2011 جىلدان بەرى 40 مىڭنان اسا قازاقستاندىق شاعىن نەسيە العان

قر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا پرەمەر-مينيستر باقىتجان ساعىنتاەۆتىڭ توراعالىعىمەن ءوتىپ جاتقان ۇكىمەت وتىرىسى كەزىندە «جۇمىسپەن قامتۋدىڭ جول كارتاسى-2020» باعدارلاماسى اياسىندا اۋىلدارداعى جۇمىسپەن قامتۋ بارىسى تۋرالى ەسەپ بەردى دەپ حابارلايدى پرەمەر-ءمينيستردىڭ رەسمي سايتى. ءمينيستردىڭ مالىمەتىنە سايكەس, 2011 جىلدان بەرى 41,6 مىڭ ادام شاعىن نەسيە السا, ونىڭ ىشىندە 27,2 مىڭ ادام كاسىپكەر اتانعان. شاعىن نەسيە العاندار 38,5 مىڭ قوسىمشا جۇمىس ورىندارىن اشتى. ت. دۇيسەنوۆا بيىل شاعىن نەسيەلەندىرۋ ءۇش سۇلبا بويىنشا جۇرگىزىلىپ جاتقانىن حابارلادى: - باعدارلاما قاتىسۋشىسى ءوز كاپيتالىمەن نەمەسە بار تاۋارىمەن ايماقتاردا قۇرىلعان اۋىل شارۋاشىلىعى كووپەراتيۆتەرىنە كىرەدى; - «اۋىلدا جۇمىسپەن قامتۋ» جوباسىن جۇزەگە اسىرۋ بويىنشا «نۇر وتان» پارتياسىمەن بىرىككەن جوبا. جوبا بەس وبلىستا پيلوتتىق رەجيمدە جۇزەگە اسىرىلىپ جاتىر. جوبانىڭ ماقساتى - جەكە قوسالقى شارۋاشىلىق بازاسىندا ۇساق تاۋارلى ءوندىرىستى قۇرۋ. سونداي-اق, شاعىن نەسيە سوماسى 6 ملن تەڭگەگە دەيىن ارتتىرىلعان. - كاسىپكەرلىك كارتاسىنا سايكەس, شاعىن نەسيە 3 ملن تەڭگەگە دەيىنگى كولەمدە بەرىلەدى. «وسى ماقساتتارعا بيىل 30,8 ملرد تەڭگە قاراستىرىلعان. وسى قاراجات ەسەبىنەن بيىل 9,1 مىڭ ادام شاعىن نەسيە الىپ, اۋىلدىق جەرلەردە شامامەن 12 مىڭ جۇمىس ورنىن اشادى», - دەپ اقپاراتتاندىردى مينيسترلىك باسشىسى. قر ءدسادم مالىمەتتەرىنە سايكەس, بۇگىندە 6,4 مىڭنان استام ادامعا شاعىن نەسيە بەرىلگەن, ونىڭ ىشىندە شامامەن 4 مىڭ ادام العاش رەت ءوز ءىسىن اشقان. نەسيە العانداردىڭ بارلىعىنىڭ ىشىنەن 5 مىڭنان استامى ءوزىن-ءوزى جۇمىسپەن قامتىعاندار, قالعاندارى – جۇمىسسىزدار. «شاعىن نەسيە العان ازاماتتاردىڭ ىشىنەن 89%-ى نەسيەنى اۋىل شارۋاشىلىعى سالاسىنا, 6% - قىزمەت كورسەتۋ سالاسىنا, 3% - ءونىمدى قايتا وڭدەۋگە, 2 % - باسقا دا سالالارعا پايدالانعان», - دەدى ت. دۇيسەنوۆا.