سولتۇستىك قازاقستاندا كونە كولىكتەر جينايتىن قاريا تۇرادى

سولتۇستىك قازاقستان وبلىسى تايىنشا اۋدانىنىڭ تۇرعىنى اناتولي گابچەنكونىڭ وزگەدەن ايىرماسى - ول ءومىر بويى كونەنىڭ كوزىندەي بايىرعى زاتتاردى جيناۋمەن اينالىسىپ كەلەدى. ونىڭ جەكە قورىندا قازىر ون شاقتى ەسكى كولىك , جۇزدەگەن كونە مونەتالار مەن وتكەن عاسىرداعى تۇرمىستىق قۇرال-جابدىقتار بار. بۇل تۋرالى «حابار 24» جازادى. اناتولي گابچەنكونىڭ اۋلاسىنا جاقىنداعان ادامدى الدىمەن كوزدىڭ جاۋىن الاتىن كونە كولىكتەر وزىنە ەرىكسىز باۋراپ الادى. مۇنداعى تەحنيكالاردىڭ بارلىعى وتكەن عاسىردىڭ 1950 جىلدارىنان باستاپ 1970 جىلدارىنا دەيىن شىعارىلعان. اراسىندا ءتىپتى 1944 جىلى قۇراستىرىلعان «موسكۆيچ» تە بار. ازىرگە بۇل وسى كولىكتەردىڭ ىشىندەگى ەڭ ەسكىسى. ال سار ءتۇستى كولىكتىڭ قاي جىلعى ەكەنى بەلگىسىز. تەك ءبىر بەلگىلىسى, مۇنى اناتولي گابچەنكو 1974 جىلى ششۋچينسك قالاسىنان ساتىپ العان ەكەن. سول كەزدىڭ وزىندە بۇل كولىك ىستەن شىعىپ, جۇرۋگە جارامسىز بولىپ قالعان. الايدا كونەگە قۇمار قاريا ونى قالىپقا كەلتىرىپ, جۋىپ-شايىپ, تازالاپ قويعان. قازىر بۇل كولىك, جۇرتتىڭ قىزىعا تاماشالايتىن ەڭ ءبىر ەسكى كولىگى. بۇل كولىكتەر قارت كوللەكتسيونەردىڭ سوڭعى 15 جىلدا جيناعاندارى. قاريا ولاردى تەك جيناپ قانا قويماي, ءوزى جوندەپ, جۇرگىزۋگە تىرىسادى ەكەن. ماسەلەن وسىنداعى جەڭىل اۆتوكولىكتەر مەن موتوتسيكلدەردىڭ قازىر جارتىسىنا جۋىعى ءجۇرىپ تۇر. «وسى جىلدار ىشىندە 6 ماشينا مەن ەكى موتوتسيكلدى جوندەپ, جۇرگىزىپ قويدىم. ەندىگى ارمانىم, سوعىس كەزىندە مىنىلگەن گاز-678 كولىگىن قالىپقا كەلتىرۋ. ونىڭ ءبىراز بولشەگى وزىمدە بار بولاتىن. جاقىندا قاڭقاسىن ستەپنياك قالاسىنان ارنايى الىپ كەلدىم. جۇرتتار ماعان ەسكىنى قايتەسىڭ, تاستا دەيدى. مەن ولاي ەتە المايمىن. ويتكەنى بۇلار - مەنىڭ ءومىرىم», - دەيدى زەينەتكەر اناتولي گابچەنكو. كونە ساعاتتار, ەسكى ۇتىكتەر مەن وتكەن عاسىرعا تيەسىلى باسقا دا بۇيىمداردى قارت كوللەكتسيونەردىڭ گاراجىنان كورۋگە بولادى. اراسىندا ءتىپتى 1872 جىلعى ساماۋرىن دا بار ەكەن. ال اۋىل بالالارى ءۇشىن مۇنىڭ بارلىعى قىزىق. دانيل ۆەرجبيتسسكي, وقۋشى: - مەن مۇنداي كولىكتەردى بۇرىن تەك تەلەديداردان كورەتىنمىن. ال, مىنا جەردە كورىپ, قاتتى تاڭعالدىم. قۇددى ءبىر مۇراجايعا تاپ بولعاندايمىن. «جەرگىلىكتى مەكتەپ ۇجىمى بۇل كىسىنى ءتۇرلى شارالارعا قاتىستىرادى. ونداعى ماقسات - وسىنىڭ بارلىعىن بالالارعا كورسەتۋ. بۇل كىسىنىڭ ءبىر ءوزى ءبىر مۋزەي. جىل سايىن 9 مامىردا اناتولي گابچەنكونىڭ كومەگىمەن كونە كولىكتەردىڭ شاعىن اۆتوشەرۋىن ۇيىمداستىرىپ تۇرامىز. قارت كوللەكتسيونەر ەندى وسى ءبىر اشىق اسپان استىنداعى كورمەسىن كانىگى مۋزەي رەتىندە كورگىسى كەلەدى. سول ءۇشىن دە ول قازىر بارلىق بۇيىمداردى قالىپقا كەلتىرىپ جاتىر», - دەيدى كەللەروۆكا اۋىلىنىڭ اكىمى ەرجان جۇماباەۆ.