استانادا وڭتۇستىك قازاقستاننىڭ جارمەڭكەسى اشىلدى

استاناعا قارا سۋىق ءتۇسىپ, قار جاۋىپ كەتسە دە, ەلوردا تۇرعىندارى وڭتۇستىكتىڭ قاربىز-قاۋىنىن جەۋگە مۇمكىندىك الدى. قۇرت-ىرىمشىك, قىمىز-شۇبات, باۋىرساق سياقتى ۇلتتىق تاعامدار جانە بار. بۇگىن تاڭەرتەڭ «حان شاتىر» ساۋدا ويىن-ساۋىق ورتالىعىنىڭ الدىندا وڭتۇستىك قازاقستان وبلىسىنىڭ جارمەڭكەسى باستالدى. سورەگە قويىلعان ونىمدەردى الىپ جاتقان ادامداردىڭ قاتارى قالىڭ كورىنەدى. جارمەڭكەدە ءسابىز, كارتوپ, پياز سياقتى كوكونىستەردىڭ كيلوسى 50 تەڭگەدەن, بايالدى – 100 تەڭگەدەن, قۇرتتىڭ كيلوسى – 1 400 تەڭگەدەن, ىرىمشىك – 1 100 تەڭگەدەن, جىلقى ەتى – 1 200 تەڭگەدەن, جىلقىنىڭ قازىسى – 1 500 تەڭگەدەن, جۇمىرتقا – 22 تەڭگەدەن ساتىلۋدا. اسىرەسە, قاربىز-قاۋىن ساتىپ الۋشىلاردىڭ كەزەگى ۇزاققا سوزىلىپتى. —استانادا قاربىزدىڭ ماۋسىمى تەز ءوتىپ كەتەدى, تويىپ جەپ ۇلگەرمەيمىز. سول سەبەپتى, وڭتۇستىكتىڭ قاربىز-قاۋىنىنان اۋىز تيەيىك دەپ ساتىپ الدىم. كيلوسى 90 تەڭگەدەن ەكەن,— دەيدى جارمەڭكەگە كەلگەن ساتىپ الۋشى ايمان ەسىمدى استانالىق. وبلىستىق اۋىل شارۋاشىلىعى باسقارماسىنىڭ باستىعى سەرىك تۇربەكوۆتىڭ ايتۋىنشا, ساتىلىپ جاتقان ازىق-ت ۇلىكتىڭ بارلىعى وبلىستىڭ شارۋالارىنىڭ ءونىمى. وڭتۇستىك قازاقستان وبلىسى كوكونىسپەن ءوزىن-ءوزى قامتىپ قانا قويماي, كورشىلەس ەلدەرگە ەكسپورتتاۋعا دا ۇلگەرەدى. — قازاقستاندا جاسالعان اكتسياسىنىڭ اياسىندا وبلىستىق وندىرۋشىلەر 300 توننادان استام اۋىلشارۋاشىلىق ونىمدەرىن اكەلدى. ساۋدا جاساۋعا كەلگەن ادامدار كوپ, ونىمدەرىمىز جاقسى ءوتىپ جاتىر,— دەيدى س.تۇربەكوۆ. وڭتۇستىك قازاقستان وبلىسى بيىلعى جيىن-تەرىم ناۋقانىن زور جەتىستىكپەن اياقتاعانىن ايتا كەتۋ كەرەك. بيىل وبلىس بويىنشا, 470 مىڭ توننا استىق جينالىپتى. بۇل بىلتىر بۇل كورسەتكىش 246 مىڭ توننا كورسەتكىشتەن الدەقايدا مول كورسەتكىش. استىقتىڭ ورتاشا تۇسىمدىلىگى گەكتارىنا 22 تسەنتنەردى قۇراعان. بۇل تاۋەلسىزدىك جىلدارىنداعى ەڭ جوعارعى رەكوردتىق ءونىم كەن. سونىمەن قاتار, وبلىس اكىمدىگى جەمىس-جيدەك, كوكونىس ەگىلەتىن جەرلەردىڭ كولەمىن دە جىل سايىن ۇلعايتىپ, ديحاندارعا قولداۋ كورسەتۋدى جۇيەلى تۇردە جۇرگىزىپ كەلە جاتىر. سايكەسىنشە ءونىم كولەمى دە ارتۋدا. وبلىس شارۋالارىنىڭ ونىمدەرىنەن استاناعا دا اۋىز تيگىزىزەتىن جارمەڭكە بۇگىن جانە ەرتەڭ, ياعني, ەكى كۇنگە سوزىلادى. نۇرحان اسقار