ليۆياداعى جاعداي ۋشىعا ءتۇستى. اسكەريلەردىڭ ءبىراز بولىگى وپپوزيتسيا جاعىنا اۋىستى. ءبۇگىندە ەلدىڭ شىعىسى بيلىككە نارازىلاردىڭ قولىنا كوشىپ ۇلگەردى. ەگيپەت ليۆيامەن شەكاراسىن كۇشەيتۋ جونىندە شەشىم قابىلدادى.
جاڭا زەلانديانىڭ كرايستچەرچ قالاسىندا قۋاتى 6,3 بالدىق جەر سىلكىنىسى بولدى. ءزىلزالا سالدارىنان كەم دەگەندە 65 ادام قازا تاپقان. وپات بولعاندار سانى ءالى دە ارتاتىنى بايقالادى.
يراننىڭ ەكى اسكەري-تەڭىز كۇشتەرىنىڭ كەمەلەرى سۋەتس كانالىنا ەندى. يران ءوز كەمەلەرىن اتالعان كانالعا 1979 جىلدان بەرى العاش رەت ءتۇسىرىپ وتىر. يزرايل تارابى يراندىقتار جاعىنان قانداي دا ءبىر ارانداتۋ ارەكەتتەرى بايقالعان جاعدايدا كەمەلەردى جويىپ جىبەرەمىز دەپ مالىمدەدى.
قىرعىزدىڭ وپپوزيتسيالىق دەپۋتاتى ومىربەك تەكەباەۆ افريكا ەلدەرى مەن تاياۋ شىعىستاعى سوڭعى وقيعالار قىرعىزستاندا ءجۇزەگە اسقان توڭكەرىستىڭ ءناتيجەسى دەپ جاريالاپ جىبەردى.
رەسەي پرەزيدەنتى دميتري مەدۆەدەۆ كەشە سولتۇستىك وسەتيانىڭ استاناسى – ۆلاديكاۆكاز قالاسىنا ۇشىپ كەلىپ, ۇلتتىق انتيتەررورلىق كوميتەتتىڭ شۇعىل ءماجىلىسىن شاقىردى. ول سوڭعى كۇندەرى تۋريستەرگە قاتىستى بىرنەشە شۋلى قىلمىستار جاسالعان كاباردين-بالقار وقيعالارىنا ارنالدى.
اقش بۇۇ قاۋىپسىزدىك كەڭەسىنىڭ يوردان وزەنىنىڭ باتىس جاعالاۋىندا ەۆرەي قونىستارىن سالۋ ۇدەرىستەرى جالعاسۋىن جازعىرعان قارار جوباسىنا ۆەتو قويدى. بۇل اقش-تىڭ ب.وباما بيلىككە كەلگەلى ۆەتو قۇقىعىن العاش پايدالانۋى بولىپ تابىلادى جانە قۇراما شتاتتاردىڭ اتالعان ماسەلەگە قاتىستى ۇستانىمىن بىلدىرەدى.
ۇقشۇ باس حاتشىسى نيكولاي بورديۋجا قىرعىزستاننىڭ بۇرىنعى پرەزيدەنتى قۇرمانبەك باكيەۆ بيلىك قۇرىپ تۇرعان كەزدە ەلدىڭ كۇش قۇرىلىمدارى ەسىرتكى تاسىمالىن باقىلاۋىندا ۇستاعان دەپ مالىمدەدى. باس حاتشىنىڭ ايتۋىنشا, قازىرگى بيلىكتەگى كۇش قۇرىلىمدارىنىڭ دا ەسىرتكى تاسىمالىنا قاتىسى بار كورىنەدى. سوندىقتان, دەيدى ول, قىرعىز باسشىلىعىنا ەسىرتكى بيزنەسىنە قارسى كۇرەستە كومەك كەرەك.
امەريكا قۇراما شتاتتارىنىڭ رەسەي فەدەراتسياسىنداعى ەلشىسى دجون بايەرلي رف سىرتقى ىستەر مينيسترلىگىنە شاقىرىلدى. بۇل شاقىرۋعا اقش مەملەكەتتىك دەپارتامەنتىنىڭ كۋريل ارالدارىنا بايلانىستى اۋماقتىق كەلىسپەۋشىلىككە وراي قۇراما شتاتتاردىڭ جاپونيانى قولداعان سىڭاي تانىتۋى سەبەپ بولدى.
گەرمانيانىڭ كولەمى ءجونىنەن ەكىنشى قالاسى – گامبۋرگتە وتكەن سايلاۋدا كانتسلەر انگەلا مەركەلدىڭ حريستياندىق-دەموكراتيالىق وداعى (حدو) جەڭىلىسكە ۇشىرادى. وپپوزيتسياداعى سوتسيال-دەموكراتيالىق پارتيا (سدپ) ايقىن باسىمدىقپەن جەڭىسكە جەتتى. بيىل سايلاۋ تاعى التى فەدەرالدىق جەرلەردە وتەدى. مەركەل پارتياسىنا ايتارلىقتاي قاۋىپ بار.
ۋكراينانىڭ باس پروكۋراتۋراسى ەلدىڭ بۇرىنعى پرەمەر-ءمينيسترى يۋليا تيموشەنكوعا قاتىستى تەرگەۋ جۇمىستارىن اياقتاپ, ءىس سوتقا جىبەرىلدى. بۇرىنعى پرەمەرگە قىزمەت وكىلەتتىگىن اسىرا پايدالاندى, بيلىگىن جانە قىزمەت جاعدايىن وكتەمدىكپەن جۇرگىزدى دەگەن ايىپ تاعىلعان. سونداي-اق, ول بيۋدجەت زاڭدىلىعىن بۇزدى دەپ تە ايىپتالعان بولاتىن.
اسكەري بورىشىن گرۋزين كونتينگەنتى قۇرامىندا اۋعانستاندا وتەپ جۇرگەن كاپرال گەورگي اۆالياني قازا تاپتى. مينا جارىلۋى سالدارىنان تاعى ەكى گرۋزين اسكەري قىزمەتشىسى جاراقات العان.
ينتەرنەت ماتەريالدارى نەگىزىندە ازىرلەندى.
