راديكالدى اعىمداعىلار اسكەرگە قابىلدانبايدى

قورعانىس مينيسترلىگى اسكەرگە راديكالدى اعىمداعى جاستاردى قابىلداۋدى بارىنشا بولدىرماۋعا تىرىسادى, - دەپ حابارلايدى egemen.kz. بۇل تۋرالى «قازاقپارات» اگەنتتىگىنە قر قورعانىس مينيسترلىگى ايتقان. «شاقىرتۋ ناۋقانىنا دايىندالۋ كەزەڭىندە جەرگىلىكتى اسكەري باسقارۋ ورگاندارىنىڭ لاۋازىمدى ادامدارى مەرزىمدى اسكەري قىزمەتكە شاقىرىلۋعا جاتاتىن بارلىق ازاماتتارعا قاتىستى ارنايى ەسەپكە الۋ كارتوتەكالارى بويىنشا تەكسەرۋ ءۇشىن قر ۇقك مەن ىشكى ىستەردىڭ اۋماقتىق ورگاندارىنا سۇراۋلار جولادانادى. وسىلايشا, قورعانىس مينيسترلىگى اسكەري قىزمەتكە ىرىكتەۋ كەزەڭى بارىسىندا راديكالدى اعىمداعى جاستاردى قابىلداۋدى بارىنشا بولدىرماۋعا تىرىسادى»,-دەپ اتاپ وتىلگەن ۆەدومستۆو مالىمەتىندە. وسى رەتتە جولدانعان ساۋالعا كەلگەن جاۋاپتى قورىتىندىلاي كەلە, شاقىرىلۋشىنى اسكەرگە قابىلداۋ نەمەسە قابىلداماۋ تۋرالى شەشىم شىعارىلادى. اتاپ ايتقاندا, ارميالىق ورتاعا ءداستۇرلى ەمەس ءدىني اعىم يدەياسىن ۋاعىزدايتىن, ونىڭ ىشىندە ەكسترەميستىك سيپاتتاعى ادامداردىڭ كىرۋىن بولدىرماۋ ماقساتىندا  «اسكەري قىزمەت پەن اسكەري قىزمەتشىلەردىڭ مارتەبەسى تۋرالى» 2012 جىلعى 16 اقپانداعى قر زاڭىمەن اۋداندىق جانە وبلىستىق شاقىرۋ كوميسسيالارىنىڭ قۇرامىنا قر ۇلتتىق قاۋىپسىزدىك كوميتەتى اۋماقتىق ورگاندارى باسشىلارىنىڭ ورىنباسارلارى مەن ىشكى ىستەر ورگاندارىنىڭ ءتيىستى اۋماقتىق بولىمشەلەرى باسشىلارىنىڭ ورىنباسارلارى ەنگىزىلدى. ەستەرىڭىزگە سالا كەتەيىك, جاقىندا بۇقارالىق اقپارات قۇرالدارىندا اقتوبەدە راديكالدى توپتاعى جاستار اسكەر قاتارىنان جاپپاي شەتتەتىلە باستاعاندىعى حابارلانعان بولاتىن.