ولەڭنىڭ ەگىز ءورىمى

مۇڭلى مۋزا يەسى مۇقاعالي, جۇمباق ويلى جۇمەكەن, تەنتەك مىنەز توقاش, بىربەتكەي فاريزالاردىڭ قاتارىندا نازىك سەزىم يەسى كۇلاش احمەتوۆا دا قازاق ولەڭىندەگى ورنەگى وزگەشە اقىنعا اينالعانى انىق. اسقار تاۋداي ءابدىلدا تاجىباەۆتىڭ ءبىر كەزدەگى «كۇلاش – اقىن» دەگەن پىكىرى قازاق ولەڭىندە وزىندىك ورنى بار كورنەكتى تۇلعانى تاپ باسىپ كورە بىلگەنى بولسا كەرەك. ال ولەڭ جولدارى سىرعا دا, مۇڭعا دا تولى قايىربەك اسانوۆ تا جەكە باسىنىڭ قامىن كۇيتتەمەدى. قازاقتىڭ قاسيەتىن جىرلادى. ءالى دە جىرلاپ كەلەدى. جاقىندا تاراز تورىندە تالانتتى اقىندار, قازاقستاننىڭ ەڭبەك سىڭىرگەن قايراتكەرى قايىربەك اسانوۆ پەن مەملەكەتتىك سىي­لىقتىڭ لاۋرەاتى كۇلاش احمە­توۆانىڭ تاۋەلسىزدىكتىڭ 25 جىل­دىعىنا ارنالعان پوەزيا كەشى ءوتتى. ءبىر شاڭىراق استىندا ەرلى-زايىپتى بولىپ كۇن كەشىپ, قازاق پوەزياسىنىڭ دامۋىنا ولشەۋسىز ۇلەستەرىن قوسىپ, ولەڭ­دەگى وزگە­لەردەن وزگەشە دارا جول­دارىن سالا بىلگەن قوس اقىن قايىربەك اسانوۆ پەن كۇلاش اح­مە­توۆا بۇگىندە جەتپىس جاسقا تولىپ وتىر. جامبىل وبلىستىق قازاق دراما تەاترىندا وتكەن پوەزيا كەشىندە قوس اقىننىڭ جاس كەزى, ستۋدەنت شاعى بەينەلەنىپ, ولاردىڭ العاش تانىستىعى, ارالارىنداعى ىڭكار­لىك سەزىمدەرىنىڭ ويانعان ءساتى ادەمى سۋرەتتەلدى. – كۇلاش – اياۋلى اقىن, سۇيىكتى جار, مەيىرىمدى انا, اقىل­دى قارىنداس. ونىڭ جانىنىڭ نازىكتىگى, سىرشىلدىعى, مەيىرىم­دىلىگى ولەڭدەرىنەن دە توگىلىپ تۇ­رادى. پوەزياسى تۇنىپ تۇرعان ادامگەرشىلىك, يناباتتىلىق, كىسىلىك, پاراساتتىلىق. جىرلا­رىنان كەيدە قوجا ءحافيزدىڭ, ساعديدىڭ ءۇنى ەستىلسە, ەندى بىردە ابايمەن تىلدەسكەندەي بولاتىن كۇلاش – پەرىشتە اقىن. سول ءۇشىن ونى ءبارىمىز جاقسى كورەمىز. كۇلاشتىڭ تۋعان جەر, وسكەن ءول­كەنى جىرلاۋى اقيىق اقىن مۇقا­عاليمەن ۇندەسەدى. قازاقتا بۇل تاقىرىپتى مۇقاعالي مەن كۇلاشتان ارتىق جىرلاعان ەشكىم جوق, مەنىڭشە. ءبىزدىڭ كۇلاشتى ايالاپ, الاقانىندا ۇستاپ كەلە جاتقان قايىربەكتىڭ دە سوناۋ سىرداعى جىرشىلىق ورتانىڭ قاينارىنان شىققان تاسقىن تالانت ەكەنىن ءبارىمىز بىلەمىز. ونىڭ دا ونەرىنىڭ باعاسى بيىكتە ەكەنىن ايتا الامىز, – دەگەن مەملەكەت جانە قوعام قايراتكەرى مىرزاتاي جولداسبەكوۆ اقىندار شى­عارماشىلىعى تۋرالى ءوزىنىڭ ادە­مى دە اسەرلى وي-پىكىرلەرىمەن ءبولىستى. جامبىل وبلىسىنىڭ اكىمى كارىم كوكىرەكباەۆ اقىندار قايىربەك اسانوۆ پەن كۇلاش احمەتوۆانى 70 جاسقا تولۋ مەرەيتويىمەن ارنايى قۇتتىقتاپ, تەمىر تۇلپار سىيلادى. ورالحان ءداۋىت, «ەگەمەن قازاقستان» جامبىل وبلىسى سۋرەتتى تۇسىرگەن اقادىل رىسماحان