تۋريستەر شاحتاعا تۇسە الادى

قاراعاندىدا وقۋ-ءوندىرىس شاحتاسى تۋريستىك نىسانعا اينالماق. بۇل تۋرالى وبلىس اكىمى نۇرمۇحامبەت ابدىبەكوۆ كەن-يندۋستريالىق كوللەدجىنە ارنايى ات باسىن بۇرعاندا بەلگىلى بولدى. وقۋ ورنىنىڭ ديرەكتورى گەننادي يۆچەنكو مالىمدەگەندەي, جەراستىنداعى وقۋ-تاجىريبە شاحتاسىن مۇراجاي ەتىپ جابدىقتاۋعا ابدەن بولادى. بۇل, اسىرەسە, الداعى جىلى استانادا وتەتىن حالىقارالىق ەكسپو-2017 كورمەسىنىڭ قوناقتارىن قىزىقتىراتىن ساياحات ورنى بولۋى عاجاپ ەمەس. بۇعان وتاندىق تۋريستىك كومپانيالار دا ەلەڭدەپ وتىر. بۇل شاحتا 1979 جىلى تاۋ-كەن سالاسىنىڭ ماماندىقتارىن يگەرىپ جاتقان ستۋدەنتتەر ءۇشىن, ولاردىڭ پراكتيكالىق يكەمدەرىن جەتىلدىرۋ ماقساتىندا سالىنعان. كوللەدج باسشىلىعى شاحتانى سول قالپىندا ساقتاپ قالعانى ءوز الدىنا, ونى جەراس­تىنان كومىر ءوندىرۋشى كاسىپورىندار قازىرگى ۋاقىتتا قولدانىپ جۇرگەن جاڭا تەحنولوگيالارمەن قامتاماسىز ەتۋدىڭ دە امالىن تاپقان. ءوڭىر باسشىسى ورتالىق قوسالقى ستانسانى, سۋاعارلار مەن لاۆانى, كەن-پروحودكا كومباين- مەن كەن ارتاتىن 1پمۆ-2 ماشيناسىن ءوز كوزىمەن كورىپ, جۇمىس ىستەۋ بارىسىمەن تانىستى. وقۋ-ءوندىرىس شاحتاسىنا تۇسپەس بۇرىن, وبلىس اكىمىنە ارنايى كەنشى كيىمى بەرىلدى. كۇنى ەرتەڭ مۇراجاي شاحتاعا تۇسۋگە تىلەك بىلدىرگەن قوناقتار دا وسىلاي ارنايى جۇمىس كيىمىن كيىپ, جەتون الىپ, شاحتەر ءوتۋى ءتيىس تۇستاردىڭ بارىندە بولادى. تۋريستەرگە «جۇمىس ورنىندا» اۋقاتتاناتىن دايىن تاماقتار دا بەرىلۋى مۇمكىن. سوڭىنان ولارعا شاحتادا بولعانى تۋرالى ارنايى سەرتيفيكات بەرىلەدى. تۋريستەرگە ارناپ, كادىمگى شاحتالاردا كەنشىلەردى جەراس­تىنا تۇسىرەتىن جابدىق جاساۋ تۋرالى ۇسىنىس تا بار. كوللەدج باسشىلىعى, سونداي-اق, شاحتانى جابدىقتاۋمەن بىرگە, وسى جەردەن داڭقتى كەنشىلەرىمىزدى, ەڭبەك رەكوردتارىن دارىپتەپ, قاراعاندى كومىر باسسەينىنىڭ تاريحىن باياندايتىن شاحتەر داڭقى زالىن اشۋدى دۇرىس دەپ وتىر. ءوزى دە كەزىندە كەن ينجەنەرى بولعان ءوڭىر باسشىسى بۇل يدەيانى قۋانا قۇپتادى. ونىڭ ۇستىنە, ونداي مۇراجاي اشۋعا قاجەتتى دۇنيەلەر مەن جادىگەرلەر جەتىپ-ارتىلادى. ال وسى مۇراجاي-شاحتانى اشۋ ءۇشىن 40 ميلليون تەڭگەدەي قاراجات قاجەت. ەگەر شاحتەر ەڭبەگىن اينىتپاي سەزىنگىسى كەلەتىن تاڭسىققۇمار تۋريستەر قاراعاندىنى بەتكە الاتىن بولسا, بۇل شىعىن كوپ ۇزاماي ورنىنا كەلەدى. – بۇگىندە الەمدىك بەلسەندى دامىپ كەلە جاتقان باعىتتارىنىڭ ءبىرى – ونەركاسىپتىك تۋريزم, – دەيدى وبلىس اكىمى. – پايدالى قازبالاردىڭ قانداي جولمەن, قانداي بەينەتپەن وندىرىلەتىنىن ءوز كوزىمەن كورگىسى كەلەتىندەر بارشىلىق. سونى پايدالانىپ, تۋريستەردى تارتۋدىڭ ءبىر جولى رەتىندە وسىنداي جوبانى نەگە قولعا الماسقا؟ كەنشى ەڭبەگىن جاقىنىراق بىلگىسى كەلەتىندەردى شاحتالار جولاتپايدى. ويتكەنى, جۇمىس ىستەپ تۇرعان شاحتا مامان ەمەس ادامدار ءۇشىن قاۋىپتى. ال ءبىز قولعا الايىن دەپ وتىرعان وقۋ-ءوندىرىس شاحتاسى ءارى قاۋىپسىز, ءارى ناعىز شاحتانى, ونداعى ەڭبەكتى دالمە-ءدال قايتالايدى. پىسىقتار اۋادان اقشا جاسايتىن زاماندا بۇل ءبىر تاماشا تابىس كوزى بولايىن دەپ تۇر. جايلى دەمالىستان جالىعىپ, جۇيكەسىن قىتىقتايتىن ەرمەك ىزدەۋگە كوشكەن تۋريستەر كوبەيىپ جاتقانى راس بولسا, مۇنداي جوبا جەردە قالمايدى. الداعى جىلى قازاق ەلىن بەتكە الاتىن شەتەلدىكتەردى كەنشىلەر استاناسى قاراعاندىدا وسىنداي ءبىر قىزىق كۇتىپ تۇر... قايرات ءابىلدينوۆ, «ەگەمەن قازاقستان» قاراعاندى