بيىلعى قىس قازاقستاندا قارلى بولادى

قازاقستانعا قىس ەرتە  كەلەدى. بۇل تۋرالى ءباسپاسوز ءماسليحاتىندا  «قازگيدرومەت» رمك اۋا رايىنىڭ ۇزاقمەرزىمدى بولجامدار باسقارماسىنىڭ باسشىسى گۇلميرا اقىشەۆا ءمالىم ەتتى. «ۇزاقمەرزىمدى بولجامعا سايكەس, ەلىمىزدە قىس ەرتە كەلىپ, قارلى بولادى دەپ كۇتىلۋدە. قاراشا ايىنىڭ ءبىرىنشى جارتىسىندا ەلىمىزدىڭ سولتۇستىك وڭىرىندە قار تۇراقتى جامىلعىسى بولادى, ال وڭتۇستىك وڭىرلەرىندە قاراشانىڭ ەكىنشى جارتىسىندا قار جاتادى», - دەيدى گ. اقىشەۆا. ونىڭ سوزىنە قاراعاندا, قاراشادا اۋا رايى قۇبىلمالى بولادى, ياعني جاۋىن-شاشىن مەن تۇمان, كوكتايعاق جاعدايلارى ءجيى بولادى. اتاپ ايتقاندا, قازاقستاننىڭ باسىم بولىگىندە تەمپەراتۋرالىق رەجىم كليماتتىق نورما اياسىندا قالىپتاسادى, ال جاۋىن-شاشىن نورمادان ارتىق تۇسەدى دەپ كۇتىلەدى. «ايتارلىقتاي سۋىق تەمپەراتۋرانى قاراشانىڭ ەكىنشى ونكۇندىگىنىڭ سوڭىندا جانە ءۇشىنشى ونكۇندىكتە بولجاپ وتىرمىز. ول كەزدە سولتۇستىك, شىعىس, ورتالىق وڭىرلەرىندە اۋانىڭ سىناپ باعاناسى تۇندە 15-27 گرادۋسقا دەيىن تومەندەسە, كۇندىز  8-15 تەمپەراتۋرانى كورسەتەدى. ال باتىس, وڭتۇستىك اۋماقتاردا تۇندە 5-12, كۇندىز 0-5 گرادۋس دەڭگەيىندە بايقالماق»,-دەدى ول.