Kase: اينالىمداعى اقشا كولەمى كوبەيدى

وتكەن 9 اي ارالىعىندا قازاقستان قور بيرجاسىنداعى ساۋدا-ساتتىق ارعى جىلمەن سالىستىرعاندا 10 پايىزعا ءوسىپ, 73,2 ترلن تەڭگەنى قۇرادى.  بۇل تۋرالى الماتىداعى ءباسپاسوز ءماسليحاتىندا قور ءتورايىمى الينا الدامبەرگەن مالىمدەدى. اتقارعان جۇمىستارىنىڭ ناتيجەسىمەن بولىسكەن ۇيىم باسشىسى قوردىڭ جاڭعىرتىلعان برەندىن دە تانىستىردى. قازاقستان قور بيرجاسى الەمدىك قارجى مەن قۇندى قاعازدار نارىعىنا نىق قادام باسىپ, وتاندىق برەند قالىپتاستىرعالى 23 جىل تولدى. قازىر KASE اتاۋىمەن تانىمال بولعان ۇيىم تمد ەلدەرى اراسىنداعى نارىقتا ەكىنشى ورىنعا شىقسا, دۇنيەجۇزىلىك قور بيرجالارىنىڭ بىرەگەيلەرىمەن تىعىز ارىپتەستىكتە جۇمىس جاسايتىن تانىمال ورتالىققا اينالعان. دۇنيەجۇزىلىك بيرجالار فەدەراتسياسىنىڭ (WFE), ەۋرو-ازيالىق قور بيرجالارى فەدەراتسياسىنىڭ (FEAS) جانە باسقا دا حالىقارالىق بىرلەستىكتەردىڭ مۇشەسى بولىپ تابىلادى. ال 2015 جىلدان باستاپ KASE  بىرىككەن ۇلتتار ۇيىمىنىڭ «قور بيرجالارىنىڭ تۇراقتى دامۋى ءۇشىن» باستاماسىنا قوسىلعان بولاتىن. قور بيرجاسىنىڭ باسشىلىعى جاقىندا 2016-2018 جىلدارعا ارنالعان دامۋ ستراتەگياسىن بەكىتكەن ەكەن. ساراپشىلاردىڭ باعالاۋىنشا, وتان­دىق قور بيرجاسىنداعى احۋال قالىپتى دەڭ­گەيدە ساقتالىپ وتىر. جازعى سەسسيا­لار كەزىندەگى ساۋدا-ساتتىقتىڭ ازايۋى باي­قالعانىمەن, قازىر نارىققا قاتىسۋ­شىلاردىڭ بەلسەندىلىگى جوعارى ەكەن. ءما­سەلەن, جالپى توعىز اي ىشىندە رەپو, ياع­ني باعالى قاعازداردى بولاشاقتا جوعارى باعامەن قايتا ساتۋ مۇمكىندىگىن بەرەتىن قار­جى وپەراتسياسى نارىعىنداعى تەندەنتسيا ءۇش ەسەگە ارتىپ, 44,8 ترلن تەڭگەنى قۇراعان. ال, اكتسيالار نارىعىن كاپيتالداندىرۋ وپەراتسيالارى 7,1 پايىزعا وسكەن. بۇل ءوسىم 1 قازانداعى ەسەپ بويىنشا ىشكى جالپى ءونىمنىڭ 33 پايىزىن قۇراپ, 13,3 ترلن تەڭگەگە جەتتى. KASE يندەكسى دە توعىز اي ىشىندە 38,7 پايىزعا ءوسىپ, جىلدىق مولشەردىڭ 51,5 پايىزى ورىندالدى. سونداي-اق, قور بيرجاسىنا اكتسيالارىن شىعارۋشىلار سانى رەكوردتىق دەڭگەيگە جەتكەن. وسى مەرزىم ارالىعىندا بيرجاعا 119 اتاۋمەن اكتسيا سالۋعا ءوتىنىم بەرگەن 100 ەميتەنتتىڭ سۇرانىسى قاناعاتتاندىرىلىپتى. – وتاندىق قارجى نارىعىنداعى تەڭگە باعامىنىڭ تۇراقتىلىعى مەن ۇلتتىق بانكتىڭ ۇستانىمى بۇعان دەيىن شەتەل ۆاليۋتاسىمەن جۇرگىزىلگەن وپەراتسيالاردىڭ سانىن شەكتەدى. بۇل تەڭگە باعامىنداعى اقشانىڭ كوبەيۋىنە جول اشتى. اسىرەسە, بانكتەردە ساقتالىپ كەلگەن دوللار تەڭگەگە اينالىپ, اينالىمداعى اقشا كولەمىن ارتتىردى. ناتيجەسىندە, بيرجا مەن ساۋدا-ساتتىققا سالىنعان اقشا كولەمى ۇلعايدى, – دەپ ءتۇسىندىردى بۇل جايدى بىزگە قازاقستان قور بيرجاسى ءتورايىمىنىڭ ورىنباسارى اندرەي تساليۋك. ايتپاقشى, بيىلعى جىلدىڭ باستى جاڭالىعى  حالىقتىق IPO باعدارلاماسى بويىنشا ساۋداعا شىعارىلعان اقتوبە مەتالل قۇرىلعىلارى زاۋىتىنىڭ اكتسيالارىن ساتىپ الۋعا ىنتالى ادامداردىڭ كۇرت كوبەيگەنى بولسا كەرەك. قازىرگە دەيىن جەكە ينۆەستورلار زاۋىتتىڭ اكتسيالارىن 800 ملن تەڭگەگە ساتىپ العان. قالماحانبەت مۇقامەتقالي, «ەگەمەن قازاقستان» الماتى