توعىز ايدا قازاقستان-ۆەنگريا ساۋدا اينالىمى 80 ملن دوللار بولدى

كەشە ەلوردادا ۇلتتىق ەكونوميكا ءمينيسترى قۋاندىق بيشىمباەۆتىڭ جانە ۆەنگريانىڭ ۇلتتىق ەكونوميكا ءمينيسترى ميحاي ۆارگانىڭ قاتىسۋىمەن ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ وتىرىسى ءوتتى. بيشىمباەۆتىڭ ايتۋىنشا, ەكى ەلدىڭ جەتەكشى كومپانيالارى سوڭعى جىلدارى ءوزارا تابىستى جۇمىس ىستەۋدە دەۋگە بولادى. بۇگىندە ەلىمىزدە ەلۋگە تارتا بىرلەسكەن كاسىپورىننىڭ بولۋى وسىنىڭ بەلگىسى. ەكى تاراپ الداعى ۋاقىتتا بىرلەسكەن كاسىپورىنداردىڭ قاتارىن ارتتىرۋعا مۇددەلى بولىپ وتىر. – اگروونەركاسىپ كەشەنى سالاسىنداعى ينۆەستيتسيالىق جوبالاردى تىكەلەي قارجىلاندىرۋ ماقساتىندا قازاقستان-ۆەنگريا ينۆەستيتسيالىق قورىنىڭ قۇرىلعانى تابىستى ىنتىماقتاستىقتىڭ ءبىر كورىنىسى دەۋگە بولادى. قازاقستان اۋىلشارۋاشىلىق ونىمدەرىن وڭدەۋ سالاسىندا كوپتەگەن جوبالاردى جۇزەگە اسىرۋعا نيەتتى. ەكى ەل كومپانيالارىنىڭ بىرلەسكەن كاسىپورىندارىن قۇرۋعا ءتيىستى رەزەرۆتەر بار, – دەدى ق.بيشىمباەۆ. ۆەنگريانىڭ ۇلتتىق ەكونوميكا ءمينيسترى ميحاي ۆارگا ايتىپ وتكەندەي, ەۋروپالىق مەملەكەت قازاقستانمەن اراداعى كوممەرتسيالىق قاتىناستاردى ودان ءارى دامىتۋ ءۇشىن قاجەتتى نارسەنىڭ ءبارىن جاساۋعا دايىن. وعان ەكى ەلدىڭ دە الەۋەتى تولىق جەتەدى. – قازاقستاندى ورتالىق ازياداعى ستراتەگيالىق ارىپتەس دەپ تانۋ ءبىز ءۇشىن وتە ماڭىزدى. بۇل مەملەكەت ءبىز ءۇشىن ەۋروپا مەن ازيانىڭ اراسىنداعى كوپىردىڭ قىزمەتىن اتقارادى. ۆەنگريا  ەۋروپالىق وداق پەن قازاقستاننىڭ اراسىنداعى ىنتىماقتاستىقتى قولداۋعا قاشاندا ءازىر. ۆەنگريالىق كاسىپورىندار وزدەرىنىڭ تاجىريبەسى مەن بىلىكتىلىگىن پايدالانىپ سىزدەردىڭ ەلدەرىڭىزدە ەكونوميكانى ءارتاراپتاندىرۋ ىسىنە كومەگىن تيگىزەدى دەپ ۇمىتتەنەمىن. ءبىز كەلەسى جىلى استانادا وتەتىن ەكسپو-2017 كورمەسىنە دە قاتىسامىز. بۇل ەكى ەلدىڭ ەكونوميكالىق قاتىناستارىنا جاڭاشا سەرپىن بەرۋگە ءتيىس, – دەدى م.ۆارگا. قازاقستاننىڭ ۇلتتىق ەكونوميكا ۆيتسە-ءمينيسترى تيمۋر جاقسىلىقوۆتىڭ ايتۋىنشا, 2015 جىلى قازاقستان مەن ماجارستان اراسىنداعى سىرتقى ساۋدا اينالىمى 102 ملن دوللار بولعان, ال اعىمداعى جىلدىڭ 8 ايىنىڭ قورىتىندىسى بويىنشا شامامەن 80 ملن دوللاردى قۇرادى. ەكى ەلدىڭ تابىستى ىنتىماقتاستىعىن نىعايتۋ ءۇشىن بارلىق جاعداي جاسالدى. ەكى ەل اراسىندا ستراتەگيالىق  كەڭەس قۇرىلدى, ەكونوميكالىق ىنتىماقتاستىق بويىنشا ۇكىمەتارالىق كوميسسيا, ىسكەري كەڭەس, سونىمەن قاتار, 40 ملن دوللار سوماسىنا اۋىل شارۋاشىلىعى جوبالارىن قارجىلاندىرۋدىڭ ورتاق قورى جۇمىس ىستەيدى. ەكونوميكا سالاسىنداعى ەكىجاقتى حالىقارالىق قۇقىقتىق شارتتىق بازانىڭ نەگىزگى ەلەمەنتتەرى جاسالعان. دەلەگاتسيا مۇشەلەرى ساۋدا-ساتتىق قاتىناستاردى دامىتۋ سالالارىن ءسوز ەتتى. شاعىن جانە ورتا بيزنەستىڭ ازىق-ت ۇلىك ونىمدەرى مەن سۋسىندار شىعارۋ, حيميا مەن فارماتسەۆتيكا ونەركاسىبى, اۋىلشارۋاشىلىق ونەركاسىبى سىندى سەكتورلارىندا ىنتىماقتاستىقتى ارتتىرۋعا مۇمكىندىك زور ەكەندىگىن تىلگە تيەك ەتتى. جيىن سوڭىندا ەلىمىزدىڭ دەنساۋلىق ساقتاۋ جانە الەۋمەتتىك دامۋ مينيسترلىگى مەن ۆەنگريانىڭ ۇلتتىق ەكونوميكا مينيسترلىگى اراسىندا حالىقتى جۇمىسپەن قامتۋ سالاسىندا ءوزارا تۇسىنىستىك تۋرالى مەموراندۋمعا قول قويىلدى. سونداي-اق, قازاقستاننىڭ قارجى مينيسترلىگى قازىناشىلىق كوميتەتى مەن ۆەنگريا مەملەكەتتىك قازىناشىلىعى ىنتىماقتاستىق تۋرالى مەموراندۋم جاساستى. ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ كەلەسى وتىرىسى بۋداپەشتە وتەتىن بولىپ كەلىسىلدى. ارنۇر اسقار, «ەگەمەن قازاقستان»