«Kazakhstan Open» – گولف ويىندارىنىڭ جاڭا تاريحى

الماتى قالاسىندا گولفتان «Kazakhstan Open» حالىقارالىق ءتۋرنيرى وتەتىنىن بۇعان دەيىن دە جازعان ەدىك. بۇگىن الەمنىڭ 132 ەلىنەن ارنايى كەلگەن ويىنشىلار «جايلاۋ» گولف كەشەنىندە جينالىپ, تانىسۋ ءراسىمىن وتكىزەدى. ون ەكىنشى جىل قاتارىنان ءوتىپ, داستۇرگە اينالعان جارىستىڭ تىزگىن قاعار ساتىندە قازاقستان گولف فەدەراتسياسىنىڭ باس حاتشىسى كونستانتين ليفانوۆتى سوزگە تارتقان ەدىك. – كونستانتين, ءسىز «Kazakhstan Open» ءتۋرنيرىن ءو­تكىزۋ جۇمىستارىنىڭ باسى-قاسىن­دا جۇرگەلى ءبىرشاما جىل بولعان ەكەن. بۇل حالىقارالىق ءتۋرنيردىڭ باستى جەتىستىگى نەدە؟ اۋەلگى ماقسات ورىندالدى ما؟ – جەتىستىكتەردى سانامالايتىن بول­ساق, وتكەن ون ەكى جىلدىق تاري­حى­مىزداعى جۇمىستار ۇزاق اڭگى­مەنىڭ ارقاۋى بولار ەدى. ال ەڭ باس­تى جەتىستىگىمىز دەپ, قازاقستان توپى­راعىندا گولف ويىندارىنىڭ قالىپ­تاسىپ بولعانىن تولىق سەنىم­مەن ايتا الامىن. وسىدان ون ەكى جىل بۇرىن ەلىمىزگە الەمدىك سپورت ەلي­تاسىنىڭ نازارىن اۋدارا­تىن­­­داي تۋرنير وتكىزۋ قاجەتتىگىن مەم­­­لەكەت باسشىسى نۇرسۇلتان نازارباەۆ نىقتاپ تاپسىرعان بولاتىن. حالىقارالىق ارەناعا بارىس بەينەلى ەلدىڭ داڭقىن پاش ەتۋ ءۇشىن ءتيىستى تاپسىرما العان ماماندار­دىڭ ەڭبەگى مەن ەلباسىنىڭ يدەيا­سى جەمىسىن بەردى. 2004 جىلى لوندون­­داعى ەۋروپالىق تۋردى ۇيىمداس­تىرۋ­شىلاردىڭ وفيسىندە العاشقى كەزدەسۋ ءوتتى. شىنىمدى ايتسام, ءدال سول ساتتە بۇل يدەيانىڭ ساناۋلى جىل­داردا, ءساتتى جۇزەگە اساتىن­دى­عى­نا گولفتىڭ قىر-سىرىنا قا­نىق ماماندار تۇگىلى ءوزىم دە اسا سەنىمدى ەمەس ەدىم... ويتكەنى, ول كەزەڭ­دە ەۋروپادا قازاقستان جاي­­لى ماعلۇمات وتە از ەدى. ءبىزدىڭ سپورت ەلى ەكەنىمىزدى ىلەۋ دە بىرەۋ عا­نا مو­يىندايتىن. ءبىزدى وتە اۋىر سىناق كۇتىپ تۇردى. كەرەمەت جۇ­مىس جاسالدى. ناتيجەسىندە, اراعا ءبىر جىل سالىپ العاشقى حالىق­ارا­لىق تۋرنير وتكىزۋگە قول جەت­كىز­دىك. جانە قانداي تۋرنير دەڭىز؟ شەتەل­دەن 130 ويىنشى شاقى­رىپ, تالاپ­قا ساي ويىن الاڭىن تانىس­تىر­عانىمىزدا, ولاردىڭ اۋىزدارى اشىلىپ قالىپ ەدى... ءبىز سول جولى قازاقتىڭ قوناقجايلىلىعىمەن قاتار گولفتى دە ەۋروپالىقتاردان كەم وينامايتىندىعىمىزدى مويىنداتىپ جىبەرگەن ەدىك. – دەمەك, «Kazakhstan Open» ءتۋرنيرىن وتكىزۋ ەلىمىز ءۇشىن يميدج قالىپتاستىرۋ جولىن­داعى جاڭا قادامنىڭ ءبىرى بولعان ەكەن. ال الەم ويىنشىلارى ءۇشىن قازاقستان تەك ويىن الاڭ­دارىن ۇسىنۋشى ەل بولىپ وتىر ما؟ الدە, بىزدە وتەتىن تۋرنيرلەر جاھاندىق جارىستاردىڭ الدىن­داعى «ەت قىزدىرۋ» ويىندارى سانالا ما؟ – ويىڭىزدى ۇققاندايمىن. مىنانى قاراڭىز, ءبىز جىل سايىن وتكىزەتىن تۋرنير European Challenge Tour اتتى ۇلكەن ويىننىڭ ءبىر بۇتاعى ىسپەتتى. وسى جەردە جەڭىسكە جەتكەن ويىنشىلار لوندونعا جولداما الادى. بۇل – گولف تاريحىنا ەنگەن ءداستۇر. ەندى دۇنيە جۇزىندەگى گولف ويىندارىنىڭ تاريحى قازاقستانسىز جازىلمايتىن بولدى. ايتپاقشى, وسى الماتىنىڭ جاسىل قىراتىندا العاش رەت چەمپيون اتانعاندار بار. قازىر الەمنىڭ گولف جانكۇيەرلەرى تابىناتىن مارك كايمەر, الۆارو كيروس, ەدۋاردو موليناري, توممي فليت­ۆۋد سياقتى جۇلدىزداردىڭ تۇ­ساۋىن «Kazakhstan Open» كەسكەن ەدى... – ال ءوز ويىنشىلارىمىز شە؟ مىسالعا, الەم ءبىزدى گولف وينايتىن ەل قاتارىنا قوسا ما؟ – 2004 جىلى وسى قىزمەتكە كەل­گەنىمدە گولفكە قىزىعۋشىلىق تانى­تاتىنداردىڭ بارلىعىن تۇستەپ تانيتىن ەدىم, ءارى كەتكەندە 20 ادام بولاتىن. قازىر ءبىزدىڭ كورت­تارىمىزعا اۋەسقوي ويىن­شى­لار كەزەككە تۇرادى دەسەم سەن­بەسسىز... كاسىپقويلار كلۋبىندا ءۇش جۇزدەن اسا مۇشە بار. جەرلەسىمىز, ماقتانىشىمىز داۋلەت تۇرلىباەۆ ەۋروپالىق تۋرنيرلەردە توپ جارىپ, «كاسىبي گولف ويىنشىسى» اتاعىن يەلەنگەن. European Tour سەريالارىنا قاتىسادى. – وتاندىق گولفتىڭ دامۋى تۋرالى ايتقاندا, تەك الماتىمەن شەكتەلەمىز بە, الدە... – الماتىدا ەكى ۇلكەن گولف الاڭى بارىن بىلەسىزدەر, ولار دۇنيەجۇزىلىك تالاپ بويىنشا ساناۋلى 20 ورىنداردىڭ قاتارىنا كىرەدى. ال ەلىمىزدەگى گولفتىڭ دامۋى جاڭا كەزەڭگە ءوتتى دەسە دە بولا­­دى. فەدەراتسيا پرەزيدەنتى نۇر­­تاي ابىقاەۆتىڭ تىكەلەي تاپسىر­ماسى بويىنشا بارلىق ايماقتا بولىمشەلەر قۇرىلىپ جاتىر. اس­تانا, اقتاۋ, قاراعاندى, شىم­كەنت, قوستاناي جانە تالدىقورعاندا جۇمىس باستالدى. قازىر الەمدە گولف ويىندارى بۇقارالىق سيپات الىپ كەلەدى. وليمپيادا ويىن­دارى­نىڭ ساناتىنا قوسىلدى. بيىل تۇڭعىش رەت ريودا گولفتان الەم چەم­پيونىن تانىدىق. قىسقاسى, قازاقستانداعى گولفتىڭ دامۋىنان جارقىن بولاشاق كۇتۋگە بولادى. – كونستانتين مىرزا, سوڭعى سۇراق. مىنا باستالعان تۋرنيردە ەلىمىزدىڭ تۋىن ۇستاپ شىعاتىن ويىنشىلار بار ما؟ – ارينە, الەمنىڭ نازارى بىزگە اۋىپ وتىرعاندا ءارى ءوز توپى­را­عىمىزدا تۇرعاندا ويىننىڭ قازاق­ستانسىز ءوتۋى قيسىنسىز بولار ەدى. ءبىز ەل ىشىندە كىشى چەمپيونات وتكىز­گەنبىز. توپ جارعان ويىنشىلار تۋرنيرگە قاتىسادى. ەرتەڭنەن باس­تاپ نۇرتاي سالداروۆ پەن زيات سەيىل­ب­ەكوۆتەردىڭ ويىندارىن تاما­شا­لايتىن بولامىز. ەكەۋى دە اۋەس­قوي گولفشى. ال كاسىپقوي شە­بەر­­لەر­دىڭ قاتارىندا الەكساندر ۆون­گاي ويناماقشى, بۇل جىگىتتى جۇرت بالالار گولفى اكادەمياسىنىڭ ديرەكتورى رەتىندە تانۋى ءتيىس. جالپى, ءوزىمىزدىڭ ويىنشىلار جايلى ءجيى جازىپ تۇرساڭىزدار ەكەن. «ەگەمەن قازاقستاننىڭ» وقىرماندارىنا گولف ويىنى تۋرالى ءبىلۋ قىزىقتى دەپ ويلايمىن. جانە ءبىزدىڭ باس اقپاراتتىق سەرىكتەسىمىز رەتىندە ەسى­گى­مىز اشىق, ءبارىڭىزدى ويىننىڭ قونا­عى بولۋعا شاقىرامىن. – ەندەشە, جەڭىس جولىندا جولىعايىق! اڭگىمەلەسكەن قالماحانبەت مۇقامەتقالي, «ەگەمەن قازاقستان»  الماتى