قازاقستاننىڭ الەۋەتتى ارىپتەسى

قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ جەنەۆا كانتونى ەكونوميكا جانە قاۋىپسىزدىك ءمينيسترى, شۆەيتساريا كونفەدەراتسياسىنىڭ مەملەكەتتىك كەڭەسشىسى پەر مودەنى قابىلدادى, دەپ حابارلادى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى. جەنەۆانىڭ بۇرىنعى مەرى رەتىندە پ.مودە ق.توقاەۆتىڭ 2011-2013 جىلدارى بۇۇ باس حاتشىسىنىڭ ورىنباسارى, بۇۇ جەنەۆا بولىمشەسىنىڭ باس ديرەكتورى لاۋازىمىن اتقارعان كەزدەگى قىزمەتىن جوعارى باعالادى. تاراپتار بىرلەسكەن كۇش-جىگەردىڭ ارقاسىندا جاھاندىق ديپلوماتيانىڭ ورتالىعى رەتىندەگى جەنەۆانىڭ مارتەبەسى ايتارلىقتاي ارتا تۇسكەنىن اتاپ ءوتتى. سەنات توراعاسىنىڭ ايتۋىنشا, الەمدە گەوساياسي شيەلەنىستەر ءورشىپ تۇرعان بۇگىنگى جاعدايدا بۇۇ-نىڭ جەنەۆاداعى شتاب-پاتەرى كوپجاقتى كەلىسسوزدەر, جانجالداردىڭ الدىن الۋ, داعدارىستاردى رەتتەۋ ءۇشىن ماڭىزدى الاڭ رەتىندە ودان ءارى جان-جاقتى قولداۋدى قاجەت ەتەدى. سەنات توراعاسى قازاقستان مەن شۆەيتساريا اراسىنداعى ساۋدا-ەكونوميكالىق قارىم-قاتىناستاردى نىعايتۋ جونىندەگى پ.مودەنىڭ نيەتىنە قۇپتاۋ ءبىلدىردى. قازىرگى ۋاقىتتا, قازاقستاننىڭ الەم ەلدەرىمەن ساۋدا اينالىمىنىڭ كولەمى بويىنشا شۆەيتساريا بەسىنشى ورىندا تۇر. 2015 جىلى ەكىجاقتى ساۋدا كولەمى 2,79 ميلليارد اقش دوللارىن قۇرادى. سونىمەن قاتار, شۆەيتساريا سوڭعى ون جىلدا قازاقستان ەكونوميكاسىنا 14,5 ميلليارد دوللار ينۆەستيتسيا سالعان ءىرى ينۆەستورلاردىڭ ءبىرى بولىپ تابىلادى. توراعانىڭ ايتۋىنشا, ەكىجاقتى ىنتىماقتاستىقتىڭ وڭ ءۇردىسىن دامىتا بەرۋ قاجەت. وسىعان بايلانىستى, ق.توقاەۆ پ.مودە باستاعان شۆەيتساريا كاسىپكەرلەرى دەلەگاتسياسىنىڭ ساپارى ءوزارا ءتيىمدى قارىم-قاتىناستارعا جاڭا سەرپىن بەرەتىنىنە سەنىم ءبىلدىردى.