فۋتبولدان قازاقستان پرەمەر-ليگاسىنىڭ كەزەكتى ماۋسىمى اياقتالار تۇس تاياپ كەلەدى. بۇگىندە چەمپيوندىقتان ءۇمىتتى ەكى-اق كوماندا قالدى. ولار – «استانا» مەن الماتىنىڭ «قايراتى». دەمالىس كۇندەرى بولعان 28-تۋر
ويىندارىندا ەكى كوماندا دا قارسىلاستارىنان 1:0 ەسەبىمەن باسىم ءتۇستى.
بۇل تۋردا اتالعان ەكى مىقتى ءوز كەزدەسۋلەرىن سىرت الاڭداردا وتكىزدى. تۋرنير كەستەسىندە كوش باستاپ كەلە جاتقان «استانا» شىمكەنتتە جەرگىلىكتى «ورداباسىن» جەڭسە, «قايرات» «اقتوبەدەن» ايلاسىن اسىردى. قوس كەزدەسۋدە دە ويىن تاعدىرىن جالعىز گول شەشكەنىن جوعارىدا ايتتىق. تاعى ءبىر سايكەستىك, ەكى ماتچتا دا گول ءبىرىنشى تايمدا سوعىلدى. «استانا» ساپىنان ويىننىڭ 44-مينۋتىندا جۋنيور كابانانگا مەرگەندىگىمەن كوزگە ءتۇستى. ال «قايرات» 35-مينۋتتا سوعىلعان رەسەيلىك لەگيونەر اندرەي ارشاۆين گولىنىڭ ارقاسىندا جەڭىسكە جەتتى.
ءبىرىنشى التىلىقتىڭ تاعى ءبىر كەزدەسۋى كوكشەتاۋدا ءوتتى. ءوز الاڭىندا پاۆلوداردىڭ «ەرتىسىن» قابىلداعان جەرگىلىكتى «وقجەتپەس» قارسىلاسىنا 1:4 ەسەبىمەن ەسە جىبەردى. وسى جەڭىسىنەن كەيىن «ەرتىس» 44 ۇپايمەن تۋرنير كەستەسىندە ءۇشىنشى ورىنعا كوتەرىلدى.
ايتا كەتەيىك, 28-تۋردىڭ شىمىلدىعى سەنبى كۇنى قوستانايدىڭ «توبىلى» مەن تالدىقورعاننىڭ «جەتىسۋى» اراسىنداعى ماتچپەن اشىلعان بولاتىن. ءوز جانكۇيەرلەرى الدىندا نامىسقا سالماق سالعان قوستانايلىقتار ويىندا 3:2 ەسەبىمەن جەڭىسكە جەتتى. بۇل كەزدەسۋدىڭ وسى تۋرداعى ەڭ تارتىستى ويىن بولعانىن دا اتاپ وتكەن ءجون. ورالدا وتكەن جەرگىلىكتى «اقجايىق» پەن قاراعاندىنىڭ «شاحتەرى» اراسىنداعى كەزدەسۋدە كەنشىلەر 2:1 ەسەبىمەن باسىم ءتۇستى. وسىلايشا, «اقجايىقتىڭ» بەس ويىنعا دەيىن جەتكەن جەڭىس سەرياسىنا نۇكتە قويىلدى. ەكىنشى التىلىقتىڭ كەلەسى ويىنىندا «اتىراۋ» ءوز الاڭىندا «تارازدى» قابىلداپ, 1:0 ەسەبىمەن جەڭىسكە جەتتى.
ەل چەمپيوناتى ەندى ءتورت تۋردان كەيىن اياقتالادى. ازىرگە «استانا» مەن «قايراتتىڭ» قايسىسى چەمپيون بولاتىنىن تاپ باسىپ ايتۋ قيىن. ارينە, باستى قارسىلاسىنان 4 ۇپاي الدا كەلە جاتقان جانە ءبىر ويىنى كەم ەلوردالىقتاردىڭ مۇمكىندىگى جوعارى. الايدا ەۋروپا ليگاسى مەن قازاقستان كۋبوگى سايىستارىندا دا سىنعا تۇسەتىن ولاردىڭ باسەكەلەستىك تۇرعىدا وسالدىق تانىتۋى ابدەن مۇمكىن. «قايراتتىڭ» باستى كوزدەگەنى دە وسى ەكەنى تۇسىنىكتى.
ەلامان قوڭىر
26 قىركۇيەكتەگى تۋرنير كەستەسى
1-6-ورىندار ء(بىرىنشى التىلىق)
| № | كوماندالار | ويىن | جەڭىس | تەڭ | جەڭىلىس | د-ا. | ۇپاي |
| 1 | «استانا» | 27 | 21 | 2 | 4 | 43-19 | 65 |
| 2 | «قايرات» | 28 | 19 | 4 | 5 | 64-28 | 61 |
| 3 | «ەرتىس» | 28 | 13 | 5 | 10 | 43-29 | 44 |
| 4 | «ورداباسى» | 28 | 12 | 7 | 9 | 35-36 | 43 |
| 5 | «وقجەتپەس» | 27 | 12 | 4 | 11 | 37-34 | 40 |
| 6 | «اقتوبە» | 28 | 9 | 8 | 11 | 33-42 | 35 |
| 7-12-ورىندار (ەكىنشى التىلىق) | |||||||
| 7 | «توبىل» | 28 | 11 | 5 | 12 | 36-32 | 38 |
| 8 | «شاحتەر» | 28 | 9 | 6 | 13 | 18-32 | 33 |
| 9 | «اتىراۋ» | 28 | 8 | 9 | 11 | 26-32 | 33 |
| 10 | «جەتىسۋ» | 28 | 7 | 6 | 15 | 32-44 | 27 |
| 11 | «اقجايىق» | 28 | 8 | 2 | 18 | 20-47 | 26 |
| 12 | «تاراز» | 28 | 7 | 4 | 17 | 27-39 | 25 |
