. جالپى, مۇناي تۇراقتى تۇردە قۇبىر جۇيەسىنە باعىتتالىپ جاتىر. تەحنيكالىق كەمشىلىكتەر بار, ياعني بۇنداي جاعدايلار وسىنداي ءىرى كەن ورىندارى ىسكە قوسىلعان كەزدە بولاتىنى تۇسىنىكتى. دەگەنمەن, ۇلكەن پروبلەمالاردى بايقاپ وتىرعانىمىز جوق»,- دەدى بوزىمباەۆ. ءمينيستردىڭ سوزىنە قاراعاندا, قازىرگى كەزدە قاشاعاندا 120 مىڭ توننادان استام مۇناي وندىرىلگەن. سونىمەن قاتار گاز دا «قازترانسگاز» قۇبىرلارىنا جىبەرىلدى. «قازترانسويل» اق جانە كاسپيلىك قۇبىر كونسورتسيۋمى (كقك) ارقىلى ەكسپورتتىق وپەراتسيالار ىسكە اسىرىلۋدا. «جىلدىڭ سوڭىنا دەيىن تەك قاشاعاننان ەڭ از دەگەندە ورتاشا ەسەپپەن 500 مىڭ توننا, ال ەگەر رەتكە كەلتىرۋ جۇمىستارى ويداعىداي بولسا, وندا 1 ملن. توننا مۇناي ءوندىرۋ جوسپاردا بار. جالپى, ءبىرىنشى كەزەڭدە بۇل جاقسى كورسەتكىش بولىپ سانالادى»,-دەدى ول. ەستەرىڭىزگە سالا كەتەيىك, 14 قازاندا ەنەرگەتيكا مينيسترلىگى قاشاعاننان العاشقى مۇناي پارتياسى ەكسپورتقا جىبەرىلگەنىن حابارلاعان بولاتىن. سول كەزدە كاسپيلىك قۇبىر كونسورتسيۋمى (كقك) ىسكە قوسۋ-باپتاۋ شەڭبەرىندە جۇرگىزىلگەن جۇمىستار كەزىندە قاشاعان كەن ورنىنان شامامەن 7 700 توننا ەكسپورتقا شىعارىلاتىن مۇنايدىڭ ءبىرىنشى پارتياسى جونەلتىلگەنى ايتىلدى. سونىمەن قاتار «قازترانسويل» اق قۇبىرلىق جۇيەسىنە 18 800 توننا ەكسپورتقا شىعارىلاتىن مۇنايدىڭ پارتياسى جونەلتىلدى, ال «ينتەرگاز تسەنترالنايا ازيا» اق ماگيسترالدى جۇيەسىنە 22,8 ملن تەكشە مەتر تاۋارلىق گاز بەرىلدى. 2016 جىلدىڭ 28 قىركۇيەگىندە سولتۇستىك كاسپي كونسورتسيۋمى تەڭىزدەگى جانە جەرۇستى كەشەنىندەگى جابدىقتاردى تەستىلەۋ جانە ىسكە قوسۋ-باپتاۋ جۇمىستارىنا كىرىستى. «ا» ارالىنىڭ بىرنەشە ۇڭعىمالارى اشىلدى. تەڭىز كەشەنى جابدىعىنىڭ جۇمىسىن تۇراقتاندىرعان سوڭ, مۇناي جانە گاز «بولاشاق» زاۋىتىنا كەلىپ ءتۇستى. قازىرگى ۋاقىتتا تەڭىزدەگى جانە جەرۇستى كەشەنىندەگى جابدىقتاردى ىسكە قوسۋ-باپتاۋ, باقىلاۋ-ولشەۋ اسپاپتارىن جانە تەحنولوگيالىق پروتسەستەردى باسقارۋدىڭ اۆتوماتتى جۇيەلەرىن تەستىلەۋ جالعاستىرىلۋدا. تۇراقتى جۇمىس رەجيمىنە شىعۋ ءبىرشاما ۋاقىتتى قاجەت ەتەدى.