اۋەزوۆ تەاترىندا «اقتاستاعى احيكو» سپەكتاكلى قويىلادى

الداعى دەمالىس كۇندەرى م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ەكى كۇن قاتارىنان «اقتاستاعى احيكو» دراماسىنىڭ پرەمەراسى بولادى. تەاتردىڭ جاڭا ماۋسىمىن تاعاتسىزدانا كۇتكەن ونەسۇيەر قاۋىم دارىندى اكتەر دۋلىعا اقمولدامەن سونى ءرول ارقىلى قاۋىشپاق. جاڭا قويىلىم تۋرالى بۇگىن وتكەن ءباسپاسوز ءماسليحاتىندا تەاتر ديرەكتورى ەرلان ءبىلال, تەاتردىڭ كوركەمدىك جەتەكشىسى ءاسانالى ءاشىموۆ, سپەكتاكلدىڭ قويۋشى-رەجيسسەرى اسحات ماەميروۆ, احيكو تەتسۋرو ءرولىن ورىندايتىن اكتەر  دۋلىعا اقمولدا كەڭىنەن باياندادى. «اقتاستاعى احيكو» دراماسى – تەاتردىڭ 91 ماۋسىمىنىڭ العاشقى پرەمەراسى. تەاتر بۇل جاڭا قويىلىمىن قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارناپ وتىر. «قارلاگ» – كەڭەس وداعىنداعى لاگەرلەردىڭ باس باسقارماسى گۋلاگ-تىڭ قازاقستانداعى ەڭبەكپەن تۇزەۋ لاگەرلەرىنىڭ ءبىرى بولعانى بەلگىلى. قۋعىن-سۇرگىنگە ۇشىراعان ءبىر ميلليونعا جۋىق ادام كارلاگتا نەبىر ازاپتى كۇندەردى باستان وتكەردى. ولاردىڭ اراسىندا قازاقتارمەن قاتار ورىستار, ۋكرايندار, لاتىشتار, ەستوندار,  پولياكتار, ەۆرەيلەر, نەمىستەر, جاپوندار, فرانتسۋزدار, يتاليالىقتار, تاعى دا باسقا كوپتەگەن ۇلتتار وكىلدەرى بولدى. سولاردىڭ ءبىرى - جاپوندىق احيكو تەتسۋرو.

اقتاسىن ساعىنعان احيكو

سپەكتاكلگە وسى احيكونىڭ قيلى تاعدىرى ارقاۋ بولدى. ناقتىراق ايتقاندا, كەڭەس ۇكىمەتى كەزىندە ستاليندىك قۋعىن-سۇرگىنگە ۇشىراپ, 17 جاسىندا جازىقسىزدان جازىقسىز اتاقتى قارلاگ تۇرمەسىنە ءتۇسىپ, جاستىق شاعىن ازاپتى ومىرمەن وتكىزگەن, بوساپ شىققان سوڭ, قاراعاندى ماڭىنداعى اقتاس قالاسىندا تۇراقتاپ, قونىستانىپ قالعان احيكو ەسىمدى جاپون ازاماتىنىڭ تاعدىرى كوركەم باياندالادى. كەيىن اكەسىمەن جانە باۋىرلارىمەن قاۋىشقان احيكو تەتسۋرو ءوزىنىڭ تاريحي وتانىنا بارادى, بىراق, قازاقستانعا قايتا ورالادى. قازىر احيكو اقساقال 85 جاستا. 11 نەمەرە, 5 شوبەرە ءسۇيىپ, ۇلكەن اۋلەتتىڭ باسى بولىپ وتىر. احيكو تەتسۋرونىڭ تاعدىر جولى – ستاليندىك زۇلمات جىلدارىندا قازاقستانعا قونىس اۋدارعان, ايدالىپ, جازىقسىز سوتتالىپ لاگەرلەرگە اكەلىنگەن مىڭداعان ادامداردىڭ, ءتۇرلى ۇلت وكىلدەرىنىڭ تاعدىرى. قويىلىمدا احيكونىڭ تاعدىرى ارقىلى, حح عاسىرداعى ەڭ اۋىر كەزەڭدە, ازاپ لاگەرلەرىندە وتىرىپ, ءوزىنىڭ ادامي بەينەسىن ساقتاپ قالعان رۋحى مىقتى, جاسامپاز جانداردىڭ جيىنتىق بەينەسى جاسالعان. قازاقستاننىڭ تەاتر كەڭىستىگىندە تۇڭعىش رەت كوزى ءتىرى ساياسي قۋعىن-سۇرگىن قۇربانىنىڭ تاعدىرى دەرەكتى دراماعا ارقاۋ بولىپ, ساحنادان العاش رەت كورسەتىلەدى. احيكو تەتسۋرو بەينەسى – بارلىق قازاقستاندىقتاردى ەلدىك پەن بىرلىككە, كەلىسىم مەن ىنتىماققا ۇندەيدى. قازاقستاننىڭ ەڭبەك سىڭىرگەن قايراتكەرى, رەجيسسەر اسحات ماەميروۆ ساحنالاعان بۇل قويىلىم تەاتر ۇجىمىنىڭ قازاقستان رەسپۋبليكاسىنىڭ  تاۋەلسىزدىگىنىڭ 25 جىلدىعىنا ارناعان ۇلكەن جوباسى. سپەكتاكل  پرەمەراسى 22, 23 قازاندا بولادى. ايناش ەسالي, «ەگەمەن قازاقستان».