وپەك مۇناي ءوندىرۋ كولەمىن قاراشادا قىسقارتادى

ۆەنەسۋەلانىڭ مۇناي ءمينيسترى ەۋلوحيو دەل پينو وپەك ۇيىمىنىڭ مۇناي ءوندىرۋ كولەمىن ازايتۋ جونىندەگى كەلىسىمى قاراشا ايىندا جۇزەگە اسا باستايتىندىعىن جەتكىزدى, دەپ حابارلايدى بلۋمبەرگ اگەنتتىگى. ونىڭ سوزىنشە, وپەك ۇيىمىنا مۇشە ەمەس رەسەي, ومان سياقتى وزگە دە بىرقاتار مەملەكەتتەر وزدەرىنىڭ مۇناي ءوندىرۋ كولەمىن ازايتۋعا كەلىسىمدەرىن بەرەدى. ول سونداي-اق مۇناي ءوندىرۋشى مەملەكەتتەردىڭ جاقىن كۇندەردە تاعى دا ءبىر رەت باس قوساتىنىن ايتتى. «ءبىز بۇل ماسەلەدە كەلىسىمگە كەلۋگە ۇمتىلىپ جاتىرمىز. وپەك ۇيىمىنا مۇشە ەمەس ەلدەر سانى نەعۇرلىم كوپ بولعان سايىن بۇل شارانىڭ جاعدايدى تۇراقتاندىرۋعا دەگەن ىقپالى دا زور بولادى»,-دەپ كەلتىرەدى دەل پينونىڭ ءسوزىن بلۋمبەرگ. وپەك الجيردە 28 قىركۇيەك كۇنى وتكەن بەيرەسمي كەزدەسۋدە مۇناي ءوندىرۋ كولەمىن شەكتەپ, تاۋلىگىنە 32,5-33 ميلليون باررەل عانا ءوندىرۋ جونىندە كەلىسىمدى تالقىعا سالدى. الايدا, ءار مەملەكەت ءۇشىن ناقتى مەجەنى بەلگىلەۋ باعىتىندا كەلىسىم جوق. بۇل ماسەلەگە قاتىستى سوڭعى شەشىم وپەك ۇيىمىنىڭ قاراشانىڭ 30-ى كۇنى ۆەنادا وتەتىن رەسمي كەزدەسۋىندە قابىلدانۋى كەرەك. ۇيىم نارىقتى تۇراقتاندىرۋ جۇمىستارىنا وزگە دە مۇناي ءوندىرۋشى ەلدەر قوسىلادى دەگەن ۇمىتتە. ول ءبىرىنشى كەزەكتە رەسەيگە قاتىستى. وپەك ۇيىمىنىڭ ارنايى كوميتەتى الجير كەلىسىمىن جۇزەگە اسىرۋ اياسىندا العاش رەت 28-29 قازان ارالىعىندا ۆەنادا كەزدەسەدى. رف ەنەرگەتيكا ءمينيسترى الەكساندر نوۆاكتىڭ ايتۋىنشا, رەسەي وندا وپەك ۇيىمىنىڭ تەحنيكالىق كەزدەسۋىنە جانە نارىقتى تۇراقتاندىرۋ ماقساتىندا مۇناي ءوندىرۋ كولەمى بويىنشا ناقتى تسيفرلاردى تالقىلاۋ ۇسىنىلىپ وتىرعان ۆەنادا, 29 قازان كۇنى وتەتىن كەزدەسۋگە قاتىسادى. نوۆاكتىڭ سوزىنشە, رف بۇل كەزدەسۋگە كوپتەگەن ەلدەرگە شاقىرتۋ جىبەرىلەتىندىگىنە, ولاردىڭ اراسىندا اقش-تا بولاتىندىعىنان ءۇمىتتى.