تۇعىردا – قۇرمانعازى مەن دينا

ەسكەرتكىشتەر – ەلدىكتىڭ بەلگىسى. رەسپۋبليكامىزدىڭ باتىس قاقپاسىنداعى حالقىمىزدىڭ  ەركىندىككە قول جەتكىزۋىن باستى ماقسات-مۇراتتارىنا اينالدىرعان  تاريحي تۇلعالارعا قويىلعان تۇعىرلار تاعى ءبىر قايتالانباس ءمۇسىن ونەرى تۋىندىسىمەن تولىقتى. بۇل – ورال قالاسىندا كۇي اتاسى قۇر­­­مانعازى مەن كۇي اناسى دينا كو­شەلەرىنىڭ قيىلىسقان جەرىندەگى دەمالىس ورنى اۋماعىنا ەكەۋىنە ورناتىلعان كومپوزيتسيالىق ەسكەرتكىش جوباسى. ەسكەرتكىش قۇرىلىسىن ىسكە اسىرعان وبلىسقا تانىمال كاسىپكەرلەردىڭ ءبىرى – ەرلان عايسين. ورال ءوڭىرى – قۇرمانعازى مەن دينا­نىڭ تاريحي وتانى, كىر جۋىپ, كىندىك كەسكەن توپىراعى. سوعان قا­را­ماستان, مۇندا ەكەۋىنە ەسكەرتكىش قوي­ىلماي كەلگەنى رۋحاني ولقىلىقتاي, تاۋەلسىز ەلىمىزگە سىنداي  كورىنۋشى ەدى. وسىنىڭ ورنى تولعانى انىق. ويتكەنى, ولار­دىڭ شىعارمالارىنا نەگىزىنەن ەلدىكتى تۋ ەتىپ كوتەرۋ, ەركىندىك پەن بوس­تاندىقتى جانە ازات ءومىردى اڭساۋ سيپاتى ءتان بولىپ كەلگەنى اتار تاڭداي, با­تار كۇندەي شىندىق. سوندىقتان ەل تاۋەلسىزدىگىنىڭ 25 جىلدىق مەرەيلى مەرەكەسى قارساڭىندا اشىلعان بۇل كوم­پوزيتسيالىق مۇسىندەر كەشەنىنىڭ بۇگىنگى ۇر­پاققا بەرەر ءتالىمى مەن تاعىلىمى مول بولماق. ەكىنشىدەن, قۇرمانعازى مەن ديناعا ەكى بولەك ەسكەرتكىش قويماي, ونى ءبىر­تۇ­تاس بولىنبەس كومپوزيتسيالىق ءمۇ­سىن تۋىندىسى رەتىندە ورناتۋ جونىندەگى الماتىلىق ءمۇسىنشى مۇ­رات مانسۇروۆتىڭ شىعارماشىلىق شە­شىمى تەك قۇپتاۋ مەن قولداۋعا لايىق­تى. ءارى ەكەۋىنىڭ بىرنەشە مارتە كەز­دەسكەنى, قۇرمانعازىنىڭ ديناعا ءوزىم­نىڭ ءىزباسارىم دەپ باتاسىن بەرگەنى, دوم­بىراسىن سىيلاعانى تاريحي دەرەكتەر­دەن جاقسى ءمالىم. بۇعان قوسا, وسى ارا­دا قازاقتىڭ كۇي ونەرى مەن ونىڭ شىعۋ تاريحىن ىندەتە زەرتتەگەن تاعى ءبىر تاريحي تۇلعا, بۇگىنگى قۇرمانعازى اتىنداعى ۇلت اسپاپتار وركەسترىن ءوز قولىمەن قۇرعان حالقىمىزدىڭ تالانتتى ۇلى احمەت جۇبانوۆ «قۇرمانعازى ايتىپتى» دەگەن تومەندەگىدەي دەرەكتى دە وقىرماندار نازارىنا بەرە كەتكەننىڭ ارتىقشىلىعى جوق. ناقتىراق ايتقاندا, قايران قۇرمان­عازى بابامىز بىلاي دەگەن ەكەن: «ەگەر مە­نىڭ وڭ قولىم مەن دينانىڭ سول قولى ءبىر ادامعا بەرىلسە, بۇل دۇنيەدە ودان اسقان ءدۇلدۇل دومبىراشى مەن كۇيشى بولماس ەدى». مىنە, بۇل تاريحي دەرەكتىڭ ءوزى دە قۇرمانعازى مەن دينانىڭ ءجيى كەزدەسكەنىنەن حابار بەرە الادى. ءارى ەكەۋى ءبىر-ءبىرىنىڭ كۇي تارتۋ مانەرىندەگى ارتىقشىلىعى مەن ولقىلىعىن جاقسى بىلگەندىگىن كورسەتەدى. تەمىر قۇسايىن, «ەگەمەن قازاقستان» باتىس قازاقستان وبلىسى سۋرەتتى تۇسىرگەن ايباتىر نۇراش