قىزىلوردا وبلىسىنىڭ اكىمى ۇزدىك مۇعالىمدەرمەن كەزدەستى

«ءبىلىم ينەمەن قۇدىق قازعانداي» بولعاندا, سول جولدا باعىت-باعدار بەرىپ, ءجون سىلتەپ, جول كورسەتەتىن بىردەن-ءبىر ادام – ۇستاز. قازاق «ۇستازى جاقسىنىڭ – ۇستانىمى جاقسى» دەگەندە وسىنى مەڭزەسە كەرەك. بالاعا ۇيرەتۋدەن جالىقپايتىن, ەڭبەگىم ەلەنبەدى دەپ قامىقپايتىن, شاكىرتتىڭ قارىم-قابىلەتىن انىقتايتىن ماماندىق يەلەرىن قالاي دارىپتەسەك تە, قۇرمەت كورسەتسەك تە ارتىقتىق ەتپەيدى. ۇستازدار مەرەكەسىنە وراي قى­زىل­وردا وبلىسىنىڭ اكىمى قى­رىمبەك كوشەرباەۆ ايماقتاعى جا­ڭا­شىل پەداگوگتار مەن ارداگەر-ۇستازداردى قابىلدادى. وعان قى­زىل­وردا قالاسى جانە اۋدانداردان كەلگەن 3 ءبىلىم ارداگەرى مەن 38 جاڭا­شىل مۇعالىم قاتىستى. كەزدەسۋ بارىسىندا سىر­داريا اۋدانىنان كەلگەن 80 جاستاعى مۇقاش ءجۇسىپوۆا, 75 جاستاعى جال­اعاش اۋدانىنىڭ مۇعالىمى ءالتاي ءپىر­مانوۆ جانە قىزىلوردالىق 70 جاستاعى سايلاۋكۇل دەمەسىنوۆا ۇس­تاز­دىق ومىرىندەگى ۇلعاتتى جولىن ءاڭ­گىمە­لەپ, قىزىقتى ەستەلىكتەرىمەن ءبولىستى. جاڭاشىل ۇستازدار ءبىلىم بەرۋ جۇيەسىندەگى ادىستەر جايىندا ءسوز قوزعاپ, ايماقتاعى ءبىلىم سالاسىنىڭ وزەكتى ماسەلەلەرى جونىندە ويلارىن ورتاعا سالدى. – باۋىرجان مومىش ۇلىنىڭ «بولاشاقتىڭ باسشىسىن دا, داناسىن دا, عالىمىن دا ۇستاز وسىرەدى. ومىرگە ۇرپاق بەرگەن انالاردى قالاي ارداقتاساق, سول ۇرپاقتى تاربيەلەيتىن ۇستازداردى دا سولاي ارداقتاۋعا مىندەتتىمىز» دەگەن قاناتتى ءسوزى بار. جاس ۇرپاقتىڭ بويىنا جاقسى قاسيەتتەردى, وتانعا دەگەن سۇيىسپەنشىلىكتى دارىتىپ, ءومىردىڭ قىر-سىرىن تانىتاتىن, ارداقتى ۇستازدار, سىزدەرسىزدەر. ەل تاۋەلسىزدىگىنىڭ 25 جىلدىعىندا ۇستاز ەڭبەگىن ەرەكشە باعالاپ, اتاپ ءوتۋدى زاڭدىلىق دەپ بىلەمىن. مە­رەيلى مەرەكەلەرىڭىز قۇتتى بولسىن, – دەگەن ايماق باسشىسى ارداگەر-ۇس­تازداردى ماراپاتتاپ, باعالى سىيلىقتار تابىستادى. سونداي-اق, وبلىس اكىمى ءبىلىم بەرۋ سالاسىنىڭ جاڭاشىل مامان­دارىن قۇتتىقتاپ, ارنايى سىي-سيا­پاتتارمەن ماراپاتتادى. كەزدەسۋ سوڭىندا ماراپاتتالعان ۇستازدار قاۋىمى ايماق باسشىسىنا العىسىن ءبىلدىردى. سونداي-اق, ۇستازدار مەرەكەسىنىڭ اياسىندا نارتاي بەكەجانوۆ اتىن­داعى قازاق مۋزىكالىق دراما تەاترىندا «قالدىرعان ءىزىڭ ماڭگىلىك...» تاقىرىبىندا سالتاناتتى شارا ءوتتى. جيىندا وبلىس اكىمى قىرىمبەك كوشەرباەۆ الدىمەن ايماقتاعى ءبىلىم سالاسىنداعى اۋقىمدى جۇ­مىستارعا توقتالىپ, مۇعالىمدەردى مەرەكەلەرىمەن قۇتتىقتادى. – سوڭعى ءتورت جىلدا قىزىل­وردا وبلىسىندا ءبىلىم بەرۋ سالاسىنىڭ بيۋدجەتى ەكى ەسەگە ارتتى. بيىلعى جىلدىڭ وزىندە ءبىلىم بەرۋ سالاسىنا وبلىس بيۋدجەتىنىڭ 38 پايىزى, ناقتىراق ايتساق, 75 ميلليارد تەڭگە ءبولىندى. «سەر­پىن» باعدارلاماسى بويىنشا 3 829, رەسەيدىڭ ۇزدىك جوعارى وقۋ ورىن­دارىنداعى 390 ءتۇ­لەكتىڭ سىر ەلىنىڭ جاستارى ەكەندىگى ءبىزدى قۋانتادى. ءبىلىم بەرۋدى تاربيەمەن جاڭاشا ۇشتاستىرىپ, ونىڭ ساپاسىن كوتەرۋ – مارتەبەسى بيىك, ماڭىزى زور, جالپىۇلتتىق مۇددە. سول ۇلى ىستە ابىرويلارىڭىز اس­قاق بولسىن, مارتەبەلى ۇستازدار, – دەدى قىرىمبەك ەلەۋ ۇلى. سونىمەن قاتار, «ۇزدىك مۇ­عالىم-2016» اتالىمى بويىنشا م.مامەتوۆا اتىنداعى گۋما­ني­­تارلىق كوللەدجدىڭ مۇعالىمى گۇلجاينا ابيەۆا, دارىندى بالا­لارعا ارنالعان №4 مەكتەپتىڭ مۇعا­لىمى شاھيزات بەيسەنوۆا, №3 مەكتەپ-گيمنازيانىڭ مۇعالىمى سال­تانات تاجەتاەۆا جانە نازارباەۆ زياتكەرلىك مەكتەبىنىڭ مۇعالى­مى جادىرا اجىباەۆا 2 ميلليون تەڭگەگە يە بولدى. ايتا كەتەيىك, وبلىستا جالپى ورتا ءبىلىم بەرەتىن مەكتەپتەردە بارلىعى 18 423 مۇعالىم قىزمەت ەتەدى. ونىڭ ىشىندە ءبىرىنشى جانە جوعارى ساناتتى مۇعالىمدەردىڭ ۇلەسى 45,5 پايىزدى قۇرايدى. ەرجان بايتىلەس, «ەگەمەن قازاقستان» قىزىلوردا