قوستانايدا تەاتردىڭ بۇرىنعى ديرەكتورىنا قاتىستى سوت باستالدى

قوستانايدا ءى.وماروۆ اتىنداعى وبلىستىق قازاق دراما تەاترىنىڭ بۇرىنعى ديرەكتورى نۇرلان ەرەكەشەۆكە, بۇرىنعى باس بۋحگالتەر گۇلزادا بەكتۇرسىنوۆاعا جانە بۋحگالتەر كاسسير مەڭسۇلۋ كۇلتاەۆاعا قاتىستى سوت ءىسى باستالدى. ولاردىڭ ۇشەۋى دە الدىن الا كەلىسىپ, ۇيىمداسقان تۇردە مەملەكەتتىك كوممۋنالدىق قازىنالىق كاسىپورىنعا بولىنگەن بيۋدجەتتىك قارجىنى اسا ءىرى كولەمدە ۇرالاعانى ءۇشىن ايىپتالىپ وتىر. تەاتردىڭ 2011 جىلدىڭ قاڭتارىنان 2016 جىلدىڭ ناۋرىزىنا دەيىنگى ەسەپ-قيساپ ماتەريالدارى بويىنشا تەكسەرۋ ورگاندارى انىقتاعانداي, ديرەكتور ن.ەرەكەشەۆ ءوزىنىڭ لاۋازىمدىق قىزمەتىن پايدالانا وتىرىپ, باس بۋحگالتەر گ.بەكتۇرسىنوۆامەن جانە كاسسير م.كۇلتاەۆامەن الدىن الا كەلىسىپ, سىبايلاستىقپەن اسا ءىرى كولەمدە مەملەكەت قارجىسىن جىمقىرعان. كاسسير م.كۇلتاەۆا بانكتەگى ەسەپ ايىرىسۋ شوتىنان شىعىس-كاسسالىق وردەر بويىنشا قارجىنى قولما-قول اقشاعا اينالدىرىپ, شىعارىپ الىپ وتىرعان. وسىلايشا ونى ۇشەۋى ءبولىسىپ كەلگەن. ال بەكتۇرسىنوۆا ۇرلانعان قارجىنىڭ ءىزىن بۋحگالتەرلىك قۇجاتتارمەن جاۋىپ كەلگەن. ارينە, ولارعا ديرەكتور ن.ەرەكەشەۆتىڭ قولى قويىلادى جانە ول بۋحگالتەر مەن كاسسيردى قامقورلىعىنا العان. العاشقى سوت وتىرىسىنىڭ وزىندە كۋاگەرلەردىڭ سوزىنەن تەكسەرىس كەزىندە كىرىس جانە شىعىس-كاسسالىق قۇجاتتاردىڭ قايتادان جاسالعانى ءمالىم بولدى. سونداي-اق ادامداردىڭ قولىن سىرتتاي قويىپ, ولاردىڭ اتىنا جالعان قۇجاتتار تولتىرىلىپ, اقشا جازعان فاكتىلەر دە مولىنان كەزدەستى. قىسقاسى, وسىنداي «ءادىس-تاسىلدەرمەن» تەاتر ديرەكتورى ن. ەرەكەشەۆ باستاعان قىلمىستىق توپ 2011 جانە 2016 جىلدار ارالىعىندا بيۋدجەتتەن تەاترعا دەپ بولىنگەن 163 ميلليون تەڭگەگە قول سالعان. كۇدىكتىلەرگە قىلمىستىق كودەكستىڭ 176-بابى 4-ءبولىمىنىڭ «ب» تارماعى, 314-ءبولىمنىڭ 1 تارماعى بويىنشا, ياعني وزگەنىڭ سەنىپ تاپسىرعان مۇلكىن اسا ءىرى كولەمدە ۇرلاعانى جانە تالان-تاراجعا سالعانى, لاۋازىمىن پايدالانا وتىرىپ, جالعان قۇجاتتار جاساعانى ءۇشىن ايىپ تاعىلدى. ءنازيرا جارىمبەتوۆا