جويىلىپ كەتۋ الدىندا تۇرعان ارالار انىقتالدى

سارىباس ارالار دەپ اتالاتىن گاۆاي ارالارى اقش-تا قۇرىپ بارا جاتقان تۇرلەردىڭ فەدەرالدىق تىزىمىنە قوسىلدى. بۇل تۋرالى BBC News حابارلادى. تابيعات قورعاۋ ۇيىمدارى سارىباس ارالاردىڭ جوعالۋىنا سەبەپشى فاكتورلار رەتىندە ءومىر ءسۇرۋ ورتاسىنىڭ تارىلۋىن, ورمان ورتتەرىن جانە بوتەن جاندىكتەر مەن وسىمدىكتەردىڭ كوبەيۋىن اتايدى. بۇل ارالاردىڭ ايرىقشا ماڭىزدىلىعى, ولار گاۆاي ارالدارىنداعى كەيبىر قۇرىپ بارا جاتقان وسىمدىكتەردى توزاڭداندىرادى. تابيعاتتى قورعاۋمەن اينالىساتىن Xerces Society ۇيىمىنىڭ بىرنەشە جىل بويى جۇرگىزگەن زەرتتەۋلەرى نەگىزىندە سارىباس ارالاردىڭ 7 ءتۇرى قۇرىپ بارا جاتقان تۇرلەر قاتارىنا كىرگىزىلىپ وتىر. ۇيىم جەتەكشىلەرىنىڭ ءبىرى سارينا دجەپسونانىڭ ايتۋىنشا, الەمنىڭ وزگە بولىكتەرىنەن سارىباس ارالاردى كەزدەستىرۋگە بولادى. الايدا, قازىر گاۆاي ارالدارىنىڭ سارىباس ارالارى قورعاۋعا الىنىپ وتىر. ويتكەنى, مانا ايتىلعانداي ولار مۇنداعى كەيبىر وسىمدىك تۇرلەرىن قۇرىپ كەتۋدەن ساقتايدى. ول وسىمدىكتەردى ارالاردىڭ باسقا تۇرلەرى دە توزاڭداندىرا الادى. ايتسە دە, سارىباس ارالار جوعالعان جاعدايدا ول وسىمدىكتەر جويىلادى. دجەپسونانىڭ ايتۋىنا قاراعاندا, سارىباس ارالارعا جابايى شوشقالار مەن شىبىنداردىڭ كەيبىر باسقىنشى تۇرلەرى قاۋىپ توندىرۋدە. سارىباس ارالاردى قۇرىپ بارا جاتقان تۇرلەر تىزىمىنە كىرگىزۋگە 10 جىلدىق زەرتتەۋ جۇمىستارى قاجەت بولعان.