تاقتاداعى تايتالاس ءتامامدالدى

ازەربايجاننىڭ استاناسى – باكۋدە قىركۇيەكتىڭ 2-سىندە باستالعان دۇنيەجۇزىلىك شاحمات وليمپياداسى 14-ىندە ءوزىنىڭ مارەسىنە جەتتى. تۋرنير شۆەيتساريالىق جۇيە بويىنشا 11 تۋر بويىنشا وتكىزىلدى. ءاربىر كوماندا ساپىندا 4 نەگىزگى جانە 1 قوسالقى ويىنشى ونەر كورسەتتى. كايسسا ساربازدارىنىڭ كۇرەسى قورىتىندىسىندا ەرلەر قۇرامالارى اراسىندا اقش, ۋكراينا جانە رەسەي شاحماتشىلارى العاشقى ءۇش ورىنعا ورنالاستى. ۇزدىك وندىقتىڭ قالعان ورىندارىن وسى رەتتەرىمەن ءۇندىستان, نورۆەگيا, تۇركيا, پول­شا, فرانتسيا, انگليا جانە پەرۋ كومان­دالارى تولىقتىردى. وسى دودادا قازاقستان جاساعى 28-ورىنعا تابان تىرەدى. پوستكەڭەستىك ەلدەردەن ءبىزدىڭ الدىمىزعا ازەربايجان (12-ورىن), بەلارۋس (14), لاتۆيا (17) جانە گرۋزيا (24) ءتۇسىپ كەتتى. ايەلدەر اراسىنداعى باسەكەدە جۇلدەلى ۇشتىكتى قىتاي, پولشا جانە ۋكراينا سپورتشىلارى ءتۇزدى. وندىقتىڭ قالعان ورىندارىنا رەسەي, ءۇندىستان, اقش, ۆەتنام, ازەربايجان, يزرايل جانە گرۋزيا جايعاستى. ءبىزدىڭ قىزدار 37-ورىننان تابىلدى. جارىستىڭ سوڭعى كۇنى التىن مەدالدىڭ باستى ۇمىتكەرلەرى – اقش جانە ۋكراينا ەرلەر قۇرامالارى كەزەكتى قارسىلاستارىن جەڭىپ, 20 ۇپايدان جينادى. بۇدان كەيىن قوسىم­شا كورسەتكىشتەردى ساراپ­قا سالۋعا تۋرا كەلدى. ول قۇراما شتاتتار شاح­مات­شىلارىن ءبىرىنشى ورىنعا شىعار­دى. وسى كۇنى قازاقستان كومان­داسى ليتۆانى 2,5:1,5 ەتىپ تىزە بۇك­تىر­دى. وليمپيادا قورىتىندىسىندا جىگىتتەر اراسىندا فيليپپين­دىك ەۋگەنيو توررە – ءبىرىنشى, كانادالىق ەريك حانسەن – ەكىنشى, ۋكراينالىق انتون ۆولوكيتين ءۇشىنشى ورىندارعا شىقتى. ءبىز­­دىڭ كوماندادان مۇرتاز قاجى­عاليەۆ – 90-شى, ءانۋار ىزماعامبەتوۆ – 92-ءشى, ال ازامات وتەعاليەۆ 107-ءشى بولدى. ايەلدەر باسەكەسىندە قىتاي مەن رەسەي بەتپە-بەت كەلىپ, بۇلاردىڭ الدىڭ­عىلارى جەڭىسكە جەتتى. ءسوي­تىپ, باس بايگەنىڭ تاعدىرى شەشىلدى. ال رەسەيلىكتەر جۇلدەلى ورىننىڭ شەڭ­بەرىنەن شىعىپ قالدى. قازاق­ستان قىزدارى سوڭعى تۋردا بەلارۋس كومانداسىنان 1,5:2,5 ەسەبىمەن جەڭىلىس تاپتى. قىزدار اراسىندا گرۋزين نينو باتسياشۆيلي – ءبىرىنشى, قىتايلىق جانگيۋ تان – ەكىنشى, پولياك كلاۋديا كۋلان ءۇشىنشى ورىنداردى ەنشىلەدى. قازاق­ستان­دىقتار اراسىنان شولپان جىل­قايداروۆا (113), جانسايا ءابدى­مالىك (137) جانە گۇلميرا داۋلەتوۆا (146) ۇزدىك 150-لىكتىڭ شەڭبەرىنەن كورىندى.   دامير قوجامقۇل