سۋ تارتىلماعان 2294 اۋىلدىڭ ارقايسىسىندا 500-دەي ادام تۇرادى - بيشىمباەۆ

ەلدى مەكەندەردى سۋمەن قامتۋ ماسەلەلەرىنە ارنالعان ۇكىمەت وتىرىسىندا ۇلتتىق ەكونوميكا ءمينيسترى قۋاندىق بيشىمباەۆ ەلدى مەكەندەردى سۋمەن قامتۋ ىسىندە بىرقاتار تۇيتكىلدەر بار ەكەنىن ايتتى. ءبىرىنشى – وبلىس ورتالىقتارى مەن ءىرى قالالاردى (قەم) سۋمەن قامتاماسىز ەتۋ. «اق بۇلاق» باعدارلاماسىن ىسكە اسىرۋ شەڭبەرىندە سۋمەن جابدىقتاۋ جانە سۋ بۇرۋ جەلىلەرى زەرتتەلدى, 53 قالا بويىنشا ينۆەستيتسيالىق نەگىزدەمەنىڭ باعدارلاماسى ازىرلەندى. ناتيجەسىندە, سەكتوردىڭ جالپى ينۆەستيتسيالىق قاجەتتىلىگى 1,97 ترلن. تەڭگەنى قۇرايتىنى بەلگىلى بولدى, بۇل رەسپۋبليكالىق بيۋدجەتكە كوپ سالماق سالادى. سۋ ارنالارىنىڭ نورماتيۆتىك ىسىرابى 17-23% قۇرايدى. تاريفتەردىڭ ءوسۋىن ەسكەرە وتىرىپ, قالالىق ەلدى مەكەندەردەگى سۋ ارنالارىن قارجىلاندىرۋ بويىنشا بيۋدجەتكە تۇسەتىن جۇكتەمەنى تومەندەتۋ ورىندى دەپ سانايمىن", دەدى مينيستر. بۇدان باسقا, ءىرى قالالاردا قالالىق كوممۋنالدىق سۋ ارنالارى مەنەدجمەنتى ءتيىمسىز. سول سەبەپتى سۋ رەسۋرستارىنىڭ ىسىرابى كوپ, تاريفتەر مەن قاراجاتتى جيناۋ دەڭگەيى تومەن. وسى ورايدا, اۋىلدىق ەلدى مەكەندەردى سۋمەن جابدىقتاۋ پروبلەماسىن شەشۋ ءۇشىن مەملەكەتتىك-جەكەمەنشىك ارىپتەستىك قاتىناسىن ەنگىزۋ ۇسىنىلادى. ەكىنشى – اۋىلدىق ەلدى مەكەندەردى (اەم) سۋمەن قامتاماسىز ەتۋ. اۋىلعا سۋ تارتۋ جەكە كاپيتال ءۇشىن ينۆەستيتسيالىق تارتىمدى بولىپ ەسەپتەلمەيدى. سەبەبى اۋىلدار ءبىر-بىرىنەن قاشىق, حالىق سانى از, تاريف تومەن جانە كورسەتىلگەن قىزمەتتەردىڭ وزىندىك قۇنى جوعارى. بيىلعى 1 قازانداعى جاعداي بويىنشا 6670 اۋىلدى ەلدى مەكەننىڭ ىشىنەن ورتالىق سۋ جۇيەسىمەن 3 616-سى (53,8%) قامتاماسىز ەتىلگەن. ال سۋ تارتىلماعان 3054 اۋىلدىق ەلدى مەكەننىڭ 2294-ىندە تۇرعىندار سانى 500 ادام شاماسىندا. ولارعا ەكونوميكالىق نەگىزى بار جانە ارزان ورتالىق سۋ جۇيەسىن تارتۋ, سۋ بۇرۋ جۇيەلەرىن قۇرۋ ءۇشىن حالىق سانى جەتكىلىكسىز. اۋىلدىق ەلدى مەكەندەردەگى تاريفتەر حالىق ءۇشىن وتە قىمبات جانە ينۆەستيتسيانى قايتارۋ ءۇشىن جەتكىلىكسىز – وڭىرگە بايلانىستى تاريفتەر 1 تەكشە مەتر ءۇشىن 9 تەڭگەدەن 4,0 مىڭ تەڭگە ارالىعىندا. ناتيجەسىندە, قازاقستاننىڭ باسىم بولىگىندە سۋمەن قامتۋ جانە سۋ بۇرۋ قىزمەتى ءوز بەتتەرىنشە جابدىقتاۋ نەگىزىندە كورسەتىلەدى. ۇكىمەت وتىرىسىندا بۇقارالىق كاسىپكەرلىكتى دامىتۋ, اۋىل تۇرعىندارىن جۇمىسپەن قامتاماسىز ەتۋ ماسەلەسى دە قارالدى. بۇل جونىندە اۋىل شارۋاشىلىعى ءبىرىنشى ۆيتسە-ءمينيسترى ق.ايتۋعانوۆ باياندادى. ول 2016 جىلدىڭ 15 قازانىنداعى جاعداي بويىنشا 28 ءسۇت قابىلداۋ پۋنكتى جانە 3,2 مىڭ وتباسىلىق بورداقىلاۋ الاڭى قۇرىلعانىن ايتتى. مۇنىڭ اياسىندا 15 مىڭ جەكە قوسالقى شارۋاشىلىق قامتىلماقشى. «رەسپۋبليكا بويىنشا 15 قاراشاعا دەيىن 2 400 اۋىل وكرۋگىنىڭ اكىمدەرىن جانە اۋدان اكىمدەرى ورىنباسارلارىن وقىتۋ اياقتالادى» دەدى ق.ايتۋعانوۆ. سونداي-اق, مينيسترلىك وكىلىنىڭ ايتۋىنشا, اكىمدىكتەر ماقۇلداعان جوسپارلارعا سايكەس اعىمداعى جىلدىڭ سوڭىنا دەيىن 150 اۋىل شارۋاشىلىعى كووپەراتيۆى ۇيىمداستىرىلىپ, ولار 100 ءسۇت قابىلداۋ پۋنكتى مەن 2 مىڭنان استام وتباسىلىق بورداقىلاۋ الاڭىن بىرىكتىرەتىن بولادى. دينارا بىتىكوۆا