قازاق راديوسى 95 جىلدىعىن اتاپ ءوتتى
ميلليونداردىڭ تاڭداۋى تۇسكەن جەڭىمپازدار
بيىل ءتورتىنشى رەت ۇيىمداستىرىلعان « ۇلى دالا داۋىسى» حالىقارالىق راديوفەستيۆالى قازاق مۋزىكا ونەرىن زاماناۋي, باسەكەگە قابىلەتتى فورماتتا حالىقارالىق دەڭگەيدە ناسيحاتتاۋدى جانە تىڭداۋشىنىڭ تالعامىنان شىققان شىعارمالار ارقىلى ورىنداۋشىلىق ونەردى ىنتالاندىرۋدى ماقسات ەتەدى. جوبا بۇل ۇدەدەن شىعىپ كەلە جاتىر دەۋگە نەگىز بار. سەبەبى, « ۇلى دالا داۋىسى» راديوفەستيۆالى بۇل كۇندە تانىمال جوبالاردىڭ بىرىنە اينالعان. القالى جيىندا ءسوز العان اقپارات جانە كوممۋنيكاتسيالار ءمينيسترى داۋرەن اباەۆ ەلباسى ن.ءا.نازارباەۆتىڭ قازاق راديوسىن 95 جىلدىق مەرەيتويىمەن قۇتتىقتاعان حاتىن وقىپ بەردى. «سىزدەر ءبىر عاسىرعا جۋىق ۋاقىت بويى حالقىمىزدى تانىمى تەرەڭ, مازمۇنى زور حابارلارمەن سۋسىنداتىپ كەلەسىزدەر. تاۋلىك بويى حابار تاراتاتىن قازاق راديوسى ەل تاۋەلسىزدىگىن تۇعىرلى ەتۋگە قالتقىسىز قىزمەت ەتىپ كەلەدى. ەل بىرلىگىن نىعايتۋعا لايىقتى ۇلەس قوسۋدا. بۇگىنگى مەرەيلى شاقتا زور دەنساۋلىق پەن بەرەكە-بىرلىك, شىعارماشىلىق تابىستار تىلەيمىن. جاعىمدى جاڭالىقتاردىڭ جارشىسى بولىپ, ماڭگىلىك ەلدىڭ مىزعىماس قۇندىلىقتارىن بارشا حالىقتىڭ جۇرەگىنە جەتكىزە بەرىڭىزدەر», دەلىنگەن حاتتا. سونداي-اق, بەلگىلى مەملەكەت جانە قوعام قايراتكەرى مىرزاتاي جولداسبەكوۆ ءوز كەزەگىندە راديونىڭ رۋحاني قۇندىلىقتاردى دارىپتەۋدە, ونى حالىقتىڭ جۇرەگىنە جەتكىزۋدە ماڭىزى زور ەكەنىن ايتتى. «قازاق راديوسى – ءبىزدىڭ التىن ساندىعىمىز. شالقىعان ءانىمىز, تولقىعان كۇيىمىز», دەگەن ول قازاق راديوسىنىڭ كىتاپحاناسىنا 8 تومدىق كىتابى مەن بەلگىلى سازگەر ءىليا جاقانوۆتىڭ ءوزى جايلى جازعان «دۇنيە شىركىن» كىتابىن سىيعا تارتتى. كەشتە قۇتتىقتاۋ ءسوز «قازاقستان» رترك» اق باسقارما توراعاسى نۇرجان مۇحامەدجانوۆا تاراپىنان دا ايتىلدى. ول راديونىڭ تاريحىنا, قىزمەتىنە, ءمان-ماڭىزىنا, شىعارماشىلىق ۇجىمنىڭ وكىلدەرىنە توقتالىپ, بۇگىنگىدەي جوبالاردىڭ جالعاسىن تابا بەرۋىنە تىلەكتەستىگىن ءبىلدىردى. جالپى, « ۇلى دالا داۋىسى» حالىقارالىق جوباسى تەك راديوفەستيۆال عانا ەمەس, بەدەلدى مۋزىكالىق شەرۋ دەپ ايتساق تا بولادى. قازاق راديوسىنىڭ ميلليونداعان تىڭدارماندارى 5 اي بويىنا ينتەرنەت جەلىسى ارقىلى سۇيىكتى اندەرىنە داۋىس بەرىپ, ءوز جەڭىمپازدارىن انىقتايدى. اتاپ وتەر نارسە – فەستيۆالعا قاتىسۋشى شەتەلدىك ۇمىتكەرگە قازاق ءانىن ورىنداۋ نەمەسە ءوز حالقىنىڭ ءانىن قازاق تىلىندە ورىنداۋ تالابى قويىلادى. بيىلعى داۋىس بەرۋ ناتيجەلەرى ميلليونعا جەتىپ, ەكى اپتا بويىنا العاشقى ۇشتىكتەن كورىنگەن ورىنداۋشىلار عانا فينالعا جولداما العان. ال فينالدا 40 پايىز تىڭدارمان, 40 پايىز ماماندار ساراپتاۋى, سونداي-اق, 20 پايىز جوبا ۇيىمداستىرۋشىلارىنىڭ ۇسىنىسى ارقىلى « ۇلى دالا داۋىسى» سىيلىعىنىڭ يەگەرلەرى انىقتالعان. سونىمەن بيىلعى راديوفەستيۆالعا ەلىمىزدەن جانە رەسەي, تۇركيا, ۋكراينا, بەلورۋسسيادان 60 شاقتى ءانشى قاتىسىپ, ونىڭ 16-سى جەڭىمپاز اتاندى. اتاپ ايتقاندا, «ۇزدىك توپ» اتالىمى بويىنشا – «رينگو» توبى, «جىگىتتەر اراسىنداعى ۇزدىك جەكە ورىنداۋشى» اتالىمىمەن – ايقىن تولەپبەرگەن, «جىلدىڭ ۇزدىك پاتريوتتىق ءانى» اتالىمىندا – نۇرعالي تۇرلىبەكوۆ, «ۇزدىك ەسترادالىق ورىنداۋشى» اتالىمى بويىنشا – ءمولدىر اۋەلبەكوۆا جانە «ۇزدىك ەتنو-ەسترادالىق ورىنداۋشى» اتالىمىندا ارداق بالاجانوۆا ۇزدىك دەپ تانىلدى. ءداستۇرلى ونەر وكىلدەرى اراسىندا «جىگىتتەر اراسىنداعى ۇزدىك ءداستۇرلى ورىنداۋشى» اتالىمى بويىنشا – ارمات يسلامعاليەۆ, «قىزدار اراسىنداعى ۇزدىك ءداستۇرلى ورىنداۋشى» اتالىمى بويىنشا ءزۇلفيا بايمىرزا جەڭىمپاز اتاندى. جوباعا بيىل جاڭا نوميناتسيالار قوسىلعانىن ايتۋىمىز كەرەك. «ۇزدىك دومبىراشى», «ۇزدىك قوبىزشى», «ۇزدىك ۇلتتىق اسپاپتىق ۇجىم», «ۇزدىك ەتنو-روك» اتالىمدارى بويىنشا جەڭىمپازدار انىقتالدى. ولار: قۇرمانعازى كۇيىن ورىنداعان جاراس ساتىبالديەۆ, ىقىلاستىڭ كۇيىمەن سايان اقمولدا, «سارىارقا» توبى جانە « ۇلىتاۋ» روك توبى. ال بيىلعى «جاڭا ەسىم» اتالىمىن مارسەل كۋتۋەۆ (باشقۇرتستان), يان كوستىركو (ۋكراينا), چينگيس لي (رەسەي), وكسانا ۆويتەشيك (بەلورۋسسيا) جانە جەم گۋردالدار (تۇركيا) يەلەندى. جەڭىمپازداردى ماراپاتتاۋ كەشىندە اتالعان ونەرپازداردىڭ كوپشىلىگى ءوز ونەرلەرىن ورتاعا سالدى. ولارعا « ۇلى دالا داۋىسى» جوباسىنىڭ ارنايى ەكسكليۋزيۆتى ستاتۋەتكالارى مەن ديپلومدارى سالتاناتتى تۇردە تابىستالدى.
راديو اشۋعا احمەت بايتۇرسىنوۆتىڭ ىقپالى بولعان
