مينيسترلىك ايىقتىرعىشتار سانىن كوبەيتۋدى كوزدەيدى

«ەگەمەن قازاقستان» گازەتىنىڭ 8 قازان كۇنگى سانىندا الەكساندر تاسبولاتوۆتىڭ «ابايلاڭىز... ايىقتىرعىش!» تاقىرىبىمەن ماتەريال جاريالانعان بولاتىن. وندا مەملەكەت تاراپىنان ىشىمدىككە قارسى كۇرەس جۇرگىزۋدىڭ ءتۇرلى امال-ارەكەتتەرى ءتيىستى زاڭنامالىق نەگىزدە جاسالىپ جاتقانىمەن, «باياعى جارتاس – ءبىر جارتاس» كۇيىندە قالىپ وتىرعانى جايىندا جازىلعان ەدى. ەندى, مىنە, وسى ماسەلەگە بايلانىستى ءىىم مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋباەۆ مەديتسينالىق ايىقتىرعىشتارعا قاتىستى ارنايى تۇسىندىرمە جاسادى. قۇزىرلى ورگان وكىلى ءوز مالىمدەمەسىندە 2010 جىلى 32 مەديتسينالىق ايىقتىرعىش (قازىرگى ۋاقىتتا ۋاقىتشا بەيىمدەۋ جانە وڭالتۋ ورتالىقتارى) دەنساۋلىق ساقتاۋ ورگان­دارىنىڭ قۇزىرەتىنە بەرىلگەنىن جانە بۇل رەتتە ماس ادامداردى ءتيىستى ورىندارعا جەتكىزۋ فۋنك­تسياسى ىشكى ىستەر ورگاندارىنىڭ قۇزىرەتىندە قالدىرىلعانىن ايتادى. سونىمەن قاتار, ول: «ەل ىشىندە وسىنداي 29 ورتالىق جۇمىس ىستەيدى, ولاردا بارلىعى 598 توسەك-ورىن بولعانىمەن, قاجەتتىلىك تولىق قامتاماسىز ەتىلمەيدى. ءبىز قولدانىستاعى ورتالىقتاردى 240 توسەك-ورىنعا كەڭەيتۋدى ۇسىنامىز جانە 595 توسەك-ورىندى قامتيتىن قوسىمشا تاعى دا وسىنداي 38 ورتالىق اشۋدى ۇسىنىپ وتىرمىز», – دەيدى ا.سادۋباەۆ. ونىڭ ايتۋىنشا, مۇنداي مەكەمەلەر بارلىق اۋدان ورتالىقتارىندا بولعان. قازىرگى ۋاقىتتا ولار تەك قالالار مەن وبلىس ورتالىقتارىندا جۇمىس ىستەيدى. ءىىم مۇنداي ورتالىقتارمەن ەلىمىز­دىڭ بارلىق اۋداندارىن قامتۋدى كوزدەپ وتىرعان جوق. ال كەيبىر جەكەلەگەن ءۇش-ءتورت اۋدان ءۇشىن ءبىر ورتالىق بولسە, جەتكىلىكتى بولادى دەپ بولجانۋدا. ايتا كەتەيىك, قازىرگى ۋاقىتتا ماس كۇيىندە جاسال­عان قىلمىستىق قۇقىق بۇزۋشىلىقتار سانى شارىقتاۋ شەگىنە جەتىپ تۇر. اعىمداعى جىلدىڭ 9 ايىندا ماس كۇيىندە 14 مىڭنان استام قىلمىستىق قۇقىق بۇزۋشىلىقتار جاسالعان بولسا, وتكەن جىلدىڭ 12 ايىندا بۇل كورسەتكىش 12,7 مىڭدى قۇراعان. سونىمەن قاتار, ماس كۇيىندە قۇقىقبۇزۋشىلىق جاساعانى ءۇشىن ۇستالعان ادامدار سانى دا كۇن ساناپ ارتىپ كەلە جاتقانىن ستاتيستيكالىق دەرەكتەر راستايدى. نۇرلىبەك دوسىباي, «ەگەمەن قازاقستان»