ازىرلىك بارىسىندا اكىم شاحتاعا تۇسەدى

الداعى جىلى ەلىمىزدە وتەتىن ەكسپو-2017 حالىقارالىق كورمەسىنە ازىرلىك شارالارى قاراعاندى وبلىسىندا قارقىندى جۇرگىزىلۋدە. وسى كورمە اياسىندا شەتەلدەن كەلەتىن قوناقتارعا ارنالعان قىزىقتى تۋريستىك باعىتتاردىڭ ءبىرى – كومىرلى قاراعاندىنىڭ شاحتالارىن ارالاۋ, دالىرەك ايتقاندا, كانىگى كەنشىلەر سياقتى جەر استىنا ءتۇسۋ بولماق. شاحتا تۇگىل, عارىش ساپارىنا تاۋەكەل ەتىپ, ءتىپتى سول ءۇشىن ميلليونداعان دوللار قاراجات تولەۋگە دايىن تۇراتىن كەي جاندار ءۇشىن بۇل ءبىر تارتىمدى ساياحات بولۋى ءتيىس. قوناقتار ءۇشىن قاۋىپسىزدىك شارالارى قانشالىقتى دارەجەدە ەكەنىن باعامداۋ ماقساتىندا وبلىس باسشىسى نۇرمۇحامبەت ابدىبەكوۆ ءتيىستى شاحتالارعا الدىمەن ءوزى ءتۇسىپ, كوز جەتكىزۋدى جوسپارلاپ وتىر. كاسىپكەرلىك پەن ءبىلىم باسقارمالارى باسشىلارىنىڭ مالىمدەۋىنشە, شەتەل­دىك قوناقتار ءۇشىن وسىنداي ساياحات ۇيىم­داستىرۋدىڭ ەكى جولى بار. ونىڭ ءبىرى جۇمىس ىستەپ تۇرعان شاحتالاردىڭ بىرىندە قاراستىرىلىپ جاتسا, ەكىنشى جوبا كوللەدج شاكىرتتەرىن تاجىريبەدەن وتكىزۋگە ارنالعان قاۋىپسىز تاجىريبەلىك لاۆادا جۇزەگە اسىرىلۋى مۇمكىن. – قالاي دەگەنمەن, كەنشىلەر مەن بۇل سالادان حابارى بار بولاشاق مامان­دار ءوز الدىنا, قاراپايىم ادامدار, ياعني تۋ­ريس­تەر ءۇشىن كەن ءوندىرۋ ورنىندا ەش قاۋىپتىڭ بولمايتىنىنا ابدەن كوز جەت­كى­زۋىمىز كەرەك, – دەيدى ءوڭىر باسشىسى. ال ازىرگە ەكسپو-2017 كورمەسىنىڭ قا­را­عاندى وبلىسى بويىن­شا التى تۋ­ريس­تىك باعىتى رەسمي تۇردە بەكىتىل­گەن. ولارعا جاۋاپتى «Noma­dicTravel­Kazahstan», قارقارالى مەملەكەتتىك ۇلتتىق تابيعي پاركى جانە «پاۆلين-تۋر» تۋريستىك وپەراتورلارى «استانا ەكسپو-2017» ۇلتتىق كومپانياسىمەن ارىپتەستىك جونىندەگى مەموراندۋمعا قول قويىسقان. بۇل تۋرالى وبلىستىڭ كاسىپكەرلىك باس­قارماسىنىڭ باسشىسى تاتيانا ابلاەۆا مالىمدەدى. وسى باعىتتار ينۆەستيتسيالار جانە دامۋ ءمينيسترى مەن مادەنيەت جانە سپورت ءمينيسترىنىڭ ورتاق بۇيرىعىمەن بەكىتىلگەن ەكسپو-2017 حالىقارالىق كورمەسىنىڭ قوناقتارىنا ارنالعان تۋريستىك باعىتتار تىزىمىنە ەنگىزىلگەن. بۇعان قوسا, شەتەلدىك قوناقتار ءۇشىن «شەبەر» قولونەر ورتالىعى دا ەسى­گىن ايقارا اشپاق. مۇندا كەلۋشىلەر قا­زاق­تىڭ ۇلتتىق قولونەرىمەن, ونىڭ بۇگىنگى تۋىن­دىلارىمەن تانىسىپ قانا قويماي, ەستەلىككە تەرى مەن كيىزدەن جاسالعان زاتتاردى, زەرگەرلىك بۇيىمداردى, تاعى دا باسقا ىڭعايلى دۇنيەلەردى الا الادى. شەتەلدىك قوناقتاردى قابىلداۋعا قازىردىڭ وزىندە جالپى سانى 13 مىڭ ورىندىق 220 قوناق ءۇي ءازىر. ولار تۋرالى اقپاراتتار ونلاين-برونداۋدىڭ www.booking.com سياقتى الەمدىك جۇيە­لەرىنە ورنالاستىرىلعان. كورمەگە بي­لەتتەردى دە ونلاين جۇيە ارقىلى الۋ­عا بولادى. مەزگىلى تاياعاندا قالا­نىڭ حا­لىق كوبىرەك شوعىرلانعان ورىن­دارىن­دا ارنايى كاسسالار اشىلادى. تۋر­وپە­راتورلار ءوز قوناقتارى ءۇشىن 8 مىڭ بي­لەتتى الىپ تا قويدى. ءار بيلەتتىڭ قۇنى 4-7 مىڭ تەڭگە ارالىعىندا بولماق. «قازاۆتوجول» ۇلتتىق كومپانياسى» اق قاراعاندى فيليالىنىڭ ديرەكتورى قانات ءشايميننىڭ مالىمدەۋىنشە, اس­تانا–تەمىرتاۋ اۆتوداڭعىلى 1 جەل­­توق­سانعا دەيىن تولىق دايىن بولادى. جول جوندەۋشىلەر, سونىمەن قاتار, قار­­قارالى ۇلتتىق پاركى مەن ۇلىتاۋ تا­بيعات قورىعىنا اپاراتىن جولداردى دا تاقتايداي ەتۋدى, جول بويىنان قوسىمشا پاۆيلوندار مەن دەمالىس ورىندارىن ىسكە قوسۋدى جوسپارلاپ وتىر. قاراعاندىلىق وندىرۋشىلەر ەكس­پو-2017 نىساندارىن سالۋشىلارعا, سون­داي-اق تەمىر-بەتون بۇيىمدارىن, جىلۋ را­دياتورلارىن, قۇبىرلار, قۇرىلىس قوسپالارىن, بوياۋ-سىرلاۋ ونىمدەرىن, ءورت ءسوندىرۋ جۇيەلەرى مەن قۇرالدارىن جەت­كىزىپ بەرىپ وتىر. وبلىستىق باسقارما اس­تاناداعى قۇرىلىستاردىڭ بارىسىنا تۇ­راقتى مونيتورينگ جاساپ وتىرادى. جىل سوڭىنا تامان نەگىزگى نىساندار ىسكە قو­­سىلادى. ياعني, سول كەزدە ولارعا باسقا دا ونىمدەر قاجەت بولادى. ماتا, جيھاز, باس­­قا دا كەرەك-جاراقتاردى وندىرۋمەن اي­نا­­لى­ساتىن ۇيىمدار سول كەزدە جاڭا كە­لى­سىم­شارتتار جاساسۋعا دايىن بولۋى كەرەك. ەكسپو-2017 كورمەسى اۋىلشارۋا­شى­لىق ونىمدەرىن وندىرۋشىلەرگە دە ءتيىمدى بولماق. ولار استانانىڭ كۇرت وسە­تىن سۇرانىسىنىڭ ارقاسىندا وزدەرى شىعا­را­تىن ءونىم كولەمىن ەداۋىر ارتتىرا الادى. وبلىس اكىمى جوعارىداعى جيىندا ايتقان­داي, بۇل ورايدا مەيلىنشە شيراق قيمىلداۋ كەرەك. بۇرىننان بار جەتكىزۋ تاسىلدەرىنەن بولەك, شارۋا قوجالىقتارى ءوز ونىمدەرىن تىكەلەي الىپ بارا الاتىن نىسانداردى كوزدەۋ قاجەت. قايرات ءابىلدينوۆ, «ەگەمەن قازاقستان» قاراعاندى