«قاڭباق شالعا» بارسەلونا مەن پاريج قوشەمەت كورسەتتى

استانانىڭ قۋىرشاق تەاترى بارسەلونا مەن پاريجدە وتكەن حالىقارالىق قۋىرشاق كارناۆالىنىڭ كەزدەسۋلەرىنە قاتىستى.  الەمنىڭ 54 مەملەكەتىنەن جينالعان ۇزدىك تەاترلىق ۇجىمدار ءوزارا تاجىريبە ال­ما­سىپ, ونەردىڭ وسى ءتۇرىن دامىتۋ ماسە­لەلەرىن تالقىلادى. ءىس-شارالار بارىسىندا استانا قالاسى قۋىرشاق تەاترىنىڭ ديرەكتورى توعجان حاسانعاليەۆا «پلانشەتتى قۋىرشاقتار» تاقىرىبىندا بايانداما جاسادى. پلانشەتتى قۋىرشاقتار دەگەنىمىز – ساحنا توسەمىنىڭ ۇستىنەن «جۇرە» الاتىن قۋىر­شاقتار. قازىرگى كەزدە ونەر الەمىندە بۇل ۇعىم كەڭىنەن تانىمال ءارى الەمنىڭ ۇزدىك تەاترلارى ناق وسى پلانشەتتى قۋىرشاقتارمەن جۇمىس ىستەيدى. ەلوردالىق قۋىرشاق ويناتۋشى ارتىستەر دە ولاردى ءوز قويىلىمدارىندا قولدانىپ كەلەدى. يسپانيا مەن فرانتسيانىڭ ءىرى مادەني قالالارىندا وتكەن حالىقارالىق قۋىرشاق كارناۆالىنىڭ شەبەرلىك-ساباقتارىندا ەلوردالىق ارتىستەر ۇلتتىق ستيلدە جاسالعان ۇستەل پلانشەتتى قۋىرشاقتارمەن ونەر كورسەتىپ, شەتەلدىك ارىپتەستەرىنىڭ نازارىنا «قاڭباق شال» حالىق ەرتەگىسىن ۇسىندى. حالىقارالىق كارناۆالدىڭ كەزدەسۋلەرىنە قاتىسقان شەتەلدىك ۇزدىك قۋىرشاق ويناتۋشى ارتىستەر استانا قۋىرشاق تەاترى ارتىستەرىنىڭ شىعارماشىلىعى مەن كاسىپقويلىعىن جوعارى باعالاعانى دا ءبىر عانيبەت. ايگۇل سەيىلوۆا, «ەگەمەن قازاقستان»