يراننىڭ PressTV تەلەارناسى ليۆيا ليدەرى مۋاممار كاددافيدىڭ ۇلى سايف ءال-اراب وپپوزيتسيونەرلەرگە قوسىلدى دەگەن اقپارات تاراتتى. اتالعان تەلەارنانىڭ دەرەكتەرىنە قاراعاندا, اكەسى ۇلىنا كۇش قۇرىلىمدارىنىڭ وپپوزيتسيا جاعىنا ءوتۋىن بولدىرماۋ جونىندە تاپسىرما بەرگەن كورىنەدى.
بىراق ۇلى قارسىلىق اكتسياسىنا قاتىسۋشىلار جاعىنا شىعىپ كەتكەنگە ۇقسايدى. سونداي-اق ول اكەسى بيلىكتە قالۋىنا تىكەلەي قاتەر تونگەن جاعدايدا وزىنە ءوزى قول سالۋ نەمەسە وڭتۇستىك امەريكاعا قاشۋ مۇمكىندىگىن قاراستىراتىنىن جاريا ەتكەن. ال باسقا اقپارات كوزدەرىنەن ءال-ارابتىڭ وپپوزيتسيا جاعىنا وتكەنى تۋرالى مالىمەت تاراعان جوق.
الجير توتەنشە جاعداي رەجىمىن الدى
الجيردە 19 جىل بويى كۇشىندە بولعان توتەنشە جاعداي رەجىمى الىنىپ تاستالدى. بۇل ەل قارۋلى كۇشتەرىنىڭ ىشكى قاۋىپسىزدىك ماسەلەلەرىنە ارالاسۋى ايتارلىقتاي شەكتەلەتىنىن بىلدىرەدى.
الجير باسشىلىعى توتەنشە جاعداي الىنىپ تاستالعانىمەن, تەررورلىق ۇيىمدارمەن كۇرەس جالعاساتىنىن ايتىپ وتىر. توتەنشە جاعداي رەجىمى الجيردە 1991 جىلعى سايلاۋدا يسلاميستەر جەڭىسكە جەتكەنىمەن, ونىڭ ناتيجەلەرى ەسەپكە الىنباي تاستالعاننان كەيىن ەنگىزىلگەن ەدى. ول يسلاميستەر مەن زايىرلى مەملەكەت جاقتاستارى اراسىندا جانجال بەلەڭ العاندىقتان, ازاماتتاردىڭ قۇقىقتارى مەن بوستاندىقتارىن شەكتەي تۇرۋدى قاراستىرعان بولاتىن. بىراق توتەنشە جاعدايدىڭ 19 جىلعا سوزىلاتىنىن سول كەزدە ەشكىم دە بولجاماعان شىعار.
كۋبا ديسسيدەنتى ءۇشىنشى مارتە بوساتىلدى
كۋبا پوليتسياسى ۇكىمەتكە قارسى ۇران كوتەرگەن ديسسيدەنت گيلەرمو فارينياستى ءبىر اي ىشىندە ءۇش رەت تۇتقىنداپ, سونشا رەت بوستاندىققا شىعاردى. ول سوڭعى رەت 23 اقپاندا قاماۋعا الىنعان بولاتىن.
فارينياستىڭ جالعىزىلىكتى اكتسياسى كۋبالىق ساياسي تۇتقىن ورلاندو ساپاتانىڭ قازا بولعانىنىڭ ءبىر جىلدىعىنا ارنالعان-تىن. ول وتكەن جىلدىڭ 23 اقپانىندا 85 كۇنگە سوزىلعان اشتىقتان سوڭ كوز جۇمعان ەدى. كۋبانىڭ ادام قۇقىعى جونىندەگى كوميسسياسىنىڭ مالىمەتتەرىنە قاراعاندا, سول كۇنى بۇكىل ەل بويىنشا 183 ادام ۇستالعان. ولاردىڭ 65-ءى ءالى قاماۋدا وتىر ەكەن.
پاكستان جاساعىنىڭ كواليتسياعا قاستاندىعى
قارۋلى جاساقتاردىڭ پاكستاننىڭ سولتۇستىك-شىعىسىنداعى تيەۋ تەرمينالىنا شابۋىلى بارىسىندا ناتو-نىڭ 12 جانار ماي تاسيتىن جۇك كولىگى جويىلىپ جىبەرىلگەن. وقيعا سالدارىنان ءتورت ادام كوز جۇمسا, التاۋى دەنە جاراقاتتارىن العان.
شابۋىلعا 25 قارۋلى جاساق قاتىسسا, ولار 18 اۆتوكولىكتىڭ 12-سىنە ۋاقىتپەن جارىلاتىن بومبا ورناتقان ەكەن. تسيستەرنالارداعى وتىن اۋعانستانداعى كواليتسيالىق اسكەرلەرگە ارنالىپتى. ازىرشە ەشبىر تەررورلىق ۇيىم جارىلىسقا جاۋاپكەرشىلىكتى ءوز مويىندارىنا الا قويعان جوق.
قىرعىز ازاماتىن ولتىرگەن كەشىرىلدى
2006 جىلى ماناس اۋەجايىندا ورنالاسقان اقش-تىڭ اۆيابازاسىندا قىرعىزستان ازاماتىن اتىپ ولتىرگەن امەريكالىق ءاسكەري قىزمەتشى زاكاري حەتفيلد رەسمي تۇردە كىنالى ەمەس دەپ تانىلدى. بۇل جونىندە اۆيابازانىڭ باستىعى دۋايت سوۋنز حابارلادى.
سوۋنزدىڭ سوزىنە قاراعاندا, اقش-تا تەرگەۋ جۇمىستارى ءجۇرگىزىلىپ, سوت بولىپ وتكەن. ونىڭ بارىسىندا سۋديالار حەتفيلدتىڭ كىناسىنە ايعاقتىڭ جەتكىلىكسىزدىگىن كولدەنەڭ تارتىپ, ونى اقتاپ الىپ قانا قويماي, امەريكالىق سولداتتىڭ قارۋدى ورىندى قولدانعانىن اتاپ كورسەتكەن. ال قىرعىز جاعىنىڭ ۇستانىمى بۇعان مۇلدەم قاراما-قايشى.
ليتۆانىڭ تاۋەلسىزدىگىن ساۋداعا سالعان
كسرو-نىڭ بۇرىنعى پرەزيدەنتى ميحايل گورباچەۆ شۆەتسيانىڭ باس كونسۋلى داگ سەباستيان الاندەردىڭ 1990 جىلى كەڭەس وداعى ليتۆا تاۋەلسىزدىگى ءۇشىن رەسپۋبليكادان كلايپەدانى ءبولىپ الىپ, قوسىمشا 21 ميلليارد رۋبل تالاپ ەتكەنى تۋرالى قۇپيا مالىمەتىن تەرىسكە شىعاردى.
م.گورباچەۆ سول جىلدارى ليتۆانىڭ شىن مانىندە كسرو قۇرامىنان شىققىسى كەلگەنىن مويىنداي وتىرىپ, قۇپيا اقپاردى تىم ەركىن اسىرەلەۋشىلىك دەپ باعالادى. «اتالعان ماسەلە بويىنشا ەشقانداي ساۋدا بولعان جوق», دەدى ول قۇپيا مالىمەتكە وراي. بىراق, جەل بولماسا, ءشوپتىڭ باسى قيمىلدامايتىنى بەلگىلى ءجايت ەمەس پە؟!
اقش-تىڭ باس اسكەريى باحرەينگە كەلدى
اقش شتابتار باستىعى بىرلەسكەن كوميتەتىنىڭ توراعاسى مايك ماللەن اقپان ايىنىڭ ورتاسىنان باستاپ ۇكىمەتكە قارسى نارازىلىق اكتسيالارى وتكەن باحرەينگە اتباسىن تىرەدى. اۋەجاي باسىندا ول جۋرناليستەرگە باحرەين اقش-تىڭ ءوڭىردەگى شەشۋشى وداقتاستارىنىڭ ءبىرى بولعانىن جانە بولىپ قالا بەرەتىنىن مالىمدەدى.
ساپارى بارىسىندا ماللەن باحرەين كورولى حاماد بەن يسا ءال-حاليفامەن جانە تاق مۇراگەرى سالمانمەن كەزدەستى. اقش-تىڭ باس اسكەريىنىڭ باحرەينگە ساپارى ونىڭ تاياۋ شىعىس ەلدەرىنە تۋرنەسى شەڭبەرىندە بولىپ ءوتتى. بۇعان دەيىن ماللەن ساۋد ارابياسىندا, كاتاردا جانە وماندا ايالداعان ەدى.
قىسقا قايىرىپ ايتقاندا:
• شۆەيتساريا باسشىلىعى ليۆيا باسشىسى مۋاممار كاددافيدىڭ بارلىق ەسەپ-شوتتارى مەن اكتيۆتەرىنە توسقاۋىل قويۋ تۋرالى بۇيرىق شىعاردى. شۆەيتساريا كاددافيدىڭ نارازىلىق اكتسياسىنا قاتىسۋشىلارعا كۇش قولدانعانىن جازعىرىپ وتىر.
• جاڭا زەلانديادا بولعان جەر سىلكىنىسىنەن قازا تاپقاندار سانى سوڭعى دەرەك بويىنشا 110 ادامعا جەتكەن. 200 ادام جوعالىپ كەتكەندەر ساناتىندا. بۇگىندە بۇل ەلدە قيراندىلاردىڭ استىندا ءتىرى قالعاندار جوق دەۋگە بولادى.
• اقش-تا كىشى دجوردج بۋشتىڭ ءۇيىن جارىپ جىبەرۋدى جوسپارلاعان ساۋد ارابياسىنىڭ ازاماتى تۇتقىندالعان. 20 جاستاعى حاليد ءالىم ءالداۆساري قۇراما شتاتتارعا 2008 جىلى ستۋدەنتتىك ۆيزا بويىنشا كەلگەن كورىنەدى.
• سانكت-پەتەربۋرگتە 92 جاسقا قاراعان شاعىندا رەسەيدىڭ ستراتەگيالىق اتوم سۇڭگۋىر قايىقتارىنىڭ باس كونسترۋكتورى سەرگەي كوۆالەۆ ومىردەن ءوتتى. ونىڭ جوباسى بويىنشا بارلىعى 92 سۇڭگۋىر قايىق جاسالعان ەكەن.
ينتەرنەت ماتەريالدارى نەگىزىندە ازىرلەندى.
