ەكسپو-2017 ءتۋريزمدى دامىتۋعا جول اشادى

كەشە ەلوردادا «ەكسپو-2017 – ەلىمىزدىڭ تۋريستىك يندۋسترياسىن دامىتۋ درايۆەرى» دەگەن تاقىرىپ اياسىندا دوڭگەلەك ۇستەل ءوتتى. تۋريزم سالاسىن دامىتۋ جولدارى, وسى باعىتتا حالىقارالىق كورمەنىڭ اياسىندا اتقارىلۋعا ءتيىس شارالار تالقىلانعان جيىنعا «قازاقستان ايەلدەرى قاۋىمداستىعى» قوعامدىق بىرلەستىگى مەن «EXPO&WOMEN» حالىقارالىق ۇيىمى مۇرىندىق بولدى. استانا قالاسى اكىمدىگىنىڭ, بىرقاتار مينيسترلىكتەردىڭ, «استانا ەكسپو-2017» ۇلتتىق كومپانياسىنىڭ وكىلدەرى, قوناقۇيلەر مەن مەيرامحانالار جانە تۋريستىك وپەراتورلار قاۋىمداستىقتارىنىڭ باسشىلارى  دوڭگەلەك ۇستەل باسىندا حالىقارالىق ءتۋريزمدى دامىتۋ مۇمكىندىكتەرى, ەلوردا توڭىرەگىندە قىزىقتى تۋريستىك مارشرۋتتار قالىپتاستىرۋ, ەكسكۋرسيا جەتەكشىلەرىن دايىنداۋ, ۆولونتەرلەر ازىرلەيتىن كاسىبي ورتالىق اشۋ سىندى جۇمىستار بويىنشا ويلارىن ورتاعا سالدى. سونداي-اق, استاناداعى قوناقۇيلەردىڭ دايىندىعى, پاتەر مەن بولمەلەردى جالعا بەرۋ جالعا بەرۋ ماسەلەلەرى دە تالقىلاندى. وسى باسقوسۋدا ايتىلعانداي, كەز كەلگەن ەلدە ءتۋريزمدى دامىتۋدا ەڭ ماڭىزدىسى – سول ەلدىڭ حالقى. ياعني, ادامدارىنىڭ قوناقجاي پەيىلى, تۋريستەردى قىزىقتىرۋ شەبەرلىگى باستى ءرول وينايدى. سۇلۋ تابيعات, كورىكتى جەرلەر, تاريحي نىساندار مەن مۋزەيلەردىڭ بولۋى ودان كەيىنگى ورىندا. ءۇشىنشى ءبىر ماڭىزدى فاكتور – ينفراقۇرىلىم, ءتۋريزمدى وركەندەتۋ ىسىندە ول دا ايرىقشا ءرول وينايدى. ينۆەستيتسيالار جانە دامۋ ءمينيسترىنىڭ كەڭەسشىسى تاڭىربەرگەن بەردىوڭعاروۆتىڭ ايتۋىنشا, مينيسترلىك قازىر وسى باعىتتتار بويىنشا بەلسەندى تۇردە جۇمىس ىستەپ جاتىر. «ينۆەستيتسيالار جانە دامۋ مينيسترلىگى مەملەكەتتىك جانە جەرگىلىكتى اتقارۋشى ورگاندارمەن تىزە قوسىپ, كوپتەگەن جۇمىستاردى قولعا الۋدا. اتاپ ايتار بولساق, «استانا ەكسپو-2017» ۇلتتىق كومپانياسىمەن بىرلەسىپ, 33 تۋريستىك مارشرۋتتى قالىپتاستىردىق. حالىقارالىق كورمەگە كەلگەن تۋريستەردى وسى مارشرۋتتارمەن ارالاتۋ جوسپارلانىپ وتىر. الداعى جىلى قازاقستانعا كەلەتىن شەتەلدىك مەيمانداردىڭ قاتارى قالىڭ بولادى دەپ جوسپارلانعان. ەلىمىزدىڭ باسقا وڭىرلەرىنەن كەلەتىن قوناقتار دا از بولماۋعا ءتيىس. ولارعا لايىقتى قىزمەت كورسەتۋ ءۇشىن ەلورداعا جانە باسقا قالالارعا كولىك قاتىناستارىن جەتىلدىرۋ قاراستىرىلۋدا. استانا اۋەجايىندا جاڭادان تەرمينال سالىنىپ جاتقان تەرمينال وسى ماقساتقا ارنالعان. بۇدان بولەك, تەمىرجول ۆوكزالىنىڭ قۇرىلىسى ءجۇرىپ جاتىر. ياعني, تۋريستەردىڭ اۋە جولى عانا ەمەس, ەۋروپالىق ستاندارتتار بويىنشا سالىنعان تەمىرجول, اۆتوكولىك جولدارى ارقىلى دا ساپارلاۋىنا تولىق جاعداي جاسالۋى ءتيىس» دەدى ت.بەردىوڭعاروۆ. ينۆەستيتسيالار جانە دامۋ مينيسترلىگىنىڭ مالىمەتىنە سۇيەنسەك, الداعى جىلى استانا اۋەجايىنىڭ حالىقارالىق اۋە باعىتتارى 51-دەن 63-كە كوبەيمەك. رەيستەردىڭ سانى دا 231-دەن 350-گە جەتەدى دەپ جوسپارلانعان. تەمىرجول ۆوكزالى اي سايىن 1 ميلليون ادامدى قابىلداپ, جىل سوڭىنا دەيىن 12 ميلليون ادامعا قىزمەت كورسەتۋى كەرەك.  اۋە جانە تەمىرجول قاتىناستارىنداعى وسىنداي وزگەرىستەر بيلەت باعاسىن ارزانداتۋعا جول اشادى. ال باعانى ارزانداتۋ ىشكى ءتۋريزمنىڭ دامۋىنا دا ىقپال ەتەتىنى ءسوزسىز. دوڭگەلەك ۇستەل باسىندا ايتىلعانداي, حالىقارالىق ءتۋريزمنىڭ وركەندەۋىنە قولايلى احۋال قالىپتاستىرۋ ماقساتىندا ميگراتسيالىق جاعىنان قاۋىپ-قاتەر تۋعىزبايتىن, ىشكى جالپى ءونىمىنىڭ كولەمى قازاقستاننان جوعارى ەلدەردىڭ ازاماتتارىنا ەلىمىزدىڭ اۋماعىنا كەدەرگىسىز ەنۋگە, تۋريستىك مارشرۋتتارمەن ەمىن-ەركىن ساياحاتتاۋىنا جاعداي جاسالادى. وسى جيىن قورىتىندىسى بويىنشا, «EXPO&WOMEN» حالىقارالىق ۇيىمى مەن قازاق تەحنولوگيا جانە بيزنەس ۋنيۆەرسيتەتىنىڭ اراسىندا تۋريزم سالاسىنداعى ىنتىماقتاستىق تۋرالى مەموراندۋم جاسالدى. مەموراندۋمدا كاسىبي ۆولەنتەرلار, ەكسكۋرسيا جەتەكشىلەرىن دايىنداۋ جۇمىستارىن بىرلەسىپ اتقارۋ قاراستىرىلعان.   ارنۇر اسقار, «ەگەمەن قازاقستان»